“ အိပ်မက် မက်တယ်အဖေ..... ” တဲ့။
သမီးကြီးက ဒီလို စကားစတော့ ကလေးနှစ်ယောက်အမေပဲ ဖြစ်နေပြီ။ ကလေးကလား အိပ်မက်မက်တာ အဖေကို တိုင်တည်စရာလားလို့ ကျုပ်က မျက်မှောင်ချီရင်း ပြုံးမဲ့မဲ့ မေးဆတ်မိတယ်။
“ အဲဒါ ဆန်းသလား.....သမီး.... ”
“ အိပ်မက်မက်တာ အဆန်းမဟုတ်ပေမယ့်...ညက အိပ်မက်မက်တာ ကြီးမေကို အဖေရဲ့။ ရိုးရိုးမြင်လိုက်ရရုံမက်တာလည်း မဟုတ်ဘူး။ အိပ်မက်ထဲမှာ သမီးငယ်ငယ်ကကျောင်းကို ကြီးမေနေ့လည်ထမင်း လာပို့နေကျပုံစံမျိုး..။ သမီးကလှမ်းမြင် ပေမယ့်....ဟယ်....ကြီးမေကသေပြီးသားပဲ...လို့ ထိတ်ကနဲသတိရပြီး မျက်နှာလွဲဝှက် မမြင်ချင်ယောင်ဆောင်မိတယ်။
ဒါပေမယ့်...စိတ်ထဲကလည်း မကောင်းပဲ....ကြီးမေဘာများ ပြောချင်လဲမသိ ဆိုပြီး အားတင်းရင်ဆိုင်လိုက်တယ်။
ပြိုင်တူလိုပါပဲ။ ကြီးမေနေကောင်းလားလို့အမေး...ကြီးမေကလည်း အပုနေကောင်းရဲ့လားတဲ့....။
“ အဲဒီမှာပဲ....ကြီးမေမျက်နှာဟာ ဖြူဖျော့နေပြီး အရမ်းအိုစာနေတာ သေသေချာချာ မြင်လိုက်ရတယ်။
သမီးက ကောင်းပါတယ်လို့ရင်တထိတ်ထိတ်နဲ့ဖြေလိုက်တော့...နင်တို့ကသာ နေကောင်းတာ....ငါ့လည်းကြည့်ပါဦးဟယ်...
...လို့ ပြောပြောဆိုဆို ကြီးမေက သူ့နဖူးကအရေပြားကို နှစ်လက်မလောက် ဆွဲခွာပြလိုက်သတဲ့...။ သမီးလည်း အရမ်းဝမ်းနည်းထိတ်လန့်ပြီး ကြီးမေရယ်......သမီးကြောက်တတ်တာ သိရဲ့သားနဲ့...ဒီလိုမလုပ်ပါနဲ့...လို့လည်း ပြောမိတယ်။ တဖွဖွရွတ်နေလိုက်တာ.....ဘေးက ကိုမောင် နှိုးမှပဲ အိပ်မက်မှန်း သိရတော့တယ် အဖေ.... ”
ကျုပ် ကိုယ့်ကိုကိုယ် အပြစ်ရှိသူတယောက်လို နွမ်းခွေသွားပြီး ခြေထောက်တောင် ခိုင်ခိုင်မရပ်နိုင်တော့လို့ ဘေးနားက ဆက်တီခုံပေါ်ကို ခပ်မြန်မြန် ထိုင်ချလိုက်ရတယ်။ ကျုပ်မက်တာလည်း အဲဒီအိပ်မက်ပုံစံပဲ။ သမီးနဲ့ နေရာဒေသပဲကွာတယ်။
မျက်နှာအမူအယာ၊ ပြောတဲ့စကား၊ အပြုအမူတွေက တော်တော်လေးကို ဆင်တာပဲ။ ကျုပ်ကတော့ ကျုပ်တို့မောင်နှမ ငယ်ငယ်ကနေခဲ့ဖူးတဲ့ ရွာချောင်းစပ်နားမှာတဲ့။ အစ်မဟာ...သူ့ပစ်္စည်းတွေကို စိတ်စွဲပြီး မကျွတ်မလွတ်ဘဲ နာနာဘာဝကိုများ ရောက်နေလေရော့သလား။ ရင်ထဲမှာ ဆို့ကျဉ်ကျပ်ခဲသွားရပြီ။ ဒီလိုဆိုယင်ဖြင့် တာဝန်ရှိသူဟာ ကျုပ်ကိုယ်တိုင်ပဲပေါ့။ အစ်မအပေါ် တာဝန်မကျေခဲ့သူဟာ ကျုပ်ပဲဆိုတာ ကျုပ်ကလွဲပြီး ဘယ်သူမှ မသိတာ....။ ဒီကမ္ဘာလောကမှာ.....သေခါနီးလူတစ်ယောက်ရဲ့ နောက်ဆုံးအမှာစကားကို လက်ခံခဲ့ပြီးကာမှ လုပ်မပေးနိုင်တာလောက် လိပ်ပြာမသန့်တာ မရှိတော့ပါဘူးဗျာ....။
“ အဖေ....အဖေ....သမီးပြောတာ ကြားရဲ့လား။ လာမယ့်စနေနေ့မှာ ကြီးမေအတွက် ဘုန်ကြီးသုံးပါးပင့်ပြီး ဆွမ်းကျွေး၊ သင်္ကန်းကပ်၊ အမျှဝေချင်တယ်။ ကြီးမေရဲ့ ငွေစုလက်မှတ်တွေ ထုတ်ရတဲ့အထိ မစောင့်ချင်တော့ဘူး။ ကိုယ်နိုင်သလောက်ပဲ အယင်လုပ်လိုက်တော့မယ် အဖေရာ.....နော်....”
အစ်မဆုံးတာ ဘာလိုလိုနဲ့ ခြောက်လတောင် ကျော်သွားခဲ့ပြီ။ သမီးကြီးက သူ့အဒေါ်ခြောက်လပြည့်ကို သံဃာကုန် အာရုံဆွမ်းလောင်းဖို့ သိတ်အာသီသဖြစ်နေတယ်။ မနက်စောစော အလင်းဖျော့ဖျော့မှာ တန်းစီကြွလာတဲ့ သံဃာတော်တွေကို ဆွမ်းလောင်းလှူရတဲ့ ကြည်နူးမှုသဒ်္ဒါတရားက ဘယ်အလှူနဲ့မှမတူပဲ သိတ်ပီတိဖြစ်ရသတဲ့။ ဘာပကာသနမှ မပါလို့လည်း ရိုးရှင်းပြီး ကျေနပ်မှုအထူးခြားဆုံးရသတဲ့။
ဒါကြောင့်....သူ့အဒေါ်ကျန်ခဲ့တဲ့ ငွေစုလက်မှတ်ကလေးကို ဘဏ်ကနေထုတ်ယူဖို့ ကြိုးစားပြီး သူကငွေစိုက်ထည့် လှူဖို့စီစဉ်နေပေမယ့် အခက်အခဲတချို့ရှိနေတယ်။ သံဃာကုန်ဆိုတော့လည်း ခုခေတ်ကုန်ဈေးနှုန်းနဲ့က သုံးသိန်းနီးပါးလောက်ကုန်ကျမှာမို့ သူတဦးတည်း မနိုင်ဘဲ...အချိန်ကြံ့ကြာနေရတယ်လေ။
xxxxxxxxx
သမီးကြီးက သူမငယ်ငယ်ကတည်းက အမေလိုချစ်ခင် တွယ်တာခဲ့ရပြီး အတူအိပ်၊ အတူစား၊ နေလာခဲ့တဲ့ အဒေါ်ကို တော်တော်သံယောဇဉ် ကြီးရှာတယ်။ အိမ်ထောင်မကျခင်အချိန်ထိ အဒေါ်နဲ့အတူအိပ်တုန်း....။ ကျုပ်တို့လင်မယားကလည်း ဒုတိယသားအမွှာညီနောင်ကို မွေးပြီးကတည်းက မျောက်ရှုံးအောင်ကဲတဲ့ အမွှာနှစ်ကောင်နဲ့၊ စီးပွားရေးကတဖက်နဲ့.....ဘယ်လိုမှ လက်မလည်ခဲ့ဘူး။ သမီးကြီးကို အစ်မနဲ့ပဲ အတူအိပ်စေပြီး ပေးမွေးခဲ့တယ်ပဲ ဆိုပါတော့။ အစ်မပဲ သမီးဝေယျာဝစ္စအားလုံး သုံးနှစ်သမီးလောက်ကတည်းက တာဝန်ယူလာခဲ့တာ...။ကျောင်းနေချိန်ကျတော့လည်း ကျောင်းပို့ကျောင်းကြို....။ အပျိုဖော်ဝင်တော့လည်း သူပဲအပျိုထိန်း....။ သူတို့နှစ်ယောက်ရဲ့ တွယ်တာမှုက သားအမိသံယောဇဉ်ထက်တောင် ပိုနေသလိုပဲ။
တစ်ခါတစ်လေ....ကျုပ်နဲ့အမရဲ့အထက် ရှမ်းပြည်မှာနေတဲ့ အစ်မအကြီးဆုံးက အလှူအတန်းရှိလို့ပဲဖြစ်ဖြစ်၊ နေထိုင်မကောင်း လို့ပဲဖြစ်ဖြစ်...၊ တခြားအကြောင်းကိစ္စ တစ်ခုခုကြောင့်ပဲဖြစ်ဖြစ်....အစ်မကို လှမ်းခေါ်တတ်သေးတယ်။
“ အပျိုကြီးဆိုတာ....ဘုံကျွန်ဆိုတဲ့စကားများ.....တယ်..မှန်...”
....လို့ ခပ်ထေ့ထေ့ပြောပြီး မတတ်သာလို့သာ သွားရ...။ တူဝရီးနှစ်ယောက် တယ်ပြီးခွဲနိုင်ကြပုံ မရပါဘူး။ လေး ငါးရက်ရှိတာနဲ့ သမီးကဖုန်းတဂွမ်ဂွမ်ဆက်ပြီးခေါ်...။ အဒေါ်လုပ်သူကလည်း ကဆုန်ဆိုင်းပြီးပြန်ပြေး လာတော့တာပဲ။
တစ်ခါကများ အစ်မကြီးလေဖြတ်သွားတော့ ရှမ်းပြည်မှာ တစ်လကျော်နှစ်လလောက် လူမမာပြုစုရင်း အမ သောင်တင်နေသေးတယ်။ အဲဒီချိန်ကဆို ကျုပ်သမီးကြည့်ရတာ ရေနည်းငါးလို တဖြတ်ဖြတ်...၊ တလွန့်လွန့်နဲ့...။ အပျိုပေါက်ရောက်စဆိုတော့ သဘာဝကကို စိတ်ကစားချိန်ကျကာမှ တိုက်တိုက်ဆိုင်ဆိုင်...။ စားချိန်အိပ်ချိန်မမှန်ပဲ ကိုယ်ခံအားတွေကျပြီး အအေးမိသွားတာ....။ နမိုးနီးယားဖြစ်ပြီး ပစ်ရပြီတောင်အောက်မေ့တာဗျို့။ အမမှာ နာတာရှည်လူမမာကိုပစ်ပြီး တူမဆီ ပြန်လာရရှာတယ်။
တော်သေးတာတစ်ခုက ကျုပ်တို့ရဲ့အဒေါ်..သမီးရဲ့အဖွားလေးပေါ့ဗျာ။ အစ်မကြီးကလေဖြတ်ပြီး ကိုယ်တစ်ပိုင်းသေသွားတော့ အရွယ်ကောင်းတုန်း ကျုပ်ယောက်ဖကို ပွေမှာရှုပ်မှာ၊ နောက်မိန်းမတွေဘာတွေ ယူမှာစိုးရိမ်သတဲ့။ အစ်မကြီးမှာက သားသမီး ငါးယောက်တောင်ဆိုတော့ တစိမ်းလက်ထဲရောက်မှာစိုးလို့ဆိုပြီး အစ်မနဲ့ပေးစားဖို့ စီစဉ်ပါလေရောဗျာ။
တော်သေးတယ်ဆိုတာ အဲဒါကိုပြောတာပါ။ အဲဒီကိစ်္စ ကျုပ်သမီးမသိပေလို့ပေါ့။ သိများသိရင် မိုးမီးလောင်လိမ့်မယ်။
“ သူ့အဖွားကိုလည်း ဒေါသထွက်၊ ရန်တွေ့နဲ့.....ခမျာ ငရဲကြီးနေပါအုံးမယ်လေ...မပြောကြစို့နဲ့....” ဆိုပြီး ဖုံးထားရတာ....။
အဒေါ်လုပ်သူကလည်း တော်ရှာတယ်။ သူ့တူမကို စိတ်ထိခိုက်မခံနိုင်သလို အစ်မကြီးအပေါ်မှာလည်း ရက်စက်ရာရောက်လို့မို့ ဒီအစီအစဉ်ကို လုံးဝသဘောမတူနိုင်ပါဘူးတဲ့။
အစ်မကြီးကိုယ်တိုင်က ကျေကျေနပ်နပ်ပေးစားတာကို အစ်မကရော၊ ကျုပ်ယောက်ဖကပါ ငြင်းကြတယ်။ ယောက်ဖကလည်း အစ်မကြီးပေါ်မှာ သစ္စာမပျက် ရိုးမြေကျပေါင်းပါ့မယ်ဆိုပြီး တကယ့်ကိုကြင်ကြင်နာနာနဲ့ လိုလေသေး မရှိ တယုတယပြုစုလာခဲ့တာ....။ ဆယ့်လေး....ငါးနှစ်လောက်ရှိမယ်။ ဒါကြောင့်လည်း ဒီယောက်ဖကျေးဇူးတွေက ကျုပ်အပေါ်မှာ မလွန့်သာအောင် ကြီးမားခဲ့တာပေါ့။ မောင်နှစ်မသာဆိုတာ...ကျုပ်အမကြီးနဲ့ကျုပ်က ဆယ့်ငါးနှစ်လောက် အသက်ကွာတယ်။
အစ်မကြီးယောင်္ကျားယူတော့ ကျုပ်က ငါးနှစ်သားလားပဲ ရှိသေးတာ။ယောက်ဖက ပိုက်ဆံလည်းရှိ၊ အလိုကလည်းလိုက်တော့ ချစ်လည်းချစ်၊ပျော်လည်းပျော်တာပေါ့။ နှစ်မလင်နေမောင်ဖင်ကျိန်းရမှန်းမသိပဲ ဖိုးကျိုင်းတုတ်ဖြစ်ပြီး ခုန်ပေါက်ပျော်မြူးနေခဲ့တာလေ။
ကျုပ်မွေးပြီးပြီးချင်း ဘာမှမကြာဘူး။ အဖေကဆုံးသွားတော့....ကျုပ်ကို အဖေ့မျက်နှာတောင် မမှတ်မိခဲ့တဲ့ ဖတဆိုးလေးဆိုပြီး အမေနဲ့အစ်မတွေက အလိုလိုက်လေ...ကျုပ်ကလည်း ငယ်ငယ်က အစ်မတွေအပေါ် သိတ်နိုင်စားခဲ့တာတဲ့။ ယောက်ဖရလာတော့လည်း အသက်ကွာတဲ့ယောက်ဖကိုပါ ဆိုးနွဲ့ပြီး ဗိုလ်ကျခဲ့တာပါပဲ။ ကျုပ်ကျောင်းစရိတ်ကို အမေရယ်အစ်မရယ် စက်ချုပ်ပြီး ရှာပေမယ့် ဘယ်လောက်ငမလဲ။ ပညာတတ်ဘွဲ့ရတဲ့အထိ ယောက်ဖထောက်ပံ့မှုတွေကပဲ အဓိကကျခဲ့တာပါ။
အမေဆုံးတော့လည်း ဘွဲ့လေးတခုပိုက်ပြီး အစ်မရယ် ကျုပ်ရယ် မောင်နှမနှစ်ယောက် ယောင်ချာချာဖြစ်နေတော့.... ယောက်ဖကပဲ အရင်းအနှီးမတည်ပြီး ကိုယ်ပိုင်အလုပ်တစ်ခု ဦးဆောင်လမ်းပြခဲ့တာ.....။ ကျုပ်တို့မောင်နှမ လူတန်းစေ့နေနိုင်အောင်.....၊ ခု ကျုပ်မိသားစု မျိုးဆက်သစ်ကလေးတွေ လူတစ်လုံးသူတစ်လုံး ထားနိုင်အောင်...၊မြို့ကြီးပြကြီးမှာ ကိုယ်ပိုင်စီးပွားရေးနဲ့ ထည်ထည်ဝါ၀ါ နေနိုင်အောင်က ယောက်ဖပံ့ပိုးမှုသာမပါရင် ဘယ်လှေကားနဲ့တက်မလဲဗျာ။ အဲဒီတော့...မာတာပီတုဂုဏော နောက်မှာကပ်ပြီး ယောက်ဖဂုဏော အနနေ်္တာလို့ ကျုပ်က ဦးထိပ်ပန်ဆင်ထားတာ ကျုပ်မလွန်ပါဘူးနော်......။
xxxxxxxxxx
တကယ်တမ်းလွန်တာက ကျုပ်သမီးလို့ပဲ ပြောရမလိုဖြစ်နေပြီ။ အစ်မဟာ ခပ်ငယ်ငယ်အရွယ်ရှိတုန်းမှာလည်း လာစပ်သမျှ၊ တောင်းသမျှလူတိုင်းကို သမီးကငယ်သေးတာကတကြောင်း၊ သူကိုယ်တိုင်ကလည်း မခွဲရက်တာကတကြောင်းနဲ့ အရိုးများသလေး၊
ချေးခါးသလေး ငြင်းခဲ့တာချည်းပဲ။ သမီးဆယ်ကျော်သက်အရွယ်လောက် ရောက်ပြန်တော့လည်း သမီးကအတင်းတားတာနဲ့၊ အစ်မ ကလည်း တွန့်ဆုတ်နေတာနဲ့....အပျိုကြီးလုပ်ဖို့ စိတ်ကူးမရှိပါဘဲ အပျိုကြီးဖြစ်ခဲ့ရရှာတယ်။
ဒါပေမယ့်...အဒေါ်ကသာ တူမကိုငဲ့ပြီး အပျိုကြီးဖြစ်ခဲ့ရရှာတာ....။ တူမလုပ်တဲ့သူကတော့ ဆိုင်းမဆင့်ဗုံမဆင့် အသက်ဖြင့် နှစ်ဆယ်မပြည့်သေးဘူး။ လင်နောက်လိုက်ပြေး ပါလေရော....။ အစ်မမှာ အသည်းကွဲပြီး ရင်ထုမနာဖြစ်ရတာ......။ အစ်မကသာ တငိုငို တရယ်ရယ်....ရယ်။ ကျုပ်သမီးကတော့ မိုးမမြင်လေမမြင် ပျော်မဆုံးဘူး။ အဲ...အစ်မကတော့ သူ့တူမ ကျုပ်အိမ်မှာမရှိတော့ကတည်းက ယောင်ချာချာနဲ့....။ တူမလွမ်းစိတ်နဲ့ နေရခက်တယ်ထင်ပါရဲ့။ အစ်မကြီးရှိတဲ့ ရှမ်းပြည်မှာပဲ အနေများလာတယ်။
ဒါပေမယ့်....သမီးကြီး ကိုယ်ဝန်ရှိပြီလည်းဆိုရော....ချက်ရေးပြုတ်ရေးကအစ အစစအရာရာ စောင့်ရှောက်ဖို့လူလိုတယ်ဆိုပြီး သူ့တူမအိမ်ပေါ်ကို အထုပ်ဆွဲပြီး တက်တော့တာပဲဗျို့။ တူမကလည်း ၀မ်းပမ်းတသာပါပဲ။
“ ကြီးမေ.....သမီးဆီမှာပဲ တသက်လုံးအတူနေတော့နော်....။ ဘယ်မှမသွားနဲ့တော့။ ကြီးမေကို ချစ်စရာကောင်းတဲ့ မြေးကလေးမွေးပေးမယ်....”
တူမကိုချစ်တဲ့အဒေါ်ကတော့ တူမကမွေးတဲ့ မြေးလေးကိုလည်း တုန်နေအောင်ချစ်ရှာတယ်။ မီးတွင်းထဲမှာ တူမကိုပြုစုလိုက်...၊ ချက်ပြုတ်ကျွေးမွေးလိုက်...၊ ကလေးထိန်းပေးလိုက်နဲ့ သူ့ဘ၀ကိုသူ ကျေနပ်ပျော်ရွှင်နေတာပါပဲ။
xxxxxxxxxx
“ ကြီးမေကို ဆရာဝန်နဲ့ပြမှ ဖြစ်တော့မယ်ဖေဖေ.....။ မစားနိုင်မသောက်နိုင်တာ နေထိုင်မကောင်းရုံ ရိုးရိုးတော့ မဟုတ်လောက်ဘူး။ ညညတွေလည်း မအိပ်ပဲ သူ့အခန်းထဲမှာ တချွတ်ချွတ်နဲ့ ဘာတွေလုပ်နေမှန်းမသိဘူး။
ခန္ဓာကိုယ်ကရောဂါက အပရိကပဲဖြစ်ပြီး တကယ်ဖြစ်နေတာ စိတ်ကျရောဂါပဲဖေဖေ။ သမီးကောင်းကောင်းသိတယ်..။”
သမီးကြီးကတော့ သူ့အဒေါ်အရိပ်အကဲကို အသိဆုံးပါပဲ။ ရှမ်းပြည်က အစ်မကြီးဆုံးကာနီး တလလောက်သွားပြုစု ပေးခဲ့တဲ့အမဟာ....သမီးဆီပြန်ရောက်ကတည်းက ပုံမှန်မဟုတ်တာတော့ ကျုပ်လည်းသတိထားမိတယ်။ ဒါပေမယ့်...လူတစ်ယောက်... အထူးသဖြင့် ကိုယ့်အမအရင်းခေါက်ခေါက် တစ်ယောက်လုံး ကိုယ့်မျက်စေ့ရှေ့မှာ ဝေဒနာခံစားရတာရော....၊ အသက်ထွက်တာ ကိုရော...မြင်ခဲ့ တွေ့ခဲ့ရတဲ့ လူတစ်ယောက်ဟာ....ဒီလောက်တော့ ကြေကွဲချောက်ချားလိမ့်မပေါ့...လို့ ခပ်ပေါ့ပေါ့ပဲ တွေးမိတာ...။
ကျုပ်ကိုယ်တိုင်လည်း အမကြီးအသုဘမှာ ကြေကွဲဝမ်းနည်းခဲ့ရတာပဲလေ။
“ ကြီးမေက သူ့ကိုယ်သူ သေခါနီးပြီလို့ စိတ်ထင်နေပြီ အဖေ။ ညက သမီးကို သူ့ပစ်္စည်းထုပ်ကလေး လက်ထဲ လာထည့်ပေးပြီး မှာစရာရှိတာ မှာမလို့တဲ့....။ သမီးကလုံးဝလက်မခံပဲ ကြီးမေက သိတ်ကျန်းမာရေးကောင်းတာ...။
ဒီအသက်အရွယ်ထိ ဒေါင်ဒေါင်မြည်...။ အသက်ခုနစ်ဆယ်လို့ပြောရင် ဘယ်သူမှမယုံဘူး။ ခြောက်ဆယ်တောင် ပြည့်သေးရဲ့လားလို့ တအံ့တသြမေးတဲ့ သူချည်းပဲ။ ခု....နေထိုင်မကောင်းတာက စိတ်ထိခိုက်လို့ ဖြစ်ရတာ....။
ဒီတော့.....ဆရာဝန်နဲ့ သေသေချာချာကုမယ်။ ကြီးမေ နေပြန်ကောင်းလာစေရမယ်။ ဒီပစ္စည်းထုပ်ကို ကြီးမေပြန်သိမ်းထား။ ကြီးမေက အသက်အရှည်ကြီး....မြေးတွေ...မြစ်တွေအများကြီးနဲ့ နေရဦးမှာ..။ သမီးကိုချစ်ရင် စိတ်တင်းထားပါ။ စိတ်မလျှော့လိုက်ပါနဲ့နော်...လို့ ချော့မော့ဖျောင်းဖျပြီး အထုပ်ကလေး အတင်းပြန်ပေးရတယ်အဖေ....။”
“ အေးပါသမီးရယ်...သာဓု.....သာဓု.....သာဓု။ သမီးကြီးမေဟာ သမီးကျေးဇူးရှင်ဆိုလည်း မမှားပါဘူး။
ငါ့သမီးရဲ့ မမက်မောတတ်တဲ့စိတ်ဓါတ်ကိုလည်း ဖေဖေသိပါတယ်။ သမီးကြီးမေမှာလည်း သိတ်ရှိလှတယ်မဟုတ်ပါဘူး။
သမီးအဖွားသေတော့လည်း ရွှေဘီးလေးတစ်ချောင်းနဲ့ ရွှေကြယ်သီးလေးတစ်စုံပဲ ကျန်တာပါ။ အဖေမိန်းမယူတော့ သမီးအမေ့ကို ကြယ်သီးတစ်စုံပေးပြီး အမက ရွှေဘီးတစ်ချောင်းပဲ ယူထားတာ....။ ရှိလှ သူဝတ်နေကျ ဆွဲကြိုးနဲ့လက်ကောက်....၊ ပြီးတော့....နားကပ်တစ်ရံပေါ့....။ ”
“ အမယ်.....အထုပ်လေးက လေးတော့လေးသားအဖေ.... ”
လောဘကြီးတဲ့သူဆိုရင် လက်ထဲထိရောက်ပြီးသား အထုပ်ကို ဘယ်လက်လွှတ်ခံတော့မလဲ။ အနည်းဆုံး ကာလပေါက် ဈေးနဲ့ ရွှေသုံးလေးကျပ်သားပဲရှိဦးတော့...ဆယ်သိန်း၊ဆယ့်ငါးသိန်းကတော့ ပြေးမလွတ်ဘူးလေ။ ဒါပေမယ့်...ဒီအထုပ်က သူ့အဒေါ်ရဲ့ အသက်ဆိုတာ သူသိတယ်။ အမက သွားလေရာ ဒီအထုပ်ကိုသယ်နေကျ။ အမကြီးဆီသွားလည်း ဒီအထုပ်ပါတယ်။ ကျုပ်အိမ်နဲ့ သမီးအိမ် ကူးချည်သန်းချည်လုပ်ရင်လည်း ယူသွားတာပဲ။ ယုတ်စွအဆုံး...မြို့ထဲဈေးဝယ် ထွက်ရင်တောင်ပါတယ်။
ဆလင်းဘက်လို ဘေးလွယ်အိတ်ခပ်ကြီးကြီးကို သော့ခတ်ထားပြီး သွားလေရာ သယ်တတ်တယ်။ ကိုယ်နဲ့မကွာ အမြဲပါတတ်လွန်းလို့ ကျုပ်ကတောင် သတိပေးရသေးတယ်။ သူများရိပ်မိသွားရင် အန္တရာယ်ဖိတ်ခေါ်သလိုလည်းဖြစ်တယ်။ မတော် ပျောက်ရှခိုးဝှက်ခံရရင်လည်း အစ်မ ရူးလိမ့်မယ်လို့ တွေးပူရတာပေါ့ဗျာ။ ဒီတော့.....ဒီလောက် သူခင်တွယ်ဂရုစိုက်တဲ့ ပစ္စည်းထုပ်ကို သူကျေကျေနပ်နပ် ကြည်ကြည်ဖြူဖြူပေးပေမယ့် ဒီပစ္စည်း သူ့လက်ကလွတ်တာနဲ့ သူ့စိတ်သူလျှော့ပြီးသားပဲ။ ဒါကို သမီးကရိပ်မိတော့ သူ့လက်ထဲပဲ အတင်းပြန်ထည့်ခဲ့တယ်။ သိတ်မှန်တာပေါ့ဗျာ။ သမီးတွေးထင်ထားသလိုပဲ။ စိတ်ကျရောဂါအတွက် ဆရာဝန်ကပေးတဲ့ ဆေးတွေနဲ့ သမီး အပြုအစုကောင်းတာနဲ့ပဲ အစ်မဟာ....နေပြန်ကောင်းပြီး ဒေါင်ဒေါင်မြည် ပြန်ဖြစ်လာတယ်။
ဒီတော့မှ ကျုပ်လည်း ဟင်း..ချနိုင်တော့တယ်။ အမကြီးဆုံးပြီး သုံးလလောက် တရှောင်ရှောင်ဖြစ်နေတဲ့အစ်မဟာ....အရင်လိုပဲ ပုံမှန်ပြန်ဖြစ်လာပြီး သူ့တူမနဲ့ နောက်ထပ်တိုးလာတဲ့မြေးမ မွေးကင်းစလေးကို ပြုစုယုယရင်း စိတ်မအားလူမအား ဖြစ်သွားပြန်ပြီလေ။
xxxxxxxxxx
ကျုပ်ချလိုက်တဲ့သက်မဟာ ဆုံးတောင်မဆုံးသေးဘူး။ ငယ်ထိပ်ကိုတက်ဆောင့်မယ့် ပြဿနာက ရှေ့မှာကြိုလင့် နေပြန်တော့တယ်။ အစ်မကြီးဆုံးလို့ ခြောက်လလောက်ပဲရှိဦးမယ်။ ကျေးဇူးရှင်ယောက်ဖတော်က ပြောလာတဲ့စကား...၊ ကျုပ်ဘယ်နားနဲ့ ကြားနာရမတဲ့လဲဗျာ။
“ မောင်လေးရေ.....အကိုကြီးနားမှာ မင့်အစ်မ ရီမေကို ဆေးပေးမီးယူပြုစုဖို့ ခေါ်ထားချင်တယ်ကွယ်...” .....တဲ့။
အစ်မတွေခေါ်သလို ကျုပ်ကိုမောင်လေးလို့ပဲ ချစ်စနိုးခေါ်နေကျယောက်ဖက ကျုပ်ဧည့်ခန်း ပန်းအိုးထဲက ပန်းကလေးတောင်းသလိုမျိုး ပေါ့ပေါ့ပါးပါး အားနာစရာမဟုတ်တဲ့ပုံစံနဲ့ အစ်မကိုတောင်းနေပြီ။ အစ်မကြီးနဲ့ မင်္ဂလာဆောင်တုန်းကလို ဖင်ကျိန်းရ ကောင်းမှန်းတောင် မသိတဲ့ ကလေးလေးအရွယ်ပဲ ကျုပ်ဖြစ်လိုက်ချင်တော့တယ်။ တသက်လုံးကလည်း ချစ်ခင်လေးစားခဲ့ရ...။ စိတ်သဘောထားကလည်း ပြည့်ဝရင့်ကျက်...။ ကိုယ်ကျင့်တရား အမည်းစက်ဆိုလို့လည်း ထောက်ထောက်ထားထား ပြစရာမရှိ....။ ဒုက်္ခိတအစ်မကြီးပေါ်မှာလည်း ကြင်ကြင်နာနာနဲ့ ရိုးမြေကျသစ်္စာရှိပေးခဲ့သူ...။ တစ်ပင်လဲကာမှ တစ်ပင်ထူဖို့ဖွင့်ဟလာသူ...။ အဲဒီလူရဲ့ နောက်ထပ်ထူချင်တဲ့တစ်ပင်က အစ်မဖြစ်နေတော့ ကျုပ်ဖင်ကျိန်းရတော့တာပေါ့။ ဒါပေမယ့်...အခါခါပြုဖူး သူ့ကျေးဇူး..ဖြစ်နေလေတော့...
“ အမကို မေးကြည့်ဦးမယ်လေ....။ အမသဘောတူရင်တော့........”
ဒီလိုနဲ့.....သမီးကိုပဲ အားကိုးတကြီး တိုင်ပင်ရတော့တယ်။ အံ့သြဖို့ကောင်းတာက ကျုပ်သမီးဟာ ကျုပ်ထင်သလိုမဟုတ်ဘဲ ပြောင်းလဲရင့်ကျက်နေခဲ့တာပါပဲ။
“ ကြီးမေက အပုလေး မကန့်ကွက်ဘူးဆိုရင် သွားနေမယ်လေတဲ့ အဖေ...။ သမီးစိတ်ထဲမှာလည်း အတွေးအမျိုးမျိုးနဲ့ ဒွိဟတွေဖြစ်နေတယ်။ ဦးလေးနဲ့ကြီးမေဟာ အသက်အရွယ်အားဖြင့်တော့ အိမ်ထောင်ပြုတယ်လို့ ခေါင်းစဉ်တပ်ရက် လောက်အောင် မတင့်တယ်တော့ပေမယ့်.... သူတို့ရဲ့သံယောဇဉ်ဟာ ခုမှစတာတော့ မဖြစ်နိုင်ဘူးလို့ သမီးထင်တယ်။
ကြီးဒေါ်ကြီးကိုစိတ်မထိခိုက်စေရအောင် ဒီအချိန်ထိ ချိုးနှိမ်နိုင်ခဲ့တဲ့ သူတို့စောင့်ထိန်းမှုဟာ တော်ရုံတန်ရုံအတိုင်းအတာတော့ မဟုတ်လောက်ဘူးအဖေ။ သမီးကတော့...ကြီးမေသဘောပဲ...ဖေဖေနဲ့တိုင်ပင်ပါဦး....လို့ပဲပြောလိုက်တယ်....။ ”
ကျုပ်ကတော့......ကျုပ်မျက်နှာကိုမကြည့်ဘဲ အလုပ်သိတ်ရှုပ်နေဟန်ဆောင်ပြီး.... ဟင်းအိုးမွှေရင်း ပြောလိုက်တဲ့ အစ်မရဲ့အသံက နားထဲတ၀ဲလည်လည်နဲ့.........။
“ ငါ.....သွားနေပေးလိုက်မယ်လေ...” ......တဲ့။
xxxxxxxxxx
တကယ်တမ်းကျတော့.....ဒီအခြေအနေတစ်ခုဟာ ကျုပ်နဲ့သမီးဖက်ကသာ နားလည်ပေးဖို့ အချိန်လည်းတန်၊ တားဆီးပိတ်ပင် ဖို့လည်း မသင့်ဘူးလို့ယူဆပေမယ့်....ယောက်ဖရဲ့ သားသမီးငါးယောက်ဖြစ်တဲ့ ကျုပ်တူ၊ တူမတွေဖက်ကကျတော့ နားလည်ပေးဖို့ရာ အခြေအနေက သိတ်ကျဉ်းမြောင်းနေခဲ့ပြီ။ အမေဆုံးတာမှတစ်နှစ်မပြည့်သေးဘူး။ ခုနစ်ဆယ်ကျော်အရွယ်မှာ နောက်အိမ်ထောင်ပြုမယ် ဆိုတော့ တူ၊တူမတွေရဲ့အမြင်မှာ အမဟာ အဒေါ်အရင်းခေါက်ခေါက်ကနေ မိထွေးဘ၀အဖြစ်ကို မုန်းတီးစက်ဆုပ်မှုတွေနဲ့အတူ ပြောင်းလဲရောက်ရှိသွားခဲ့ရပြီ။ သားသမီး၊ မြေးမြစ်တွေကတော့ အသက်လည်းကြီးပြီး တကယ်လည်း လူကြီးရောဂါပေါင်းစုံ ၀င်စပြုနေတဲ့အဖိုးကြီးကို သူတို့ကိုယ်တိုင်လည်း ကိုယ်ဖိရင်ဖိမပြုစုနိုင်ပါဘူး။
ဒါပေမယ့်...အနီးကပ်ပြုစုပေးမယ့်သူ ရောက်လာပြန်တော့လည်း မတတ်သာလို့သာ ကြည့်နေရတာ....၊ အဒေါ်ဘ၀တုန်းကလို လေးစားရိုသေစိတ်တောင် မရှိချင်ကြပြန်ဘူး။ အမစိတ်ဆင်းရဲရတာ ကျုပ်ရော သမီးရော...သိပါတယ်။
“ ဟိုကောင်မတွေ သိတ်မိုက်ရိုင်းတာပဲ....။ အဒေါ်ကို ရန်သူလိုလုပ်နေကြတယ်။ အပြင်ကပြန်လာလို့ မုန့်ဝယ်လာရင် ဖအေကိုပဲ လာခွံ့ကျွေးကြတယ်။ ဘေးနားထိုင်နေတဲ့ငါ့ကို စားဦး တစ်ခွန်းမှမခေါ်ဘူး။ ခပ်တည်တည်ပဲ...။ နင့်ဦးလေးက မနေသာလို့ ဟဲ့....နင်တို့ဒေါ်လေး ကျွေးကြဦးလေ....ဆိုတာတောင် မကြားချင်ယောင်ဆောင်ပြီး မျက်နှာသုန်သုန်မှုန်မှုန်နဲ့ လှည့်ထွက်သွားကြတယ်။ ငါကတစိမ်းမဟုတ်ပါဘူး။ သူတို့အဒေါ်ပါဟဲ့....”
“ နင့်ဦးလေးကလည်းလေ....မနက်တိုင်းလမ်းလျှောက်ထွက်နေကျ သူ့မိတ်ဆွေတွေကို အိမ်ဖိတ်ပြီး ငါနဲ့မိတ်ဆက်ပေးတယ်။ အဲဒီထဲမှာပါလာတဲ့...ဒေါ်လီဆိုတဲ့မိန်းမက အသက်ငါးဆယ်လောက်.....။ ခေတ်ဆန်ဆန်နဲ့...။ က္ကုနြေ္ဒကိုမရပါဘူးဟာ...။ နင့်ဦးလေးကို အရင်ကတည်းက ကြိုက်နေတာတဲ့။ ခု.....မနက်တိုင်း ငါပါလမ်းလျှောက်လိုက်နေတယ်။ လျှောက်နေမကျတော့ ခြေတွေနာလိုက်တာ........။ ”
အသက်ကြီးကာမှ အိမ်ထောင်ရေးအပူမီးတွေ အမြိုက်ခံနေရတဲ့ အမအကြောင်းတွေ သမီးကပြန်ပြောပြတော့....ကျုပ်အရမ်း စိတ်ထိခိုက်ရတယ်။ အသက်ခုနစ်ဆယ်ကျော်ဆိုတာ တရားရှာရတော့မယ့်အရွယ်...။ တစ်သက်လုံးအပျိုကြီးဘ၀နဲ့ နေလာတဲ့ကျုပ်အစ်မ...။ ခုတော့....အပူရှာမိပြီလေ။ ဘယ်သူ့ကို အပြစ်ပြောရမလဲ။ သေသွားတဲ့အစ်မကြီးကိုလား။ ဒီအသက်အရွယ်ရောက်ကာမှ မိန်းမထပ်ယူချင်တဲ့ ယောက်ဖကိုလား။ တစ်သက်လုံးထိန်းလာတဲ့ အပျိုကြီးဂုဏ်ကို ခုနစ်ဆယ်ကျော်ကာမှ ဆတ်ကနဲလွှတ်ချလိုက်တဲ့ အစ်မကိုလား။ အဒေါ်တစ်သက်လုံးနေချင်အောင် မထားနိုင်တဲ့သမီးကိုလား။ အခြေအနေကို မတားဆီးဝံ့ခဲ့တဲ့ ကျုပ်ကိုကျုပ်လား။
ဒါပေမယ့်...ရှမ်းပြည်ဆိုတာကလည်း ခရီးနည်းနည်းထောက်တော့ လူချင်းမတွေ့ဘဲ ဖုန်းနဲ့ပဲစကားပြောကြရတာ။ နှစ်နှစ်၊ သုံးနှစ်လောက်ကြာလာတဲ့ အခါမှာတော့ တစ်ဦးနဲ့တစ်ဦးလည်း အဆက်အသွယ်ပါးလာတယ်။ အတော်ကြီးကြာမှတခါ ဖုန်းဆက်ဖြစ် ကြတော့လည်း အဆင်မပြေတာတွေဘာတွေ ကျုပ်ကိုတော့ သိတ်မပြောရှာပါဘူး။ သမီးကိုတော့ နည်းနည်းပါးပါး ပြောပြသတဲ့...။ သမီးကလည်း စိတ်အဆင်းရဲတော့ သိတ်မခံနဲ့။ မနေနိုင်ရင် သူ့ဆီပြန်လာနေဖို့ ခေါ်သတဲ့။ ဒီလိုနဲ့ တော်တော်ကြာတဲ့တစ်နေ့တော့......
“ အစ်မ အိပ်မပျော်စားမ၀င်ဖြစ်နေတာ ကြာပြီမောင်လေးရယ်....။ ဖျားတာနာတာလည်း မဟုတ်ဘဲနဲ့ အစာစားပြီးတိုင်း ပြန်အန်ချင်တယ်။ အန်တဲ့အခါလည်း အန်တယ်။ နေ့တိုင်းအစာမကြေဖြစ်ပြီး အမြဲတမ်းရင်ခံနေတယ်။ အသက်ကြီးလာတော့ လေရောဂါဖြစ်လာတာ ထင်ပါရဲ့.....”
“ အစ်မ....မသက်သာရင် ရန်ကုန်ဆင်းလာပြီး ဆေးလာစစ်ပါလား...။ ကျွန်တော် စီစဉ်ပေးမယ်လေ...”
ဒါပေမယ့်.....လူတွေဟာ ကိုယ့်အကြောင်းနဲ့ကိုယ်၊ ကိုယ့်ဘ၀နဲ့ကိုယ်ချည်းပဲဆိုတော့ အနေဝေးတော့လည်း သွေးအေးသွား ကြတာပါပဲ။ ကျုပ်ဝန်ခံပါတယ်။ပါးစပ်ကသာ လောကွတ်လုပ်မိတာ..။ ကျုပ်သားတွေမြေးတွေနဲ့ တစ်နေ့တစ်နေ့ သံသရာလည်နေတာနဲ့..။ ကိုယ်ထိလက်ရောက်တော့ သွားမခေါ်ခဲ့မိပါဘူး။ ယောက်ဖနဲ့တူတူမတွေကလည်း အမကအိပ်ယာထဲ လဲလောက်အောင်မဖြစ်ပဲ ကောင်းတဲ့ အခါလည်း ကောင်းနေလိုက်...။ဖြစ်တော့လည်း အစာမကြေရင်ပြည့် ရင်ကယ်လောက်ပဲဆိုတော့ ဖိဖိဆီးဆီး ရောဂါမရှာဖွေမိဘူးပေါ့။ ရှာဖွေဖို့လည်း ဘယ်သူမှမတွေးဘူးလေ...။ ကဂျီကဂျောင်လုပ်လွန်းလို့ဆိုပြီး ဖုန်းဆက်တိုင်လို့တောင် သမီးက ဒေါသူပုန်ထနေသေးတယ်။
“ အဖေ....ကြီးမေကို ဒီပြန်ခေါ်ထားရအောင်။ နေမကောင်းယင်တော့ ဘယ်သူမဆို ဂျီတော့နည်းနည်းကျမှာပေါ့။
သူတို့အဖေ နေမကောင်းရင် ကြီးမေကဘယ်လိုပြုစုသလဲ။ ကြီးမေက လူနာပြုစုတဲ့နေရာမှာ သိတ်စိတ်ရှည်ယုယတာ.... သမီးအသိဆုံးပေါ့....။ သူနေမကောင်းတုန်း...နည်းနည်းပါးပါးတော့ သည်းခံကြမှပေါ့။ စိတ်မရှည် မပြုစုချင်ရင်လည်း သမီးတို့ခေါ်ထားကြစို့ အဖေရာ...။ ဒါပေမယ့်..ကြီးမေတစ်ယောက်တည်းပဲ တာဝန်ယူမှာနော်။ သူတို့အဖေ သူတို့ပြုစုပေ့စေ။”
သမီးကလူငယ်ဆိုတော့ စိတ်ဆတ်ပေမယ့် ကျုပ်ကတော့ လူကြီးမဟုတ်လား။ ထိန်းထိန်းသိမ်းသိမ်းပေါ့ဗျာ...။
xxxxxxxxxx
အဲ..တစ်နေ့မှာတော့ ယောက်ဖကဖုန်းဆက်လာတယ်။ အစ်မက ကျုပ်ကိုတွေ့ချင်လို့ ခေါ်ခိုင်းသတဲ့။ ကျုပ်တအား လန့်သွားတယ်။ အစ်မ တော်တော်များ ရောဂါသည်းနေလို့လားပေါ့။ ယောက်ဖကတော့ ပြောပါတယ်။
“ အရင်လိုအစားသိတ်မ၀င်ဘဲ အားနည်းနေရုံတင်ပါ။ စိုးရိမ်ရလောက်အောင်တော့ မဟုတ်ပါဘူး”....တဲ့။ ဘာပဲဖြစ်ဖြစ် သူတွေ့ချင်တယ်ဆိုမှတော့ သွားရမှာ....ကျုပ်တာဝန်ပေါ့။ သူ့ကိုမလိုလားတဲ့ လူတွေကြားမှာ အားငယ်ရှာတယ် ထင်ပါရဲ့ဗျာ။
သမီးကြီးကလိုက်ချင်ပေမယ့် သူ့သမီးအငယ်မ စာမေးပွဲဖြေနေရင်း တန်းလန်းဖြစ်နေတော့ ကျုပ်ကိုသေချာမေးတယ်။
“ သမီးကိုရော တွေ့ချင်တယ်မခေါ်ဘူးလား....”.....တဲ့။
“ အဲသလိုတော့ မပြောဘူးဟ။ အသည်းအသန်ဖြစ်တာတော့လည်း မဟုတ်လောက်ဘူး။ တရှောင်ရှောင်ဖြစ်နေတော့ အားငယ်တယ်ထင်ပါရဲ့။ သမီးတို့မှာကလည်း ကလေးတွေတစ်ဖက်၊ စီးပွားရေးတစ်ဖက်ဆိုတော့ တွေ့ချင်ပေမယ့် မခေါ်ရက်ဘူး ထင်ပါတယ်။ ဒီတော့...မြေးလေးစာမေးပွဲရှိယင်လည်း ငါ့သမီးစိတ်အေးအေးသာ နေခဲ့တော့။ အဖေတို့ တစ်ပတ်လောက်
နေပြီးရင် ပြန်လာခဲ့မယ်။ အဲဒီတော့မှ သမီးတို့ သွားကြပေါ့...သမီးကြီးမေကို သေချာပြောပြလိုက်ပါ့မယ်....”
သမီးက သူ့ကိုမမှာဘူး ဆိုတော့လည်း အကောင်းဖက်ကတွေးပြီး စိတ်အေးပုံရပါတယ်။
“ အမှန်က အပြုစုလိုနေတာပါ ဖေဖေရယ်။ အရင်တစ်ခါကလို စိတ်ကျရောဂါပဲဖြစ်ရမယ်။ ကြီးမေကို တစ်ခါတည်းသာ ကားနဲ့ဖြေးဖြေးမောင်းပြီး ခေါ်လာခဲ့ပါလား။ ဦးလေးကိုလည်းခေါ်လာခဲ့ပါလေ။ ဦးလေးမပါရင် ကြီးမေ စိတ်ဆင်းရဲနေပါဦးမယ်။ သမီးဆီပြန်ရောက်ရင် ကြီးမေစိတ်ချမ်းသာပြီး နေပြန်ကောင်းသွားမှာပါ....”
သမီးရဲ့စိတ်ကူးအတွေးဟာ ဖမ်းဆုပ်လို့မမိလိုက်တဲ့ တိမ်တွေလိုပါပဲ။
ခရီးကဝေးတော့ ညသန်းကောင်လောက်မှ အမတို့မြို့ ကိုရောက်တယ်။ ကျုပ်တို့လင်မယား ရောက်တဲ့ညမှာတော့ အစ်မဟာ...ထူထူထောင်ထောင်နဲ့ထထိုင်ပြီး ဖုန်းလှမ်းဆက်တဲ့ ကျုပ်သမီးနဲ့ စကားပြောနေလိုက်တာ...လူကောင်းအတိုင်းပဲ။ အသံကလည်း မာလို့၊ ရွှင်လို့ပဲ။ ကျုပ်တို့နောက်ကိုတော့ ခရီးပန်းတဲ့ဒဏ် မခံနိုင်မှာစိုးလို့ မလိုက်သေးဘူးတဲ့။
“ ကြီးမေမြေးလေး စာမေးပွဲပြီးမှ လာခဲ့မယ်နော်...” ....လို့ သူ့တူမကပြောတော့လည်း “ အေး...အေး...လာခဲ့နော်..”.တဲ့။
ပြုံးလို့ရွှင်လို့...။ ကျုပ်ဖျော်ပေးတဲ့ ကွေကာအုပ်ကိုသောက်လို့.....။ သူ့ယောင်းမနဲ့လည်း စကားတွေပြောလို့.....။
နောက်တစ်နေ့ မနက်လည်းရောက်ရော...ဆက်တိုက်အန်ပြီး သွေးပေါင်တွေကျတော့တာပဲ။ သတိလစ်ချင်သလိုပါ ဖြစ်လာတော့ ဆေးရုံကိုအမြန်တင်လိုက်ရတာပေါ့။ အားဆေးပုလင်းကြီးချိတ်၊ လိုအပ်တဲ့ဆေးတွေထိုးပေး၊ အောက်စီဂျင်ပေးနဲ့ သိတ်တော့မကြာပါဘူး။ သတိကောင်းကောင်းပြန်ရလာတယ်။
လူရှင်းသွားပြီး ကျုပ်နဲ့သူ နှစ်ယောက်ထဲလည်းကျန်ရော....သူ့ကိုယ်သူစိတ်မချလို့ထင်တယ်။
“ မောင်လေးရေ....တကယ်လို့ ငါတစ်ခုခုဖြစ်သွားရင်.....” လို့ အစချီပြီး မှာစရာရှိတာမှာတော့တာပဲ။ ကျုပ်ကလည်း
“ ဒါတွေလျှောက်မပြောပါနဲ့ အမရာ...။ အမနေပြန်ကောင်းလာမှာပါ...” ....ပေါ့။
တကယ်လည်း ဟိုတစ်ခါလိုပဲ ပြန်ကောင်းလာမယ်ထင်မိတယ်။ စိတ်ကျရောဂါကြောင့် အားနည်းနေတာလို့ပဲ ထင်မိတယ်။ အစ်မကိုယ်တိုင်လည်း လိုလိုမယ်မယ်သာမှာတာ...။ သူ့ကိုယ်သူသေမယ် သေချာပေါက်ထင်ပုံမရဘူး။ ကျုပ်သမီးကိုတောင် အရေးတကြီး မမှာမိဘူး။ ဆေးရုံတင်လိုက်တဲ့အကြောင်း.....၊ ဆေးရုံမှာဆိုတော့ ပိုစိတ်ချရတဲ့အကြောင်းတောင် ဖုန်းဆက်လိုက်မိသေး။
ညနေစောင်းလည်းရောက်ရော...ရုတ်တရက် အမောဖောက်ပြီး အခြေအနေဆိုးလာတယ်။ ကယောင်ကတမ်းနဲ့...“ မောင်လေးရေ... တို့အမေပစ်္စည်းတွေ..တို့အမေပစ္စည်းတွေ..”..လို့ ရွတ်နေလို့ ကျုပ်ယောက်ဖက ငိုသံကြီးနဲ့ “ ရီမေ...စိတ်ဖြောင့်ဖြောင့်ထားပါ။ မင်းပစ္စည်းတွေအကုန် ငါလှူပေးပါ့မယ်ကွာ....” .....လို့ ပြောလိုက်သေးတယ်။ အဲဒီညမှာပဲ အမ ဘ၀တစ်ပါးကို ပြောင်းသွားပါတော့တယ်။
xxxxxxxxxxx
“ သေပြီးတဲ့နောက်မှာ လူပြန်ဖြစ်လျှင်သော်လည်းကောင်း၊ တိရစ္ဆာန်ဘ၀တစ်ခုခုကို ရောက်သွားလျှင်သော်လည်းကောင်း၊ နတ်ဗြဟ္မာဗိမ္မာန်မှာ စံစားနေရလျှင်သော်လည်းကောင်း၊ ငရဲဘုံမှာ ခံစားနေရလျှင်သော်လည်းကောင်း၊ ကျန်ရစ်သူတွေက သူ့အတွက်ရည်ရွယ်ပြီး လှူဒါန်းတဲ့ကုသိုလ်တွေကို မရရှိနိုင်တော့ဘူး။ ဒါပေမယ့်....နာနာဘာဝ ပေတဘုံမှာရောက်နေရင်...
ဆိုလိုတာက အပ္ပါယ်လေးဘုံထဲက ပြိတ္တာဘုံမှာရှိနေခဲ့ရင်တဲ့....။ ဒီကုသိုလ်တွေကို ရနိုင်ပါတယ်။ သာဓုခေါ်နိုင်ပါတယ်တဲ့...။
သေခါနီးအချိန်မှာ တစ်စုံတစ်ခုကို စိတ်စွဲလန်းလို့ဖြစ်စေ၊ ပစ္စည်းဥစ္စာကို စိတ်စွဲလန်းလို့ဖြစ်စေ၊ ငါသေပြီးနောက်မှာ ငါ့ပစ္စည်းတွေ...ငါပေးချင်သူလက်ထဲမှ ရောက်ပါ့မလား။ ငါမပေးချင်တဲ့သူတွေကများ လက်ဝါးကြီးအုပ်သွားမလား....။
အဲသလို...စိတ်စွဲပြီးသေသွားရင်...မကျွတ်မလွတ်ဘဲ ဖြစ်တတ်ပါတယ်...တဲ့....”
တရားဟောတဲ့ဘုန်းတော်ကြီးက ကျုပ်တို့ရင်ထဲကခံစားချက်တွေကို သိနေလေသလား။ ဒါမှမဟုတ်...ကွယ်လွန်သူအတွက် ရည်ရွယ်လှူဒါန်းတာမို့လို့ပဲ ဒီတရားကို ဟောတာလား။ ကျုပ်ကတော့ ကြိတ်ပြီးမျက်ရည်ကျနေတဲ့ သမီးကိုပဲ ငေးကြည့်နေမိတယ်။
ကျုပ်မြေးလေး စာမေးပွဲပြီးတဲ့နေ့ဟာ အမကိုမီးသဂြိုင်္လ်တဲ့ နေ့ဖြစ်နေပြီလေ။ ဆေးရုံကနေ အိမ်ပြန်မသယ်တော့ဘဲ နောက်တစ်နေ့နေ့လည် ချက်ချင်းသဂြိုင်္လ်လိုက်တယ်။ မမှီတော့မယ့်အတူတူ ကလေးတွေအပင်ပန်းခံပြီး လိုက်မလာကြတော့နဲ့လို့ ကျုပ်ယောက်ဖကိုယ်တိုင်က ဖုန်းဆက်ပြီးတားတာနဲ့ သမီးတို့မောင်နှမတွေ မလာဖြစ်ကြဘူး။ အသုဘချတော့ တူ၊ တူမတွေ တစ်ယောက်မှ မျက်ရည်တောင်မကျကြလို့ ကျုပ်ကသမီးကို လက်ကိုင်ဖုန်းနဲ့ဆက်ပြီး နှစ်ယောက်သားဖုန်းနဲ့ အတူငိုခဲ့ရသေးတယ်။
တရားကျဖို့တော့ ကောင်းပါတယ်ဗျာ။ အမအသုဘကိစ္စပြီးတော့ အမမှာထားတဲ့ကိစ္စကို ကျုပ်ဘယ်လို ပြောရမှန်း မသိဘူး။ ပြောတုန်းက ကျုပ်နဲ့အစ်မနှစ်ယောက်တည်း...ဆိုတော့ ခုချိန်....ကျုပ်ပြောရင်လည်း ဘယ်သူမှယုံမှာမဟုတ်ဘူး။
ကိုယ့်ဖက်ကိုယ်ယက်တဲ့ လိပ်အဖြစ်ပဲ နာမည်ပျက်ရုံရှိတော့မပေါ့။ အမပစ်္စည်းကလည်း ဘယ်လောက်မှ ကျန်ခဲ့မှာမှမဟုတ်တာ....။
ဒီတော့.....အမမှာတာနဲ့ ခပ်ဆင်ဆင် “ ဘုရားမှာအကုန်လှူပေးဖို့ မှာသွားတယ်...” ...လို့ ကျုပ်ယောက်ဖကို အားလုံးရှေ့မှာ ပြောလိုက်တော့တယ်။ ဒီလိုဆိုရင်....အစ်မလည်းကျေနပ်မှာပါလေ....။ ကျုပ်လည်း အားလုံးရဲ့အမြင်စောင်းတာ မခံရတော့ဘူးပေါ့။
ဒီလိုကျတော့လည်း ယောက်ဖက ရှောရှောရှုရှုပါပဲ။
“ သူ့ပစ္စည်းက ဘယ်လောက်မှ မရှိပါဘူးကွာ။ ဘုရားသွားလှူပေးကြတာပေါ့....” .....တဲ့။
ဒါနဲ့ပဲ....အားလုံးလူစုံတက်စုံရှေ့မှာ အမသေတ္တာကို ဖွင့်လိုက်ကြတယ်။ ဘဏ်စာအုပ်ထဲမှာ ငွေတစ်သိန်းရယ်...၊ ငွေစုလက်မှတ်လေးငါးစောင်....စုစုပေါင်းတန်ဖိုး တစ်သိန်းကျော်ကျော်ရယ်...၊ သူဝတ်နေကျ ဆွဲကြိုး၊ ရွှေဘီးနဲ့ ပိုက်ဆံအနည်းအကျဉ်းရယ်..ဒါပဲတွေ့ရတယ်။ ထူးဆန်းတာဆိုလို့ အ၀တ်စလေးတွေကို ခေါင်းအုံးသေးသေးပုံစံ ချုပ်ထားတဲ့ ခေါင်းအုံးလေးတွေ အများကြီးပဲ.....။ ဘာတွေများလဲလို့ယူပြီး အထဲကိုဖွင့်ကြည့်လိုက်တော့....လား...လား...ရွှေဒင်္ဂါးတွေဗျို့။ ငါးမူးစေ့ရော...၊ တစ်ကျပ်စေ့ရော.....၊ ကျုပ်တစ်ခါမှ မမြင်ဘူးတဲ့ နှစ်ကျပ်စေ့တောင် တစ်စေ့ပါလိုက်သေးတယ်။ အားလုံးပေါင်းယင် သုံးဆယ့်နှစ်စေ့ရှိတယ်။ ကာလပေါက်ဈေးနဲ့ဆို သိန်းတစ်ရာနီးပါးပဲပေါ့။ ဒါကြောင့်လည်း သူ့အထုပ်လေးကိုအမက တယ်ဂရုစိုက်တာကိုး။
လူတွေအကုန် မှင်တက်နေချိန်မှာ ကျုပ်ကတော့....“ ဒီလောက် ပစ္စည်းတွေရှိရက်များ အမရာ....” ...လို့ပဲ
ကြိတ်မနိုင်ခဲမရ ရေရွတ်မိတော့တယ်။ ဟုတ်တယ်လေ။ သူ့မှာ ဒီလောက်ရှိတယ်မှန်းသိရင်...ဒီတူတွေ...တူမတွေ...ဘယ်လောက် ၀ိုင်းပြုစုလိုက်ကြမလဲ။ ဘယ်လောက်အနွံတာ ခံလိုက်ကြမလဲ။ ဘယ်လောက်စိတ်ရှည်လိုက်ကြမလဲ။ မိထွေးဆိုပြီး ဘယ်သူငြိုငြင် ရဲမလဲ။ အဒေါ်မှအဒေါ် အရင်းခေါက်ခေါက်ပေါ့။
အစ်မကလည်း ပြုစုတဲ့သဘောကောင်းတဲ့သူကို ပေးသင့်တာလေးပေး၊ လှူစရာရှိတာ လေးလည်းလှူပေါ့။ ခုတော့.....သေသာသွားလေရော....။ ဘာများပါသွားလို့လဲ။ ဘာများရသွားလို့လဲ။ မသေခင်ရော... ဘယ်မှာစံစား သွားရလို့လဲ။ ကျုပ်တို့အမေဆုံးခါနီးတုန်းက သူ့သေတ်္တာသော့ ပျောက်လို့ဆိုပြီး မေးတာကို ကျုပ်ဖျတ်ကနဲ သတိရမိတယ်။
“ ကဲ....မောင်လေးရေ....။ မင်းအမဆန်္ဒအတိုင်း တဖြေးဖြေးချင်း ငါခွဲလှူသွားပါ့မယ်ကွာ။ ရက်လည်ဆွမ်းသွတ် တော့လည်း ထည့်လှူကြတာပေါ့။ ဘဏ်စာအုပ်ကတော့ ဒီမြို့ကပဲကွ။ ငွေစုလက်မှတ်တွေကတော့ မင်းတို့ဆီနေတုန်း ကတည်းက ၀ယ်ထားတာဖြစ်မယ်။ ဒီမှာထုတ်လို့ရမှာ မဟုတ်ဘူး။ မင့်သမီးကို ထုတ်ခိုင်းပြီးလှူလိုက်ပေါ့ကွာ...”
ယောက်ဖပေးတဲ့ ငွေစုလက်မှတ်တွေကိုင်ပြီး ကျုပ်ဘာထပ်ပြောရမှန်း မသိတော့ဘူး။ ဒါတွေဘယ်လောက် တန်ဖိုးရှိရှိ ကျုပ်မမက်ပါဘူး။ ကျုပ်သမီးတုန်းကလည်း မမက်လို့မှ သူ့လက်ထဲရောက်နေတာတောင် ပြန်ပေးခဲ့သေးတာ...။ ဒါပေမယ့်...
အမမှာခဲ့တဲ့အတိုင်း တိတိကျကျမလုပ်နိုင်ရုံတင်မကပဲ ခပ်ဆင်ဆင်တူတာတောင် မလုပ်လို့တော့ ဘယ်ကောင်းမလဲ။
“ ကျုပ်တို့ ဘုရားသွားပြီး လှူရအောင်လေ....”
“ ဟ....မောင်ရ....။ ငါလည်းအသက်ကြီးပြီ။ သေခါနီးပါပြီကွာ....။ ဖြေးဖြေးချင်း လှူပေးပါ့မယ်ဆိုတာ...မယုံလို့လား..
ဒါတွေ...ငါစိတ်ထိခိုက်လွန်းလို့ လောလောဆယ် မကြည့်ပါရစေနဲ့တော့ကွာ....။ သိမ်းလိုက်ကြပါတော့.....”
သူတို့အဖေကို ပြာပြာသလဲ ဖေးမတွဲထူယင်း သေတ်္တာကို မြန်မြန်ပြန်ပိတ်လိုက်တဲ့ တူတွေတူမတွေကို ကြည့်ပြီး ကျုပ်သက်ပြင်းချမိတယ်။ အမွေဆိုတာ ပေးတိုင်းလည်းမရဘူး။ ထိုက်မှစံရတာပါလားလို့ သံဝေဂလည်းရမိတယ်။
xxxxxxxxxx
အိမ်ပြန်ရောက်တာနဲ့ သူ့အဒေါ်အကြောင်း နားထောင်ပြီး သမီးက၀မ်းနည်းပက်လက် ငိုကြွေးရှာတယ်။
“ နေစမကောင်းကတည်းက ဦးလေးရောကြီးမေကိုပါ ခေါ်ထားလိုက်ရင် ဒီ့ထက်မကတော့ အသက်ရှည်မယ်ထင်ပါရဲ့..” လို့ နောင်တစကားဆိုတယ်။ သမီးရဲ့အမေက “ ဒီလိုသာခေါ်ထားခဲ့ရင် အဲဒီပစ္စည်းတွေ နင်ပဲရမှာပဲ...” လို့ပြောတော့ သမီးကပြုံးတယ်။
“ ကြီးမေပစ္စည်းတွေ အဲသလောက်ရှိမယ်ဆိုတာ ဟိုတခါသမီးလက်ထဲ လာထည့်ကတည်းက အလေးချိန်ကို မှန်းမိပါတယ် အမေရယ်...။ သမီးနဲ့ထိုက်ရင် ဘယ်လိုနည်းနဲ့မဆို သမီးဆီရောက်လာမှာပဲလို့ တွေးမိပါတယ်။
ဒါကြောင့်လည်း ကြီးမေမခေါ်ဘဲနဲ့ သမီးအတင်းမလိုက်ချင်တာပါ။ ခုတော့....သမီးနဲ့မထိုက်လို့ မရတာမို့ အဲဒီအတွက်တော့ မတုန်လှုပ်ပါဘူး။ ကြီးမေကို သေခါနီးမပြုစုလိုက်ရတာကိုပဲ သမီးစိတ်ထိခိုက်တာပါ။ ကြီးမေက အကုန်လှူခိုင်းတာလည်း သိတ်ကောင်းတာပါပဲ။ ဒါပေမယ့် ဒီကိစ္စက ဇာတ်မျောကြီးတော့ ဖြစ်ပြီထင်ပါရဲ့....”
ကျုပ်ကတော့ အသိချင်ဆုံးကိစ္စကိုပဲ သမီးအခြေအနေ စိတ်ထိန်းနိုင်တာတွေ့မှ မေးရတော့တယ်။
“ သမီးကို ဟိုတစ်ခါ ကြီးမေက အထုပ်ပေးတော့ ဘယ်လိုခွဲတမ်းချပြီး မှာတာလဲဟင်.....သမီး....”
“ သူ့ပစ္စည်းတွေကို တစ်ဝက်က အပုယူပါတဲ့...။ ကျန်တစ်ဝက်ကို နှစ်ပုံပုံပြီး တစ်ပုံကိုဘုရားလှူပေးပြီး တစ်ပုံကို အဖေ့ကိုပေးပါတဲ့...အဖေ...”
သေချာပါပြီလေ။ အစ်မဟာ သေခါနီးကယောင်ကတမ်း ပြောမိပြောရာ ပြောတာမဟုတ်ပါဘူး။ ဟိုးအရင်ကတည်းက သူ စီမံကိန်းချထားပြီးသားပါ။ ဒါပေမယ့်....တကယ်သေခါနီးကျတော့ ကျုပ်တစ်ယောက်တည်းကိုပဲ မှာသွားတဲ့ ဒီစကားကို ကျုပ်အမှန်အတိုင်းပြောရင် ယောက်ဖရော....၊ တူ တူမတွေရော...ယုံကြမတဲ့လား။ လက်ခံကြမတဲ့လား။
ဒီလိုပဲ....သမီးကို ပြောပြရင်လည်း စိတ်မကောင်းဖြစ်ရုံကလွဲပြီး သမီးမှာ မစ္ဆရိယစိတ်တွေ ပွားများရမယ်။ ဆွေမျိုးအချင်းချင်းတွေ ပိုစိတ်ဝမ်းကွဲကြရမယ်။ ဒီတော့...ကျုပ် မယုတ်မလွန်စကားကိုပဲ ဆိုရတော့တယ်လေ...။
“ သူ့ပစ္စည်းအားလုံး....ဘုရားကို လှူပေးပါ...လို့ မှာသွားရှာတယ်....” ......လို့။
လိုက်နာတာ မလိုက်နာတာကတော့ ပစ္စည်းထိန်းသိမ်းတဲ့လူရဲ့ တာဝန်ဖြစ်သွားပြီပေါ့ဗျာ။ ဘာပဲဖြစ်ဖြစ်... အစ်မမှာတဲ့အတိုင်း တသွေမတိမ်းမဟုတ်ပေမယ့် မရိုးမစွဲစကားမို့ အစ်မကျုပ်ကို ခွင့်လွှတ်စေချင်ပါတယ်။
xxxxxxxxxx
သမီးက “ အိပ်မက် မမက်တာကြာပြီ အဖေ....” ....လို့ပြောလာတော့မှ....ကျုပ်လည်းအတူတူပဲလို့ စိတ်ထဲမှာ ကြိတ်ပြီး သက်ပြင်းရှိုက်မိတော့တယ်။........။
xxxxxxxxxx
ဝေ(စီးပွားရေးတက္ကသိုလ်)
ပန်းအလင်္ကာမဂ္ဂ္ဂဇင်း... September, 2008
