နှစ်သစ်မင်္ဂလာ ဆုမွန်လွှာ



ချစ်မိတ်ဆွေ စာဖတ်ပရိသတ်များ အားလုံး...
မင်္ဂလာနှစ်သစ်မှာ မင်္ဂလာတရားတော်နှင့်အညီ
မင်္ဂလာရှိစွာ ကြံစည်ပြောဆိုနေထိုင်ရင်း မင်္ဂလာယူနိုင်ကြပါစေရှင်...။
ဒီနေရာမှာ...ဒီလိုဆုတောင်းနေရုံနဲ့ မပြီးသေးဘူးဆိုတာ
ကျွန်မရော စာဖတ်ပရိသတ်ကြီးကရော သိကြပါတယ်နော်...။
ကျွန်မချစ်တဲ့ စာဖတ်ပရိသတ်ကြီးကို နှုတ်ဖျားကနေ ဆုတောင်းပေးရုံနဲ့ အားမရနိုင်တဲ့အတွက်
မင်္ဂလာတရားတော်နဲ့ ညီမညီ စီစစ်လေ့လာနိုင်ဖို့
ကျွန်မဖတ်ခဲ့ဖူးတဲ့ (၃၈)ဖြာ မင်္ဂလာတရားတော်ကို မျှဝေပြီး ကုသိုလ်ယူချင်ပါတယ်။


ဗုဒ္ဓမြတ်စွာဘုရား ဟောကြားတော်မူခဲ့တဲ့  နတ်လူအများလိုက်နာကျင့်သုံးအပ်တဲ့
( ၃၈ ) ပါးသော မင်္ဂလာတရားတော်တွေကတော့.....

ပေါင်းသင်းဆက်ဆံရေး မင်္ဂလာ ( ၃ ) ပါး
----------------------------------------------

        လူမိုက်ကို ဝေးစွာ ရှောင်ကြဉ်ခြင်း ၊
ပညာရှိကို ဆည်းကပ် ပေါင်းသင်းခြင်း ၊
ရိုသေပူဇော် ထိုက်သောသူကို ရိုသေပူဇော်ခြင်း



နေထိုင်ရေး မင်္ဂလာ ( ၃ ) ပါး
---------------------------------

        သင့်တင့်လျှောက်ပတ်သည့် အရပ်၌နေထိုင်ခြင်း ၊
ရှေးဘဝက ပြုခဲ့သည့် ကုသိုလ်ကောင်းမှုရှိုခြင်း ၊
လမ်းကောင်းလမ်းမြတ်၌ စိတ်နှလုံးကို မြဲမြံတည်တံ့စွာ ထားခြင်း



သင်ကြား၊ ဆည်းပူးရေး မင်္ဂလာ ( ၄ ) ပါး
----------------------------------------------

       ပညာဗဟုသုတကို လေ့လာရှာမှီးခြင်း ၊
အသက်မွေးဝမ်းကျောင်း အတတ်ကို သင်ကြားခြင်း၊
လူ့ကျင့်ဝတ်များကို ဆည်းပူးခြင်း ၊
အပြောအဆို၌ ချိုသာယဉ်ကျေးခြင်း


ပြုစုရေး မင်္ဂလာ ( ၃ ) ပါး
----------------------------

        မိဘကို လုပ်ကျွေးပြုစုခြင်း ၊
သားမယား စသည်တို့ကို ကြည့်ရှုစောင့်ရှောက်ခြင်း၊
အနှောင့်အယှက်ကင်းသည့် အလုပ်ကိုလုပ်ကိုင်ခြင်း ၊


လိုက်နာကျင့်သုံးရေး မင်္ဂလာ ( ၄ ) ပါး
-------------------------------------------

        ပေးကမ်း လှူဒါန်းခြင်း ၊
တရားဓမ္မကို ကျင့်သုံးခြင်း ၊
ဆွေမျိုး ဉာတိကို  ချီးမြှောက်ထောက်ပံ့ခြင်း ၊
အပြစ်ကင်းသည့် အမှုကို ပြုရခြင်း ၊


ရှောင်ကြဉ်ရေး မင်္ဂလာ ( ၄ ) ပါး
------------------------------------

        မကောင်းမှုကို အဝေးမှရှောင်ကြဉ်ခြင်း၊
တွေ့ကြုံလာသော်လည်း ကိုယ်နှုတ်ဖြင့် မလွန်ကျူးမိအောင် အထူးအားဖြင့် စောင့်စည်းခြင်း ၊
အရက်သေစာ သောက်စားမှုကို ရှောင်ကြဉ်ခြင်း ၊
ကုသိုလ်တရားတို့၌ မမေ့လျော့ခြင်း၊


စိတ်ထားမှန်ရေး မင်္ဂလာ ( ၅ ) ပါး
------------------------------------

        ရိုသေထိုက်သူကို ရိုသေခြင်း၊
မိမိကိုယ်ကို နှိမ့်ချခြင်း၊
လောဘ အပိုမလိုက်ဘဲ ရောင့်ရဲလွယ်ခြင်း၊
သူ့ကျေးဇူးကို သိတတ်ခြင်း၊
အခါအခွင့်အားလျှော်စွာ တရားဓမ္မအကြောင်းကို နာကြားခြင်း၊


သည်းခံရေး မင်္ဂလာ ( ၄ ) ပါး
--------------------------------

        သည်းခံနိုင်စွမ်း ရှိခြင်း၊
ဆိုဆုံးမရာတွင် လွယ်ကူစွာ နာခံခြင်း၊
သူတော်ကောင်း သူမြတ်ကောင်းတို့နှင့် တွေ့ဆုံခြင်း ၊
အခါအခွင့်အားလျှော်စွာ တရားဓမ္မ အကြောင်းကို ဆွေးနွေးပြောကြားခြင်း ၊


ခြိုးခြံရေး မင်္ဂလာ ( ၄ ) ပါး
-----------------------------

        ခြိုးခြံချွေတာခြင်း ၊
မေထုန်ရှောင်ကြဉ်၍ မြတ်သောအကျင့်ကို ကျင့်သုံးခြင်း ၊
သစ္စာလေးပါး တရားကို သိမြင်ခြင်း ၊
နိဗ္ဗာန်ကို မျက်မှောက်ပြုခြင်း ၊


စိတ်ထားခိုင်ခံ့ရေး မင်္ဂလာ ( ၄ ) ပါး
----------------------------------------

        လောကဓံတရားနှင့် တွေ့ရ ကြုံရသောအခါ စိတ်ဓါတ် မတုန်လှုပ်ခြင်း၊
စိုးရိမ်ကြောင့်ကြကင်းခြင်း၊
ကိလေသာ မြူကင်းစင်ခြင်း၊
ဘေးဘယာတို့မှ ကင်းဝေးခြင်း ၊
တို့ ဖြစ်ကြပါတယ်။



ကျန်ခဲ့တဲ့ နှစ်တွေမှာ အထက်မှာဖော်ပြခဲ့တဲ့ အချက်တွေထဲက
ဘယ်နှစ်ချက်နဲ့ ကိုက်ညီအောင် ကျွန်မတို့တတွေ ကျင့်ကြံနေထိုင်ခဲ့ပြီးပြီလဲဆိုတာ
ကိုယ့်ကိုယ်ကို ဝေဖန်သုံးသပ်ကြည့်ရအောင်လားနော်။

“မင်္ဂလာပါ... ”  “မင်္ဂလာရှိပါစေ...” လို့ ဆုတောင်းနေရုံနဲ့တော့
သောတအာရုံမှာသာ မင်္ဂလာရှိမှာပါ။


လောကအလယ်မှာ ကိုယ်ကိုယ်တိုင် မင်္ဂလာရှိဖို့နဲ့
မင်္ဂလာအပေါင်းနဲ့ ပြည့်စုံတဲ့ ပတ်ဝန်းကျင်၊ မင်္ဂလာအပေါင်းနဲ့ ပြည့်စုံတဲ့ မိသားစု၊
မင်္ဂလာအပေါင်းနဲ့ ထယ်ဝါကျက်သရေရှိတဲ့တိုင်းပြည်ကို ထူထောင်နိုင်ဖို့ကတော့
မင်္ဂလာရှိစေသော အတွေးအခေါ် အကြံအစည်များကို တွေးခေါ် ကြံစည်ကြရပါမယ်။
မင်္ဂလာရှိသော စကားများနဲ့လည်း ပြောဆို ဆွေးနွေးနိုင်ရပါမယ်။
မင်္ဂလာရှိသော အလုပ်အကိုင်များကိုလည်း  ရွေးချယ်ဆောင်ရွက်ကြရပါမယ်။

လူသားအားလုံး ကာယကံ၊ ၀စီကံ၊ မနောကံ သုံးပါးစုံညီအောင်
မင်္ဂလာတရားတော်နဲ့အညီ ကျင့်ကြံနိုင်မှလည်း
တစ်လောကလုံး မင်္ဂလာအပေါင်းနဲ့ ပြည့်စုံလာနိုင်မှာပါ။
ဗုဒ္ဓဘာသာဝင်ဖြစ်တဲ့ ကျွန်မတို့အနေနဲ့ ဗုဒ္ဓဘုရားရှင်ရဲ့
အဆုံးအမအလုံးစုံကို မလိုက်နာနိုင်ခဲ့ရင်တောင်မှ
အတတ်နိုင်ဆုံး ကျြိုးစား ဖြည့်ကျင့်သင့်လှတယ် မဟုတ်ပါလားရှင်။

ဒါကြောင့်မို့ ကျွန်မတို့အားလုံး  ပြည့်စုံပြီးသား မင်္ဂလာတရားတော်များကို
ဆက်လက်စောင့်ထိန်းပြီး၊ မပြည့်စုံသေးတဲ့ မင်္ဂလာတရားတော်များကိုလည်း
ဖြည့်ဆည်းလိုက်နာနိုင်အောင် ကြိုးစားရင်း....
နှစ်သစ်ကို မင်္ဂလာရှိရှိ ကြိုဆိုကြရအောင်လားနော်...။




ခင်မင်လေးစားစွာဖြင့်...
ဝေ(စီးပွားရေးတက္ကသိုလ်)




အဝေးရောက်...


       
      ဒီနေ့မနက်က နှင်းတွေ အရမ်းဝေတယ်မောင်။
      စောစောကြီးကဆို ကိုယ့်ရဲ့ရှေ့တစ်လံသာသာက လူကိုတောင် သဲသဲကွဲကွဲမမှတ်မိနိုင်ဘူးဆိုရင် ပိုတယ်လို့ မောင်ထင်မလားဘဲ။
      ကြည့်စမ်းပါဦး။ ဟောဟို ခပ်လှမ်းလှမ်းက တောင်တန်းပြာပြာကြီးတွေမှာ မြူခိုးတွေဝေ့၀ဲအုပ်ဆိုင်းလို့...၊
တောင်ထိပ်တစ်ဝိုက်မှာက ရေခဲစီးကြောင်းဖြူဖြူကြီးတွေကို နေရာအနှံ့မြင်နေရတာ ဘယ်လောက် သာယာလိုက်တဲ့ ရှုခင်းလဲကွယ်။
 ဘယ်ဘက်ကိုပဲ မျှော်ကြည့်လိုက် ကြည့်လိုက် တောင်တန်းပြာပြာတွေရယ်...၊ တောင်ယာစိမ်းစိမ်းတွေရယ်..၊
တောင်ခြေနားက မီးခိုးတလူလူ အူထွက်နေတတ်တဲ့ ယာစောင့်တဲ ရေးရေးလေးရယ်...၊ မြို့နံဘေးက
ကွေ့ဝိုက်စီးဆင်းနေတဲ့ မြစ်ရေကြည်ကြည်လေးရယ်....။
 ဒီလောက် နေချင်စဖွယ် သာယာအေးချမ်းတဲ့ မြို့လေးကို ရောက်လာရတာ... သိတ်ကို ကျေနပ်စရာပါပဲလေ။
မနက် ဆယ်နာရီကျော်နေပေမယ့် နှင်းက ကုန်စင်အောင် မကွဲချင်သေးဘူး။ ဟိုတစ်စု ဒီတစ်စုနဲ့ မှုန်မှုန် မှိုင်းမှိုင်း ရှိတုန်းပဲ။ နေရောင်ကိုမြင်ရဖို့ဆိုတာကတော့ ဝေလာဝေးပေါ့။ ဒီလို တောင်ပေါ်မြို့တွေ မှာ ဆောင်းရက်တွေဆိုတာ နေမမြင်ရတာက ခပ်များများပဲလေ။
လူတစ်ကိုယ်လုံး မြင်မကောင်းအောင် အနွေးထည်တွေ အထပ်ထပ်ဝတ်ထားတဲ့ကြားကတောင် ချမ်းစိမ့်မှု က ပြေပျောက်မသွားနိုင်ဘူး။ ရန်ကုန်သူအဖို့ တောင်ပေါ်ဆောင်းဟာ စောင်ထူထူ ဘယ်လောက်ခြုံခြုံ၊ မီးလင်းဖို နားဘယ်လောက်ကပ်ကပ်၊ အနွေးဓာတ် မလုံလောက်ပါဘူး။
    ချမ်းတတ်လွန်းတဲ့ ပန်းနုလို နုဖတ်ဖတ် မိန်းကလေးအဖို့မှာတော့... ခုလောက် ခံနိုင်ရည်ရှိဖို့တောင် အင်မတန်မှ ကြိုးစားခဲ့ရတယ်ဆိုတာ... ဘယ်သူမှ သိမှာမဟုတ်ပါဘူး။
     တကယ်လို့များ...မောင်သာ မေတ္တာရင်ငွေ့နဲ့ ထွေးထားနိုင်ခဲ့ရင်တော့......
     “ ကျွန်မအတွက် မောင်သာမရှိတော့ရင် ကျွန်မဘ၀ သေဆုံးသွားမှာပါ..” လို့ တဖွဖွပြောပြီး ခဏခဏ ပူပန်တတ်ခဲ့သူ၊ အားငယ်တတ်တဲ့ ကျွန်မ...။
     ခုတော့ ကျွန်မ မသေသေးပါလား မောင်ရယ်။ ကျွန်မဘေးနားမှာ မောင်လည်း ရှိမနေပါဘူး။ မောင်နဲ့ မိုင်ပေါင်းများစွာ ဝေးတဲ့ သိတ်ချမ်းအေးတဲ့ မြို့လေးတစ်မြို့မှာ ... အသက်ရှင် ကျန်းမာစွာ၊ တာဝန်ကျေပွန် သွက်လက်စွာ ကျွန်မရှိနေတယ်ဆိုတာသိရင် မောင် အံ့သြသွားမှာလားဟင်။
xxxxxxxx
 အိမ်ဘေး ထင်းရှူးပင်ထိပ်ဖျားကနေ လေအဝှေ့မှာ တစ်ခါတစ်ခါ ကျလာတတ်တဲ့ နှင်းရည်စက်လေးတွေ ကို နှစ်လိုဖွယ် မြင်နေရတယ်မောင်။
 ဒီအရပ်မှာကျတဲ့နှင်းဟာ မိုးမှုန်လေးတွေလိုပဲ။ သိပ်သိပ်သည်းသည်းကျတဲ့ နေ့ဆိုရင် နှင်းစက်ကျသံတွေ ကိုတောင် ဟိုမှသည်မှ ကြားရတတ်သေးတယ်လေ။
     ခုချိန်ဆိုရင် မောင်တစ်ယောက်ကတော့ စပို့ရှပ်လက်စကလေးနဲ့ နွေးနွေးထွေးထွေး ရှိနေမှာပါ။ အနွေးဓာတ် အလုံအလောက်ရှိနေမယ့် စတိုးဆိုင်ကြီးတစ်ခု အပေါ်ထပ်က မောင့်ရုံးခန်းထဲမှာပဲ ဖြစ်ဖြစ်၊ ဒါမှမဟုတ် မောင်ထိုင်တတ်တဲ့ နေရောင်အောက်က လက်ဖက်ရည်ဆိုင်လေးထဲမှာပဲ ဖြစ်ဖြစ်ပေါ့။ ကျွန်မနဲ့မောင် ဘယ်လိုလုပ် တူနိုင်ပါ့မလဲကွယ်။ မောင်ခံစားတည်ရှိနေရတာက ရန်ကုန်ဆောင်းပဲ မဟုတ်လား။
     “ ရန်ကုန်ဆောင်းက မအေးလှပါဘူးကွာ။ အိပ်ပုပ်ကြီးတဲ့ လူပျင်းတွေကိုသာ သိကြားမင်းက ဒဏ်ခတ်ပြီး ကွက်ချမ်းနေတာ..” လို့ အချမ်းပိုတတ်တဲ့ ၊ အိပ်ရာထနောက်ကျတတ်တဲ့ ကျွန်မကို မောင်က အဆက်အစပ်မရှိတာ၊ အဓိပ္ပါယ်မရှိတာ၊ ဘာညာမတွေးဘဲ သူလိုရာဆွဲပြောပြီး မခံချင်အောင် အမြဲ နောက်ပြောင်တတ်ခဲ့သေးတယ်နော်။
     အဲလို မောင်စတိုင်းလည်း ကျွန်မက စိတ်ဆိုးချင်ဟန်ဆောင်ပြီး ၀တ်နေကျ မောင့်လက်ဆောင် ဂျာကင်လေးကို ဆွဲချွတ်ပစ်လိုက်တာပဲ။ ဒါဆို မောင်က တဟားဟားနဲ့ အော်ရယ်ပြီး...
    “ ဟန်မဆောင်တတ်ဘဲနဲ့များ ဟန်မဆောင်ချင်စမ်းပါနဲ့ မဒေါသလေးရယ်...”  ဆိုပြီး အင်္ကျီကို ပြန်ဝတ်ပေးတတ်တယ်။
     တစ်ခါတစ်လေဆို မောင်နဲ့ကျွန်မ အင်းလျားကန်ဘောင်ပေါ်မှာ လမ်းလျှောက်ကြသေးတယ်။ သိတ်ချမ်းတတ်တဲ့ ကျွန်မက နှင်းတွေမြူငွေ့တွေကြားမှာ လမ်းလျှောက်ရတာကို အလွန်သဘော ကျကြောင်း ပြောတော့ မောင်က အံ့သြစရာလည်း မဟုတ်ဘဲနဲ့ အံ့သြသလို အမူအရာ လုပ်ပြပြီး ...“ အော်... အော်..” လို့ ပါးစပ်ကရေရွတ်၊ ခေါင်းကိုလည်း တဆတ်ဆတ်ညိတ်ရင်း အမြင်ကတ် စရာကောင်းအောင် ပြောင်နောက်နေပြန်ရော။
     မောင်ဟာလေ.. သိပ်ကို သွက်လက်မြူးကြွတဲ့ လူငယ်တစ်ယောက်ပါပဲကွယ်။
xxxxxxxx

    ခုဆို.... ကျွန်မ အိပ်ရာထ နောက်မကျတော့ဘူး မောင်။
     အရာရာကို မောင်နဲ့ပတ်သက်ခဲ့စဉ်တုန်းကနဲ့ လုံးဝခြားနားချင်လို့ တမင် ပြောင်းလဲစေခဲ့တာတော့ မဟုတ်ပါဘူးကွယ်။ ကျွန်မတို့ တောင်ပေါ်မြို့ကလေးရဲ့ မနက်ခင်း  ကြည်နူးစရာလေးတွေကို စွဲမက်လွန်းလို့ပါ။
     မနက်စောစော မိုးလင်းစဆိုရင် သာယာတဲ့ ငှက်သံလေးတွေကို အနီးကပ်ကြားရတတ်တယ်လေ။ ရန်ကုန်မှာတုန်းကလို ကားသံ၊ လူသံ၊ ကြော်လှော်သံတွေနဲ့ အလန့်တကြား နိုးထလာရတာမျိုးမဟုတ်ဘဲ အစာရှာထွက်ခါစ ငှက်ကလေးတွေရဲ့ သာယာသံမျိုးစုံနဲ့ နိုးထလာရတာ ဘယ်လောက် ချမ်းမြေ့စရာကောင်း လိုက်သလဲ မောင်ရယ်။ မြို့တွေမှာ မကြားရဖူးတဲ့ ( ဘာငှက်တွေမှန်းတော့ မသိဘူးမောင်) ငှက်သံလေးတွေ ဟာ စိတ်အစဉ်မှာ ညွတ်နူးပျော်ဝင်ရင်း တသိမ့်သိမ့် ကြည်နူးပီတိဖြစ်ရတယ်။
  ကျွန်မနဲ့ ဒေါ်လေးမေတို့ နှစ်ယောက်တည်းနေတဲ့ အိမ်သေးသေးလေးရဲ့ ဘေးက ထင်းရှူးပင်ပေါ်မှာပဲ ဖြစ်ဖြစ်၊ ခြံဝင်းလေးရဲ့ ရှေ့ခပ်လှမ်းလှမ်းက ချယ်ရီပင်ကြီးပေါ်မှာပဲ ဖြစ်ဖြစ်၊ ဒါမှမဟုတ်.. အိမ်ဝင်းရှေ့ လူသွားလမ်းလေးတစ်ခုပဲခြားတဲ့ မြစ်ဆိပ်ချောက်ကမ်းပါးထိပ်က ၀ါးရုံတွေထဲမှာပဲဖြစ်ဖြစ် ဘယ်အချိန် ကြည့်လိုက်ကြည့်လိုက် အနည်းဆုံး ငှက်တစ်ကောင်ကတော့ ရှိနေစမြဲပဲ မောင်။
    ငှက်တွေပေါလွန်းလို့ ဘာငှက်တွေမှန်းလည်း ကျွန်မ မမှတ်မိ၊ မခွဲခြားတတ်တော့ဘူး။ ဆူညံ အော်ဟစ် ပျံသန်းနေတဲ့ ငှက်ကလေးတွေမြင်ရင် ကျွန်မ သဘောတကျ ငေးမောနေတတ်ခဲ့တယ်။ တစ်ခါတစ်လေ တစ်ကောင်တည်း အဖော်ကွဲလာသယောင် သစ်ပင်တွေပေါ်မှာ တိတ်ဆိတ်ငြိမ်သက်စွာ နားနေတတ်တဲ့ ငှက်လေးတွေကိုမြင်ရင်တော့ ကျွန်မလည်း ကြေကွဲစွာ မောင့်ကို တမ်းတမိလာတယ်လေ။
     ဘာပဲဖြစ်ဖြစ်...တကယ်တော့ ကျွန်မ မောင့်ကို ချစ်ဆဲပါကွယ်။
   ကျွန်မကိုယ်ကျွန်မ လိမ်ညာထားခဲ့မိတာပါ။ အို...ဒီလိုတော့လည်း မဟုတ်သေးပါဘူး။ ထိန်းချုပ်ထားခဲ့တာလို့ ပြောမှမှန်မှာ...။
     ဟုတ်တယ်။ မောင့်ကို မုန်းလိုက်ပြီလို့ ဘယ်သူ့ကိုမှ ကျွန်မ မပြောခဲ့ဖူးသလို၊ မောင့်ကို မုန်းတယ်လို့လည်း တစ်ခါမှ ကျွန်မ တွေးမနေခဲ့ဘူး။ တကယ်တော့ ကျွန်မဘ၀မှာ မောင်ဆိုတဲ့ ချစ်သူယောကျာ်း တစ်ယောက်ကိုသာ အချစ်ခဲ့ဆုံး၊ အတွယ်တာခဲ့ဆုံး၊ တန်ဖိုးအထားခဲ့ဆုံး၊ အထင်ကြီးလေးစားခဲ့ဆုံး၊ ယုံကြည်အားကိုးခဲ့ဆုံး၊ ပြီးတော့... အပိုင်ဆိုင်ချင်ခဲ့ဆုံးပါပဲ မောင်ရယ်။
xxxxxxxxx
     ကျွန်မ သိပ်ကို အံ့သြတုန်လှုပ်ခဲ့ရတယ် မောင်။
  ဘယ်တုန်းကမှ မတွေးကြည့်ခဲ့ဖူးတဲ့ အခြေအနေဆိုးဟာ မထင်မှတ်တဲ့ အချိန်တစ်ခုမှာ ကျွန်မရင်ကို ပြင်းပြင်းထန်ထန် ထိုးနှက်လာလိမ့်မယ်လို့ ကျွန်မ သံသယ မရှိခဲ့ဖူးဘူး။
     မောင်နဲ့ကျွန်မ လမ်းခွဲဖို့ ဖြစ်လာခဲ့ရတယ်နော်။
    လမ်းစခွဲသူက ကျွန်မလို့ မောင်က စွပ်စွဲနေဦးမှာ...။
     အမှန်တော့လည်း မောင်က ထားရစ်ခဲ့တာမဟုတ်ဘဲနဲ့ ကျွန်မက နေရစ်ခဲ့မိတာပါလေ။
ဒါပေမယ့် လျှောက်လက်စလမ်းကနေ လမ်းသစ်ခွဲထွင် လျှောက်ရင်း ထွက်သွားခဲ့သူကတော့ မောင်ပါပဲ။ ဒါကိုတော့ မောင်ဝန်ခံရလိမ့်မယ် မောင်။
     မဟုတ်လို့လားလေ။
     မောင်နဲ့ကျွန်မ စိတ်တူကိုယ်တူ တည်ထောင်မယ် ဆုံးဖြတ်ထားတဲ့ အိမ်ထောင်စုလေးတစ်ခုအတွက်
နှစ်ယောက်စလုံး ကြိုးစားရင်း နီးစပ်လာချိန်မှာ မောင်ဘာလို့များ ကျွန်မ ခွင့်မလွှတ်နိုင်တဲ့ အပြစ်ကို ကျူးလွန်ခဲ့ရတာလဲ။
     မသိလို့ မှားမိတာပါလား ဆိုပြီး အပြစ်မယူရက်နိုင်လောက်တဲ့ အခြေအနေမှာလည်း မောင်ရှိမနေခဲ့ဘူး။ ကျွန်မ ခွင့်မလွှတ်တတ်တဲ့ အပြစ်မှန်း သိသိကြီးနဲ့ မောင်မှားယွင်းခဲ့တာပဲ မဟုတ်လား။
     ကျွန်မစိတ်ဓါတ်ကိုလည်း မောင်အသိဆုံးပါ။
     ကျွန်မဟာ အမှတ်သည်းခြေကြီးတတ်သူ၊ စိတ်ကြီးတတ်သူ၊ ကလဲ့စားချေတတ်တဲ့သူ တစ်ယောက် မဟုတ်ခဲ့ပါဘူးကွယ်။ အထူးသဖြင့် မောင့်အပေါ်မှာဆို စာနာတတ်၊ နားလည်တတ်၊ ခွင့်လွှတ်ကြည်ဖြူ တတ်ဆုံးဆိုတာ မောင်အသိဆုံးပါ။
     မောင် ရည်းစားတွေ အများကြီးထားပြီး ရှုပ်ပွေနေတယ်ဆိုရင်တောင်မှ ကျွန်မ အောင့်သက်သက်နဲ့ ခွင့်လွှတ်နေမိဦးမလား မသိဘူး။
     မောင့်ကို စွန့်လွှတ်ဖို့ဆိုတာ ကျွန်မ တစ်ခါမှ ရင်ဆိုင်ဖို့ မတွေးဝံ့တဲ့ ကိစ္စပဲလေ။
     ကျွန်မ မောင့်ကို သိပ်ချစ်ပါတယ်။
     ဒါပေမယ့် မောင်ရယ်.. ကျွန်မဟာ အစွဲအလန်းကြီးတတ်သူ တစ်ယောက်လည်း ဖြစ်ပါတယ်။
xxxxxxxxx

     ကျွန်မ မောင့်ကို ပြောပြဖူးတယ်မဟုတ်လား မောင်။
     လူမှုရေးဖောက်ပြန်တာတွေကို ကျွန်မ သိတ်မုန်း၊ သိတ်ကြောက်တယ် ဆိုတဲ့ အကြောင်းလေ။
     ကျွန်မရဲ့ ငယ်ဘ၀ရာဇ၀င်မှာ ဒီလူမှုဖောက်ပြန်မှုတွေကြောင့် အဆုံးစွန်ထိ ဆုံးရှုံးခါးသီးခဲ့ဖူးတယ်။ အဖြစ်အပျက်အားလုံးဟာ ကျွန်မအတွက် ဘယ်လိုမှ ပြင်ဆင်ပြောင်းလဲလို့မရမယ့် တစ်ယူသန် ကြောက်ရွံ့စိတ် ကို ဖြစ်စေခဲ့တယ်ဆိုတာ မောင်လည်း သိသားနဲ့ကွယ်။ မိသားစုတစ်ခုရဲ့ ဘ၀ပျက်တဲ့ ငရဲခန်းတွေကို ခုထက်ထိ စက်ဆုပ်စွာ နာကြည်းနေဆဲပါ မောင်။
     ဘ၀မှာ... ကြည်ညိုလေးစား အားကိုးချစ်ခင်ခဲ့ဆုံးပါလားလို့ ပြန်ပြီး ဆက်စပ်တွေးကြည့်မိတိုင်း သိတ်ကြေကွဲစရာကောင်းတဲ့ ဖေဖေ့မျက်နှာ၊ အိမ်ပေါ်ကို ဖေဖေနဲ့အတူ အရှက်ကင်းမဲ့စွာ မျက်နှာ ပြောင်တိုက် လိုက်လာရဲတဲ့၊ ကျွန်မတို့မိသားစု သာယာချမ်းမြေ့မှုတွေကိုယုတ်မာစွာ ပြုစားရက်ခဲ့တဲ့ ဖေဖေ့နောက်မိန်းမ၊ အံကို တင်းတင်းကြိတ်ရင်း မနည်းကြီးချုပ်တည်းထားပုံရတဲ့ မောင်လေးရဲ့မျက်နှာ၊ သဘောထားပြည့်ဝစွာ မချိတဲ့ ခွင့်လွှတ်ပြုံးတွေနဲ့ အားလုံးကို စိတ်လျှော့ကြေကွဲနေတတ်တဲ့ မေမေ့မျက်နှာ...။
     မကြည့်ရက်ခဲ့ဘူး မောင်ရယ်။
     ကျွန်မ မေမေ့မျက်နှာကို မကြည့်ရက်ခဲ့ဘူး။ နှလုံးရောဂါကြောင့် အိပ်ရာထဲက လုံးလုံးမထနိုင်တော့တဲ့
မေမေ့အသည်းနှလုံးတွေဟာ ငယ်ချစ်ဦး ဖေဖေ့ရဲ့ ရက်စက်တဲ့ လုပ်ရပ်တွေမှာ ဘယ်လောက်များ အလူးအလိမ့် ကြေကွဲနေရှာမလဲကွယ်။
      မေမေတို့ ဆုံးတဲ့နေ့ကဆိုရင်....
     အို... ကျွန်မအတွက် ဘယ်လိုမှ မေ့မရနိုင်တဲ့ အခြောက်လှန့်ခဲ့ဆုံး အဖြစ်တွေပါမောင်ရယ်။
      ဖေဖေက သူ့မိန်းမငယ်ရဲ့ တောင်းဆိုမှုကြောင့် မေမေ့ဘီရိုထဲက စိန်လက်ကောက်ကို ခဏငှားတယ်။ ဧည့်ခံပွဲတစ်ခုအတွက်တဲ့။
     မိဘအမွေအနှစ်ဆိုတော့ မေမေက အထိမခံချင်ဘူး ဒီကိစ္စနဲ့ အခြေအတင်ဖြစ်ရင်း ဖေဖေက မေမေ့ကို ဆွဲလားလွဲလား လုပ်နေတုန်းမှာပဲ အရက်သောက်ပြီး ပြန်လာတဲ့ ကျွန်မရဲ့ မောင်လေး ရောက်လာ ခဲ့တယ်လေ။
      အဲဒါဟာ ကျွန်မတို့မိသားစုအတွက် အဆုံးစွန်ဆုံး ကံကြမ္မာဆိုးပါပဲကွယ်။
     မောင်လေးဟာ အခြေအနေကို ဘာမှမမေးဘဲ အမေ့ကို သနားလွန်းတာရော၊ အရင်က မကျေနပ်မှုတွေ ချုပ်တည်းခဲ့ရတာရော၊ အရက်ရှိန်ရောပေါင်းပြီး ဖေဖေနဲ့ မိထွေးကို နပန်းဝင်လုံးတော့တယ်။
  အချိန်ခဏလေးအတွင်းမှာ အဖြစ်အပျက်ဆိုးတွေဟာ ဒီလောက်မြန်မြန်ကြီး ဆင့်ကဲဆင့်ကဲ ဖြစ်သွားမယ်လို့ ကျွန်မ မယုံကြည်နိုင်အောင်ပါပဲ။
လုံးထွေးရွေ့လျားရင်း ၀ရန်တာရောက်လာပြီး ဘေးဘက်ကနေ အရှိန်လွန်ပြုတ်အကျမှာ အောက်တည့်တည့် က ကျောက်ရေစည်နဲ့ ရိုက်မိတာကြောင့် ပွဲချင်းပြီး သေဆုံးသွားခဲ့တဲ့ ပထမဆုံးရှုံးမှုက ကျွန်မဖေဖေ။
     အဖြစ်အပျက်အားလုံးအပြီးမှာ သွားကြည့်တော့ အိပ်ရာပေါ်မှာ အေးစက်စပြုနေပြီဖြစ်တဲ့ ဒုတိယဆုံးရှုံးမှုက ကျွန်မမေမေ။
     တတိယဆုံးရှုံးမှုကတော့ ခြေဦးတည့်ရာထွက်ပြေးပြီး ခုထိ ပြန်မလာတော့တဲ့ ၀ရမ်းပြေး ကျွန်မမောင်လေးပေါ့ မောင်ရယ်။
     ကျွန်မ မုန်းခဲ့တယ် မောင်။
     လူမှုဖောက်ပြန်မှု၊ သွေးသားဖောက်ပြန်မှုတွေကို ကျွန်မ သိတ်မုန်းခဲ့တယ်။ ဒါပေမယ့် ကျွန်မ ယောက်ျားတွေကို အထင်သေးတယ်လို့ ၀ါးလုံးရှည်နဲ့ မရမ်းခဲ့ပါဘူးကွယ်။
      အဲဒီနောက်ပိုင်း မေမေ့ညီမ အပျိုကြီး ဒေါ်လေးမေနဲ့ အတူနေရင်း ကျွန်မဘ၀ကို တည်ငြိမ်အောင် ကျွန်မ သိပ်ကြိုးစားခဲ့ရပါတယ်။ တရားရိပ်ကို အဓိဌာန်ရက် အကြာကြီး ၀င်ခဲ့ဖူးတယ်။ စိတ်ဓါတ်ရေးရာစာအုပ်တွေ အများကြီး ဖတ်ပြီး စိတ်တင်းထားခဲ့ရတယ်။
     ဘာပဲဖြစ်ဖြစ် ကျွန်မ ရင်ထဲမှာတော့ တစ်ယူသန်စိတ်လေးတစ်ခု စွဲထင်ခဲ့ရတယ်။ ဒါဟာ... လူမှုဖောက်ပြန်တတ်သူတွေကို ခွင့်မလွှတ်နိုင်တဲ့ စိတ်ပါပဲ မောင်ရယ်။
      မောင်လည်း မသိတာမှ မဟုတ်ဘဲကွယ်။
      ကျွန်မအကြောင်းတွေကို မောင် အတွင်းကျကျ သိထားတာပဲ။ မောင်နဲ့ကျွန်မ မေတ္တာမျှခဲ့ကြတာ အချစ်တစ်ခုတည်းမှ မဟုတ်ဘဲ မောင်။ ကျွန်မအပေါ်မှာ မောင် သိတ်နားလည်တတ် ခဲ့တယ်။ မောင့်အပေါ်မှာလည်း ကျွန်မ ကြင်နာ လိုက်လျောနိုင်ခဲ့တယ်။
      ကျွန်မ ကိုယ်ရည်သွေးတာတော့ မဟုတ်ပါဘူးမောင်။ ကျွန်မရဲ့ စိတ်နေစိတ်ထားမှန်တာကို မောင် သဘောကျ မြတ်နိုးခဲ့တာပဲ မဟုတ်လား။ ကျွန်မကလည်း မောင့်သိက္ခာ၊ ကိုယ်ကျင့်တရား မှန်ကန်မှုကို သိတ်တန်ဖိုးထား လေးစားမိခဲ့တယ်လေ။
     မောင်ဟာ ကျွန်မရဲ့ အားနည်းချက်ကိုလည်း သိလျက်နဲ့ လုပ်ရက်ခဲ့တယ်နော်။
ကျွန်မ မယုံကြည်နိုင်လောက်အောင်ကို အံ့သြတုန်လှုပ်ခဲ့ရပါတယ် မောင်။
xxxxxxxxx

     တကယ်တော့ မောင့်ကို ကျွန်မ စွန့်ခွာရဲခဲ့တာ သတ္တိရှိလွန်းလို့တော့ မထင်လိုက်နဲ့မောင်။
ကျွန်မ သတ္တိနည်းလို့ကို မောင်နဲ့ ဒီလောက်ဝေးအောင် လွင့်ခဲ့မိတာပေါ့ကွယ်။
     ဒီကိစ္စကို ဒီလောက်မဖြစ်သင့်ဘူးလို့ ဘယ်သူတွေကများ ကျွန်မကို အပြစ်တင်ကြမလဲ မသိဘူးနော်။
လူတစ်ယောက်မှာ အစွဲအလန်းတစ်ခုတော့ ရှိတတ်မှာပဲလေ။
     မောင် တစ်ကြိမ်တစ်ခါပဲ ချွတ်ချော်မှားယွင်းခဲ့တာမှန်း ကျွန်မသိပါတယ်။ မောင့်ကို ကျွန်မ အပြစ်မတင်ပါဘူး။ မုန်းလည်း မမုန်းဘူး။ မောင့်ကို သိတ်ချစ်ခဲ့၊ သိတ်ချစ်နေဆဲ ဆိုတာကိုတော့ မောင် အကြွင်းမဲ့ ယုံပါ။
     ဒါပေမယ့် မောင့်ကို ကျွန်မ လက်မတွဲနိုင်တော့ဘူးကွယ်။
     ကျွန်မ သိတ်ကြေကွဲသွားရတယ်။ ကျွန်မ မောင့်ကို အထင်ကြီးလို့ မရတော့ဘူး မောင်ရယ်။
     မောင့်အပြစ်ကို မောင်ဝန်ခံပြီးတဲ့နေ့ရဲ့ ညဘက်မှာပဲ မောင့်ကို ကျွန်မ စွန့်ခွာခဲ့တယ်။ မောင်မသိအောင်၊ ဘယ်သူမှလည်း မသိအောင် ဒေါ်လေးမေနဲ့ နှစ်ယောက်တည်း ရန်ကုန်မြေနဲ့ မောင့်ကို အပြီးတိုင်ဆုံးဖြတ်ပြီး ကျောခိုင်းခဲ့ရတယ်။
    မြစ်ကြီးနားမှာရှိတဲ့ သူငယ်ချင်းတစ်ယောက်ကနေ တစ်ဆင့် မြို့လေးတစ်မြို့မြို့မှာ အလယ်တန်းပြ အလုပ်ရအောင် စောင့်ပြီး ခုလို ဒီကို  ရောက်နေတာပေါ့ကွယ်။
    အအေးသိပ်ကြောက်တဲ့ ကျွန်မဟာ ဒီဘက်ထိလွင့်လာမယ်လို့ မောင်ဘယ်လိုမှ တွေးမိမယ်မထင်ဘူး။ ဒီိလို အသိကြောင့်လည်း ကျွန်မကြောက်တဲ့ အအေးဓာတ်ကို ရင်ထဲကအပူနဲ့ တုပြိုင်စိန်ခေါ်ခဲ့တာပေါ့။
    ကျွန်မ သိနေတယ်မောင်။
    မောင်နဲ့အတူ တစ်မြို့တည်းမှာ ရှိနေရင် မောင်ကျွန်မကို မရမက တောင်းပန်နေမယ်ဆိုတာလေ။ မောင်က ဇွဲကောင်းတယ် မဟုတ်လား။ မောင့်ကို မြင်နေရရင် ကျွန်မလည်း ဘယ်လိုမှ စိတ်တင်းနိုင်မှာ မဟုတ်ဘူး။ ဒါကြောင့်မို့ မောင်နဲ့ဝေးဝေးနေဖို့ ကျွန်မ ဆုံးဖြတ်ခဲ့ရတယ်။
     မောင်မပါတော့တဲ့ ကျွန်မဘ၀သစ်မှာ ကျောင်းသင်ခန်းစာတွေနဲ့ ကျောင်းသားတွေအပေါ် သံယောဇဉ်မျှဝေရင်း ကျွန်မ နေပျော်အောင် ကြိုးစား အသက်ရှင်နေတယ်လေ။
     ကျွန်မဘေးမှာ မောင် ရှိမနေနိုင်တော့ပေမယ့် ကျွန်မ အသက်လည်း မဆုံးခဲ့ဘူး။
ဘ၀ကိုလည်း အရှုံးမပေးနိုင်ပါဘူး။
ပြီးတော့ မောင့်ဆီကိုလည်း ဘယ်တော့မှ ပြန်လာမယ် မဟုတ်ဘူးကွယ်....။
xxxxxxxx

ဝေ(စီးပွားရေးတက္ကသိုလ်)
၁၉၉၁၊ ဇန်န၀ါရီလ...ကလျာမဂ္ဂဇင်း(၆နှစ်ပြည့်အထူးထုတ်)

သင်္ခါရ (သို့မဟုတ်)........



နှင်းဆီ....
ပွင့်နီနီ အလွှာထပ်
မြတ်နိုးအပ်ပါတဲ့ ၀တ်ဆံမှုန်
သင်းပျံ့ပျံ့ထုံ။

ဆူးခက်က၀န်းခြုံ
ပန်းရုံဝယ် ပနံတင့်ပါဘိ
လေအလာ ဘယ်ညာတိမ်းကာ
ယိမ်းနွဲ့ကခုန်။

သက်တမ်းရယ်ကုန်
ပန်းပွင့်နီ ပင်ယံကိုင်းမှာ
ညှိုးမှိုင်းကာမှုန်။

လေရူးသုန်သုန်
ပန်းရုံပေါ် ထိအနမ်း
နွမ်းနယ်နယ် ပန်းငယ်ကြွေရှာပေါ့။
ခင်ငေးကာ သံဝေဂနဲ့
ထင်ပေါ်ခဲ့ စိတ်အာရုံ
မမြဲပါ သင်္ခါရရဲ့
(အော်....)
နိမိတ်ပုံ...။


ဝေ
၁၉၉၀ခုနှစ် ( နှင်းဆီဆောင် နံရံကပ်စာစောင် ပထမဆု)

တွေဝေနှလုံးသား



      ယတိပြတ် ဆုံးဖြတ်ချက်ကြောင့် ရင်ထဲတွင် အနည်းငယ် ပေါ့ပါးသွားသယောင် ရှိသည်။ တစ်ပြိုင်နက်တည်း၌ ပို၍လေးလံသယောင်လည်း ထင်မိပြန်သည်။
      ဆန့်ကျင်ဘက် ခံစားချက်နှစ်ခု အားပြိုင်မှုကြောင့် နှလုံးသားသည် ဆို့နင့်မွန်းကျပ်လျက်ရှိသည်။
   စီးနေကျ မိကျောင်းစက်ဘီးကို အိမ်ထဲမှထုတ်နေချိန်မှာပင် မိမိစိတ်သည် တွေဝေနေမှန်း သတိထား မိသည်။  ခြေနင်းခုံပေါ်မှ ခြေထောက်အစုံသည် တာဝန်ကျေပွန်စွာ စည်းချက်မှန်မှန် လှုပ်ရှားနေကြသော် လည်း စိတ်အစဉ်သည် ခြေနင်းပေါ်တွင် မရှိချေ။
      စက်ဘီးလက်ကိုင်ပေါ်တွင်လည်း မရှိ။ ယာဉ်မျိုးစုံ၊ လူမျိုးစုံ ဥဒဟိုသွားလာနေသော လမ်းမပေါ်တွင်လည်း မရှိခဲ့ပါချေ။
      အိမ်မှထွက်မလာခင်ကပင် ကျွန်မ၏စိတ်အစဉ်သည် အသည်းနင့်အောင်ချစ်ရသော...
“သူ” ၏ရက်စက်ခြင်း၊ မယုံကြည်နိုင်ခြင်း၊ နှမြောခြင်း၊ ကြေကွဲခြင်းများအလယ်တွင် တ၀ဲဝဲနှင့် ရှိနေခဲ့သည်။
      အခုမှ မဟုတ်ပါဘူးလေ။ ပူလောင်ကျွမ်းမြေ့မတတ် ခံစားချက်တွေနဲ့ ဒီသောကတွေကို ကျွန်မ မျိုသိပ်ခံစားခဲ့ရတာ တစ်ပတ်တိတိရှိခဲ့ပြီပဲ။
      ထိုတစ်ပတ်မျှကာလသည် ပူဆွေးရသူ ကျွန်မအဖို့ ကမ္ဘာနှင့်ချီကာ ရှည်ကြာသည်ဟု ထင်နေမိသည်။
တကယ်တော့... ဒီလောက်ကြာကြာ ကြိတ်မှိတ်ခံစားနေတာမျိုး ကျွန်မဘ၀၌ မရှိခဲ့ဖူးပေ။
ပြဿနာကို ပွင့်ပွင့်လင်းလင်း ဖြေရှင်းသင့်သည် မဟုတ်လား။
     ကျွန်မကိုယ်၌ကလည်း နဂိုဗီဇကပင် ပွင့်လင်းတတ်သူ၊ မျိုသိပ်မထားတတ်သူ တစ်ယောက်ဖြစ်ပါလျက်
ဒီတစ်ကြိမ်တော့ ကျွန်မအတွေးအခေါ်များ ထူးဆန်းစွာ ပြောင်းလဲသွားရသည်။  မျိုသိပ်ထားရခြင်းသည် အပင်ပန်းဆုံးဟု ယူဆသူကျွန်မအဖို့... မျိုသိပ်ထားတာက ပို၍သက်သာမည်ဟု တွေးမိသည်ဆိုလျှင် ရယ်စရာများ ဖြစ်နေမလား။
      ကျွန်မကတော့ မရယ်နိုင်ပါ။ မငိုမိအောင်ပင် မနည်းကြီး ထိန်းနေရသည်။
ယခုလိုအချိန်မှာတော့ လောကကြီးသည် ငိုချင်စရာကောင်းသော အရာများနှင့်ပြည့်နှက်နေသည်ဟု ထင်နေမိသည်မှာ ကျွန်မအမှား မဟုတ်နိုင်ပါ။
xxxxxxxx

       အမှန်ပင် လောကကြီးသည် သာယာမှုအပေါင်း ဆိတ်သုဉ်းသွားခဲ့လေပြီ။
      ကျွန်မကို ရယ်မောအောင် အမြဲ နောက်ပြောင်တတ်သော ကျွန်မချစ်သည့် “သူ”သည်လည်း ကျွန်မ မျက်ရည်မကျအောင် စွမ်းဆောင်နိုင်တော့မည် မထင်ပါ။
      သူ ကျွန်မကို ပစ်သွားပြီတဲ့လား။
     တကယ့်ကို ထားရစ်ခဲ့ပြီလား။
     မသေချာပါ။
     ကျွန်မဘက်က သူ့အပေါ်မပြောင်းလဲတာ သေချာပေမယ့် သူ့ဘက်က...။
     ဒါကို ကျွန်မ သိချင်ပါသည်။ သူ့ဘက်က သဘောထားကို ထင်ရှားစေချင်သည်။ ရင်ထဲကပုစ္ဆာကို အဖြေရှာပစ်ချင်သည်မှာလည်း ပြောဖွယ်ရာမရှိ။
     သို့သော်.. ကျွန်မ သူ့ကိုမမေးရဲပါ။ သူ့နှုတ်မှ ထွက်လာမည့်အဖြေစကားသည် ကျွန်မ ရင်မဆိုင်ရဲသော အခြေအနေကို ရောက်စေခဲ့လျှင် မခက်ပါလား။ ကျွန်မခံနိုင်ရည်ရှိမည် မထင်ပါ။
     ထို့ကြောင့်ပင် တစ်ယောက်တည်း ကြိတ်မှိတ်မျိုသိပ်နေခဲ့မိသည်။ ထွက်ပေါက်ကို လိုက်ရှာလိုစိတ်လည်းမရှိ။ သောကပင်လယ်အတွင်းတွင်သာ ပင်ပန်းကြီးစွာ ကူးခပ်နေခဲ့မိလေသည်။
     ခုတော့... ကျွန်မ ဆုံးဖြတ်ချက်တစ်ခု ချလိုက်ပြီ။ သူ့ကိုတွေ့ပြီး မျက်နှာချင်းဆိုင် ဖြေရှင်းပစ်တော့မည်။ သူ့ထံမှအဖြေကို အပြုံးမပျက် နားထောင်နေလိုက်မည်။ သူထွက်သွားခဲ့သည် မှန်သော်လည်း ကျွန်မ နှလုံသားသည် အပြောင်းအလဲ အကြေအကွဲ မရှိစေရ။
      အားငယ်စိတ်အောက်တွင် သေးနုပ်တိမ်မြုပ်နေခဲ့သော ကျွန်မ၏မာနများ ရုတ်တရက် နိုးကြွလာကြသည်။
ဒီလို တစ်ယောက်တည်းကြိတ်ခံစားနေတာ သိတ်အဓိပ္ပာယ်မရှိ။ ရဲရဲတင်းတင်း ပြတ်ပြတ်သားသား ရင်ဆိုင်ရမည်။ အရှုံးကိုဖြစ်ဖြစ်၊ အမှန်တရားကိုပဲဖြစ်ဖြစ်ပေါ့။
      တစ်ခုတော့ရှိသည်။ သူနှင့်တွေ့စဉ် ကျွန်မ၏ မျက်နှာထားကို ဘယ်လိုထားရမည်နည်း။
လေသံကိုရော....။
      သူ့ရှေ့တွင် မာကြောစိမ်းပြတ်သောအသွင်ဖြင့် ကျွန်မ မနေတတ်ပါ။ ခံစားမှုမဲ့သလိုလည်း ဟန်ဆောင်နိုင်မည်မထင်။ ညှိုးညှိုးငယ်ငယ်လည်း မနေချင်။ ကျွန်မမျက်ရည်ကြောင့်တော့ သူ့ကို မတွေဝေစေချင်ပါ။
      မေးပြီးပြီ ထားပါတော့။ သူ့အဖြေကို ဘယ်လို မျက်နှာပေးနှင့် ကြားနာရပါမလဲ။
“ဟုတ်တယ်... မင်းကြားတာတွေ အကုန်မှန်တယ်...” လို့များ သူ ဆိုခဲ့ရင်... ကျွန်မ မည်သို့ ရပ်တည်ရပါမည်နည်း။
      သူ့ကို ကျွန်မ စွန့်လွှတ်ရဲပါ့မလား။
“ အို..ဟင့်အင်း..ဟင့်အင်း...”
      ယောင်ယမ်းပြီး ခေါင်းခါလိုက်မိ၍ စက်ဘီးလက်ကိုင် ယိုင်သွားပုံရသည်။ လမ်းဘေးထိုးကျသွားသော စက်ဘီးကို ပြန်ထိန်းရင်း ရင်ထဲမှာ လပ်ဟာနေရသည်။ သူနှင့်ဝေးရမည်ကို စိုးသောစိတ်သည် အမြဲခြောက်လှန့်နေခဲ့သည်မှာ သူနှင့်ချစ်ပြီးစမှ ခုချိန်အထိ နှစ်နှစ်တာအတွင်း မပြေလျော့သေးပေ။
      ကျွန်မ သူနှင့်ဝေးမနေချင်တာကို သူမသိလို့လားကွယ်။
     သူနဲ့ဝေးရမည့်အကြောင်းကို စိတ်ကူးနဲ့တောင် ကျွန်မ တွေးမကြည့်ချင်ခဲ့ဘူး။ အိပ်မက်ထဲလည်း ထည့်မမက်ချင်ဘူး။ ကျွန်မသူ့ကို ဘယ်လောက်ချစ်တယ်ဆိုတာ သူအသိဆုံးပါ။ ကျွန်မ သူ့အပေါ် ဘယ်အထိ တွယ်ငြိတယ်ဆိုတာလည်း သူ အသိဆုံးပါ။ ကျွန်မအကြောင်း အားလုံး သူ အသိဆုံးပါ။ ကျွန်မ သူ့ကို မစွန့်လွှတ်ရဲဘူးဆိုတာကိုလည်း သူ အသိသင့်ဆုံးပါ။ နောက်ပြီး...
      ချည်နှောင်ထားခဲ့တဲ့ သံယောဇဉ်ကြိုး အထူစားကြီးကိုလည်း သူ ငဲ့အကြည့်သင့်ဆုံးပဲ မဟုတ်လားကွယ်။
xxxxxxxx
 သူငယ်ချင်းတစ်ယောက် သယ်ဆောင်လာတဲ့ သတင်းဟာ ကျွန်မကို အကြီးအကျယ် တုန်လှုပ်စေခဲ့ပါသည်။ သက်ရှိလူသားတစ်ယောက်ဘ၀ကို စက္ကန့်အတော်ကြာကြာ မေ့လျော့နေခဲ့မိသည်။
      ကျွန်မ၀ိညာဉ်တွေ ဘယ်ရောက်သွားပြီိလဲ။
ဖြစ်နိုင်၊ မဖြစ်နိုင်ဆိုသော ဒွိဟစိတ်ကို ဦးနှောက်ထဲတွင် အပြေးအလွှား အဖြေရှာရင်း အသက်ရှူကျပ်လာသည်။ ကျွန်မရှေ့ အအေးဖန်ခွက်ထဲမှ သောက်နေကျသံပုရာရည်သည် မကြုံစဖူး ဆန်းကြယ်စွာ ပူလောင်နေခဲ့သည်။
“ နင် စိတ်တော့ထိန်းပေါ့ဟာ။ ငါ့အနေနဲ့ အသိပေးသင့်တယ်ထင်လို့ ပြောရတာပါ။ လူမော်... ကောင်မလေးတစ်ယောက်နဲ့ တွဲနေတယ်လို့ ကြားတာကြာပြီ။ ခု...ငါကိုယ်တိုင် တွေ့လာခဲ့ရလို့ နင့်ကိုလာပြောတာ။ နို့မို့ဆို ငါတောင်မယုံခဲ့ဘူး သူက နင့်ကို သိတ်ချစ်တယ်မို့လား။ ဒီတော့...”
      သူမ၏ စကားသံသည် ကျွန်မနားထဲတွင် ဝေး၍ဝေး၍သွားသည်။ ထာဝစဉ်ပြုံးရွှင်နေတတ်ခဲ့သော အထက်သို့ ကော့တက်နေသည့် နှုတ်ခမ်းနှစ်လွှာ အဘယ်ကဲ့သို့ ပြေလျော့သွားမှန်း မသိလိုက်။
     လက်ထဲမှ ဆော့ကစားနေဆဲ ဘောပင် ကြမ်းပြင်ပေါ်သို့ လွတ်ကျသံထက် အဆပေါင်းများစွာသော
အသံလှိုင်းတုန်ခါမှုများ နားစည်အမြှေးပါးသို့ ပြင်းထန်စွာ ရိုက်ခတ်မြည်ဟည်းနေကြသည်။
     သူမ ဆက်ပြောသောစကားများထက် သူ့မျက်နှာနုနုသည်သာ ကျွန်မအာရုံထဲတွင် လွှမ်းမိုးဝင်ရောက်လာသည်။ ရင်ထဲရှိအရာများ ပျောက်ဆုံးသွားသကဲ့သို့ လပ်ဟာနေသော ခံစားချက်ကြောင့် ရင်ကို လက်ဖြင့် ယောင်ယမ်းကာ ဖိမိသည်။
     ဘေးပတ်ဝန်းကျင်မှ စကားပြောသံများ၊ ရယ်မောသံများ၊ ကက်ဆက်သံများ၊ ကြော်သံလှော်သံများ
သည်လည်း တိုးတစ်လှည့်၊ ကျယ်တစ်လှည့်။ ခြေထောက်အောက်မှ မြေကြီးသည်လည်း ယိမ်းယိုင်လှုပ်ရှား နေသလိုလိ်ု....
“ ပန်းနု.. ပန်းနု သတိထားလေ၊ ကင်တင်းထဲမှာ....”
     နံဘေးမှ သူငယ်ချင်း၏ အသံကြောင့် သတိလက်လွတ်ဖြစ်စ စိတ်ကို ကြိုးစား၍ ထိန်းချုပ်လိုက်ရသည်။
အိမ်သို့ မည်သို့မည်ပုံ ပြန်ရောက်လာခဲ့သည်ကို မမှိတ်မိတော့ပါ။ ခုတင်ထက်တွင် ကိုယ်ကိုမှောက်၍
ခေါင်းအုံးကို မျက်နှာအပ်လိုက်စဉ် ရှိုက်သံသည် ကျွန်မနှုတ်ဖျားမှ ထွက်ကျလာသည်။
      တစ်ချက်...၊ နှစ်ချက်...၊ သုံးချက်...။
      ပါးပြင်ပေါ်သို့ လက်ဖြင့် အသိမဲ့စွာ စမ်းမိသည်။ မျှော်လင့်ထားသော ပူနွေးသည့် မျက်ရည်စများ ရှိမနေခဲ့။
     မျက်ရည်မကျသော ရှိုက်ငိုခြင်းဖြင့် ငိုမိပါပကော။
     ရင်ခွင်မှ စူးအောင့်မှုနှင့်အတူ တည်ချောင်းဝတွင် တစ်ဆို့နေသည်။ ရင်ထဲမှ ခံစားချက်နှင့် စီးမကျသော မျက်ရည်များကြောင့် ကျွန်မကိုယ်တိုင် ဇဝေဇ၀ါဖြစ်သွားရသည်။
     ဘာဖြစ်တာပါလိမ့်။ ဒါဟာ... အချစ်စစ် မဟုတ်လို့လား။ သူ့ကို ကျွန်မ မချစ်ခဲ့လို့လားဟင်...။
      အို... မဖြစ်နိုင်တာ။ ကျွန်မ သူ့ကို သိတ်ချစ်ခဲ့သည်။ သိတ်တွယ်တာခဲ့ရသည်ပေါ့။ သူ့အကြည့်တွင် စတင်တွယ်ငြိမိစဉ်က စွဲလမ်းခဲ့ရသော သူ့ပုံရိပ်များသည် အမှတ်ထင်ထင် ရှိဆဲပင်ဖြစ်သည်။
      ရှည်သွယ်သောကိုယ်ကို မသိမသာကိုင်း၍ ပန်းဖွားလွယ်အိတ်အနီကို စလွယ်သိုင်းလွယ်ကာ
ခြေလှမ်းခပ်ကျဲကျဲ လျှောက်တတ်သော သူ့သဏ္ဍာန်။
      ဘေးခွဲကာ လှိုင်းပြေပြေလေးများနှင့် ထာဝစဉ် ပုံပန်းတကျရှိတတ်သော သူ့ဆံနွယ်ခွေများ၊ မပြုံးမရယ် ရီဝေစွာစိုက်ကြည့်တတ်သော သူ့မျက်ဝန်းအကြည့်များ၊ လမ်းမှာ တွေ့၍ အမှတ်တမဲ့ ကျွန်မကကြည့်မိလျှင် မသိမသာ ဆလွတ်ရိုက်ပြတတ်သော သူ့အမူအရာများ။ ရယ်ပြုံးနေသော သူ့မျက်နှာ...။
      အို... ကျွန်မ ဘယ်လို စွန့်လွှတ်ရမှာပါလိမ့်။ သူ..ရယ်ပြုံးလိုက်လျှင် ကျွန်မ ငေးမောနေမိတတ်သည်။
“ မောင်က ရယ်လိုက်ရင် သိတ်ချစ်ဖို့ကောင်းတာပဲ။ သိတ်အပြစ်ကင်းတယ်...”
     ကျွန်မကပြောလျှင် ရှက်ဟန်စွက်၍ ရယ်မောတတ်သော၊ နှုတ်ခမ်းများနှင့်အတူ မျက်လုံးများပါလိုက်၍ ရယ်တတ်သော ကျွန်မအချစ်ဦး သူ့ကို... သာမန်ချစ်ခြင်းသာမက နှစ်နှစ်ကာကာ မြတ်နိုးခဲ့ရပါသည်။
     သူ ကျွန်မကို ပထမဦးဆုံး စာလိုက်ပေးစဉ်က ရင်ခုန်လှိုက်မော ပျော်ရွှင်ခဲ့သော ခံစားချက်များကို သတိရမိလာစဉ် ကျွန်မရင်သည် တဒင်္ဂ နွေးထွေးလာပြန်သည်။
     အခန်းတံခါးပိတ်ကာ ခုတင်ပေါ်တွင် သူ့စာကို အလျင်စလို ဖောက်ဖတ်ချိန်က တုန်ယင်နေခဲ့သော ကျွန်မလက်များ၊ စာဖတ်အပြီး ဘယ်အချိန်တင်ထားမိသည် မသိသော ပင့်သက်ကို အသာချကာ ရင်ခုန်စွာဖြင့် မှိတ်ချလိုက်မိသော ကျွန်မမျက်လုံးများ၊ ခေါင်းအုံးကို ရင်ခွင်တွင် တင်းတင်းပွေ့ကာ ကျေနပ်စွာပြုံးနေမိသော ကျွန်မနှုတ်ခမ်းများးသည် သူ့ချစ်ရေးမဆိုမီကပင် သူ့အပေါ်တွယ်ငြိနေမိကြောင်း ထင်ရှားစေသည် မဟုတ်ပါလား။
     သူ့အတွက်အဖြေသည် ထွေထွေထူးထူး စဉ်းစားစရာမလိုခဲ့ပါ။ တစ်ပတ်အကြာတွင် ချစ်တုံ့ပြန်ခဲ့သော ကျွန်မအား အညှာလွယ်သည်ဟု ပြောကြမည်လား မသိ။
     အညှာလွယ်ရိုး ဟုတ်ခဲ့ရင်လည်း ချစ်သော သူ့အပေါ်တွင်သာ အညှာလွယ်ခဲ့ခြင်းဖြစ်သည့်အတွက် ကျွန်မ
လိပ်ပြာသန့်ပါသည်။ အချိန်ကာလကို ကြည့်၍ ကျွန်မအချစ်သည် ပေါ့တိမ်သည်ဟု ဝေဖန်မည်ဆိုလျှင်ကား ကျွန်မ စိတ်ဆိုးတတ်ခဲ့သည်။
     ကျွန်မအချစ်သည် သူ့အပေါ်တွင် ဖြူစင်လေးနက် တည်ကြည်ခဲ့သည်မှာ ယုံမှားစရာ မရှိခဲ့ပါ။
xxxxxxxxx
      စူးရှသော သုံးချက်ဆင့်ဟွန်းသံကြောင့် စက်ဘီးကို လမ်းဘေးဘက် ကပ်ပေးလိုက်သည်။ ဘီးလိမ့်ရုံ
ဖြတ်၍မောင်းသွားသော အက်စ်အီးကားထဲမှ ပြုံးစပ်စပ်ပြီတီတီ မျက်နှာများကြောင့် ၀မ်းနည်းအားငယ်စိတ် သည် တင်းကျပ်မောပန်းလာပြန်သည်။
     တစ်ယောက်တစ်ပေါက် စနောက်သံများးသည် ခါးသည်းလွန်းနေသည်။ သူသာပါရင် ဒီလိုနောက်ရဲမှာ မဟုတ်ဘူး ဆိုတဲ့အတွေးက ၀င်လာပြန်သည်။ နှမြောတသလွန်းစွာ နာကျင်ခံစားနေရသည်။
   “ ခံရခက်လိုက်တာနော်...”
      လှမ်းမြင်နေရသော စေတီလေးကြောင့် သူ့အိမ်ရောက်တော့မှာပါလားဟု သတိဝင်လာသည်။
စေတီလေးနှင့် မဝေးလှသောနေရာတွင် ပန်းရဂုံအမည်ရှိ သူတို့ခြံလေးသည် အမည်နှင့်လိုက်ဖက်စွာ ပန်းပေါင်းစုံဖြင့် သာမောဖွယ်ရာ ရှိလေသည်။
     အိမ်ကလေးသည် မခန့်ညားလွန်းသော်လည်း နေချင့်စဖွယ်ကောင်းလှသည်။ သူက မကြာခဏ
ခြံထဲလိုက်ကြည့်ဖို့ ဖိတ်ခေါ်တတ်ပေမယ့် မာနကြီးသောကျွန်မက တစ်ခါမျှ လိုက်မသွားဖူးခဲ့ပေ။
       သူ ခြံရှေ့မှာ ရှိပါ့မလား။ ဘယ်လို ခေါ်ရမှာပါလိမ့်။
      ယခင် ကျွန်မ သူ့ခြံရှေ့ဖြတ်လျှင် အိမ်ဘေးကုန်စုံဆိုင်မှ သူ့မိတ်ဆွေတစ်ယောက်ယောက် (သို့မဟုတ်)
ခြံရှေ့တွင် ကစားနေကြသော ကလေးငယ်များထဲမှ တစ်ဦးဦး( သို့မဟုတ်) ခြင်းခတ်နေသော သူ့သူငယ်ချင်းများထဲမှ တစ်စုံတစ်ယောက်သည်  သူ့ကို အပြေးအလွှား သွားခေါ်ပေးတတ်သည်။
     သူ မှာထား၍လားတော့ မသိပါ။ သူ့ပတ်ဝန်းကျင်မှ လူများသည် ကျွန်မကို မြင်သည်နှင့် မေးစရာ၊
ခေါ်ခိုင်းစရာမလိုဘဲ အလိုက်သိတတ်ကြသည်။ ထိုသို့ သူ့ကို သွားခေါ်နေစဉ် ကျွန်မသည် စက်ဘီးကို
ဖြည်းညင်းစွာ နင်းရင်း သူ့အိမ်ကို ဖြတ်ကျော်သွားမည်ဖြစ်သည်။
     မကြာမီ သူသည် စက်ဘီးကို အလျင်စလိုနင်းရင်း ကျွန်မဘေးသို့ ရောက်လာပေလိမ့်မည်။
     ယခုတစ်ကြိမ် ကျွန်မဖြတ်သွားရင်ရော...
     ကျွန်မရင်သည် အဆမတန် အခုန်မြန်လာသည်။ အရင်ကလို ပြေးလွှားကာ သွားခေါ်ပေးမယ့်သူ ရှိပါ့မလား။ ကျွန်မကို သနားသော မျက်ဝန်းများဖြင့် ငေးစိုက်ကြည့်နေကြမည်လား။
     ဘုရား...ဘုရား....။ ဒီမျက်ဝန်းများ၊ အကြည့်များကို ကျွန်မတွေးရင်း တုန်လှုပ်လာလေသည်။
     မိုးအကုန် ဆောင်းအကူး တဖွဲဖွဲကျနေသော မိုးဖွားလေးများအောက်တွင် ကျွန်မတစ်ကိုယ်လုံး ထူပူရှိန်းဖိန်းလာသည်။ ကြည့်စမ်း။ ဘယ်တုန်းကများ ဒီမိုးဖွဲလေးတွေ ကျနေခဲ့တာပါလိမ့်။ ကျွန်မကိုယ်ပေါ်က
အဖြူရောင် ဂျင်းဂျာကင်လေးတောင် စိုထိုင်းလွန်းနေပြီပဲ။
     ဂျာကင်လေးကို အာရုံစိုက်မိစဉ်ခဏ ရင်အခုန်သည် တဒင်္ဂ ရပ်တန့်သွားသည်ဟု ထင်မိသည်။
သူနှင့်ကျွန်မ ချစ်သက် တစ်နှစ်ပြည့်စဉ်က သူပေးခဲ့သည့် လက်ဆောင်လေး...။
  မျက်ရည်ကြည်များသည် မျက်ဝန်းအတွင်းတွင် တစ်မဟုတ်ချင်း ပြည့်လျှံလာသည်။ အမြင်အာရုံ ပျောက်မသွားရန် မျက်တောင်ကို တဖျပ်ဖျပ်ခတ်ကာ မျက်ရည်များကို ကြိုးစားသိမ်းရင်း သူ့စကားသံတို့ နားမှာ ဝေ့၀ဲလာပြန်သည်။
“ မောင်တို့  စချစ်ခဲ့ကြတာ ဒီဇင်ဘာမှာနော်။ ဒါကြောင့် အေးချမ်းတဲ့ဆောင်းကို အမှတ်တရဖြစ်အောင်
မောင်က ဒီဂျာကင်လေးကို ပန်းနုအတွက်ပေးတာပါ။ ချစ်လက်ဆောင်ကို မငြင်းကောင်းဘူး ပန်းနုရဲ့၊
ပန်းနုချမ်းရင် မောင့်ကိုယ်စား နွေးထွေးစေဖို့ပေါ့....”
    အဲဒီတုန်းက သူ့ရှေ့မှာပဲ ကိုယ်ပေါ်က ၀တ်လာတဲ့ဆွယ်တာကို ချွတ်ပြီး သူ့လက်ဆောင်ဂျာကင်လေးကို ၀တ်ပြလိုက်တော့ ၀မ်းသာကျေနပ်နေတဲ့ သူ့မျက်နှာလေးကို ကျွန်မ ကောင်းစွာ စွဲငြိနေတုန်းပါ။
   “ သိတ်လှတာပဲ ပန်းနုရယ်၊ ပန်းနုအသားလေးနဲ့ သိတ်လိုက်တယ်ကွာ။ မောင် မြို့ထဲမှာ ပုဆိုးဝယ်ရင်း
ဒီဂျာကင်လေးမြင်တော့ ပန်းနုကိုသတိရပြီး ပန်းနုနဲ့လည်း လိုက်မယ်ထင်လို့ ၀ယ်လာတာ။ ကြိုက်ရဲ့လားဟင်”
    “ မောင်နဲ့ပတ်သက်ရင် စီးကရက်နံ့တောင် ကြိုက်တတ်နေပြီပဲ မောင်ရဲ့”
  ကျွန်မအဖြေကို သူ သဘောကျစွာ ရယ်တော့ ကျွန်မလည်း သူနဲ့အတူ ကြည်နူးစွာ ရောနှောရယ်ခဲ့ဖူးသည်။
      သူနှင့်ကျွန်မသည် သဘောထားချင်းလည်း အများအားဖြင့် တိုက်ဆိုင်ကာ ၀ါသနာတူသူများလည်း
ဖြစ်သည်။ ဂစ်တာတီးခြင်း၊ သီချင်းဆိုခြင်း၊ ကဗျာဖတ်ခြင်းတို့ကို ခုံခင်သူများဖြစ်ကြသည်။ အနုပညာကို မြတ်နိုးသော၊ အချစ်ကို တန်ဖိုးထားသူချင်းဖြစ်ပါလျက်... သူမို့.....
xxxxxxx
သူ့ခြံအတွင်းမှ နှင်းဆီရုံတချို့ကို အဝေးမှ လှမ်းမြင်နေရသည်။ ညွတ်နူးစဖွယ် နှင်းဆီရနံ့များးသည် ကျွန်မ၏ နွမ်းလျလပ်ဟာနေသော စိတ်နှလုံးကို ငြိမ်းအေးစေနိုင်မည် မထင်တော့ပါ။
      သူနဲ့တွေ့ရင် ဘယ်လိုများ စကားစရမှာပါလိမ့်။
   “ မောင်နဲ့ မတွေ့တာကြာပြီနော်...” လို့ ပြောရမှာလား။ “ မောင် ဘာတွေလုပ်နေလဲ။ သတင်းတွေ ကြားနေရတယ်..” လို့များ ရန်တွေ့ပစ်ရမလား။ အို... မဟုတ်သေးပါဘူး။ သူ့ကို ရန်လိုသံနှင့် ပြောရက်မည် မထင်ပါ။
      သူ့အား မေးခွန်းများ အဆက်မပြတ် ထုတ်နေမိချိန်တွင် ကျွန်မ၏ နှုတ်ခမ်းအစုံသည် တုန်ယင်နေလိမ့်မည်
ထင်သည်။ ပြောမှ ပြောထွက်ပါ့မလား။ သူ ပြန်ဖြေမည့်စကားအတွက် ဘာပဲဖြစ်ဖြစ် ကျွန်မ ခံနိုင်ရည် ရှိဖို့တော့ လိုမည်။ “ မောင့်ကိုမေ့လိုက်ပါတော့...” ဟု သူပြောခဲ့လျှင်...။
      သူ့အား စွန့်လွှတ်ရတော့မည်ဟု တွေးမိတိုင်း ခန္ဓာကိုယ်သည် လေဟာနယ်ထဲ ရောက်သွားသလို လွင့်ဟာပြီး ရင်ထဲတွင် တလှပ်လှပ် တုန်ခါလာလေသည်။
  ယခင်က နွေးထွေးသော သူ့မျက်လုံးများသည် မယုံကြည်လောက်အောင်  အေးစက်စိမ်းကားနေခဲ့ပါလျှင်...။
လေသံတိုးတိုးဖြင့် ချစ်စကားနုနုလေးများ ရေရွတ်ပြောဆိုခဲ့ဖူးသော သူ့နှုတ်ခမ်းများမှ လမ်းခွဲဖို့စကားများ ရက်စက်စွာ ပြောခဲ့ပါလျှင်...။
ညင်သာစွာ ထွေးဖက်၍ အကြင်နာကိုပြတတ်သောသူသည် လက်နောက်ပစ်ရပ်ကာ ခေါင်းကိုခါယမ်း ရင်း ကျောခိုင်းသွားခဲ့ပါလျှင်...။
     ကျွန်မ... ဘယ်လို စွမ်းအားများနှင့် ရပ်တည် ကျန်ခဲ့နိုင်ပါမည်နည်း။
     စိတ်မချမ်းမြေ့မှုနှင့်အတူ မယုံကြည်နိုင်မှုသည် ဒွန်တွဲနေပြန်သည်။ ဒီသတင်းဟာ ဖြစ်နိုင်ပါ့မလား။
သူက ဒီလို လူစားမျိုးမှ မဟုတ်ခဲ့တာ...။
      သူ ကျွန်မကို သိတ်ချစ်ခဲ့တာ သံသယမထားရက်အောင် ယုံကြည်နေချင်သေးသည်။
ခက်သည်က သတင်းပေးသူကလည်း အပိုပြောလေ့ရှိသူ မဟုတ်။ သူနှင့် မတွေ့ရသည်မှာလည်း အတော်ကြာနေပြီ။
      ဇဝေဇ၀ါအတွေးများဖြင့် ဦးခေါင်းသည် ဖျစ်ညှစ်ခံထားရသလို ကိုက်ခဲနာကျင်လာသည်။
ကျွန်မ ဘာလုပ်ရမှာပါလိမ့်။ စက်ဘီးနင်းနေသော ခြေထောက်အစုံသည် လေးလံနှေးကွေးလာသည်။
      သူ၏ ရက်စက်သော စကားသံများအား မကြားနာဝံ့ပါ။ မျှော်လင့်ချက် ပျက်သုဉ်းသောဘ၀သည်
မည်သို့ အဓိပ္ပါယ် ရှိပါဦးမည်နည်း။
      တင်းထားခဲ့သော စိတ်သည် ပျော့ညွတ်သွားပြန်သည်။ မူးဝေနေသော ခေါင်းထဲမှ ဦးနှောက်သည် ပူလောင်ဆူပွက်နေသည်ဟု ထင်လာမိသည်။ ပြန်လှည့်ရမည်လား။ ဆက်သွားရမည်လား။ ဝေခွဲမရ။
      ကျွန်မအား သနားသလို ကြည့်နေကြမည့် အကြည့်များ၊ သူ့ခြံရှေ့မှ မျက်ဝန်းများကို တွေးမိချိန်တွင် ရင်သည် တုန်ယင်မောပန်းလွန်းလာသည်။ ခြေနင်းခုံပေါ်မှ ခြေအစုံတွင် အားများ တစ်စထက်တစ်စ ပါးလျားယုတ်လျော့လာတော့သည်။
xxxxxxxx

     သူ့အိမ်ရှေ့ ရောက်ခါနီးတွင်မှ စက်ဘီးကို ရုတ်တရက် ပြန်ကွေ့ချလိုက်သည်။
ရှုံးနိမ့်သူတစ်ယောက်၏ ခံစားချက်မျိုးဖြစ့် ၀မ်းနည်းဖိုလှိုက်နေမိသည်။
     ကျွန်မ၏နှလုံးသားထဲမှ နှုတ်ဆက်ခြင်းကင်းစွာ တိတ်တဆိတ် ပုန်းရှောင်နေသော သူ့အား ချစ်သူအဖြစ်မှ မနုတ်ဖယ်ပစ်ချင်ပါ။ သူမလာသော ရက်များကြောင့် ၀မ်းနည်းအားငယ်ခြင်းများ ခံစားနေရသော ကျွန်မနှလုံးသားကို မျှော်လင့်ခြင်းများပါ ပျောက်ဆုံးမသွားစေချင်သေးပါ။
      တွေဝေ မပြတ်သားစိတ်ကြောင့် လူညံ့တစ်ယောက် ဖြစ်ချင်ဖြစ်ပါစေတော့။ တစ်ယောက်တည်းပဲ
ကြိတ်ဆွေးနေပါတော့မယ်လေ။ သူ့ကို ဘာမှ ထပ်မေးဖို့ မကြိုးစားတော့ပါဘူး။ မျှော်လင့်ရင်းနဲ့ပဲ စိတ်ဖြေ
စောင့်နေတော့မယ်။
    သူပြန်လာမယ့် တစ်နေ့...။
ဒါမှမဟုတ် ...။
သူ နှုတ်ဆက်လာတဲ့ တစ်နေ့ထိပေါ့။
xxxxxxxx

ဝေ(စီးပွားရေးတက္ကသိုလ်)
၁၉၉၀ပြည့်နှစ်၊ သြဂုတ်လ.... ရွှေသမင်မဂ္ဂဇင်း

( မဂ္ဂဇင်းသို့ ပထမဦးဆုံး ပို့ဖြစ်သော.....၊ ပထမဦးဆုံး ပုံနှိပ်ဖော်ပြခံရသည့် ၀တ္ထုတိုလေး ဖြစ်ပါသည်။)

ကျွန်မအတွက် နှစ်သိမ့်ဆု



   ရွှေအမြုတေ စာပေဆုပေးပွဲကြီးက ပြီးခဲ့တာကြာပါပြီ။ ဒါပေမယ့် ကျွန်မရင်ထဲက ဆုပေးပွဲကတော့ မပြီးသေး။  မကြာခဏ ဆုပေးပွဲကြီးကို မြင်ယောင်သတိရနေမိဆဲပါ။

     သတိရလွန်းမက ရလာတော့ ညီအစ်မတွေလို ချစ်ခင်ရတဲ့ စာပေသူငယ်ချင်း ဆရာမအဖြူရောင်(ရွှေ)ကို ဖုန်းဆက်မိပါတယ်။

“ အမ အဲဒါပိုးဝင်သွားတာလေ။ ကျွန်မတို့တုန်းကလည်း ဒီလိုပဲ...” လို့ ရယ်မောသံနဲ့ သူကပြောတော့ ကျွန်မလည်း ရှက်ရှက်နဲ့   “ ဟုတ်တယ်နော်...” လို့ ထောက်ခံမိရတယ်။

     ပိုးမှ တော်တော်ဆိုးတဲ့ပိုးပါ။ နေ့တွေရက်တွေသာ ကုန်လွန်သွားပေမယ့် မနေ့တနေ့ကလို မြင်ယောင်ပြီး ကြည်နူးနေဆဲပါလေ။

  ကျွန်မတောင် ဒီလိုဖြစ်နေမှတော့ ဆုရတဲ့သူတွေဆို ဘယ်လိုများနေမလဲ။ သူတို့အပျော်ကို ၀င်တွေးကြည့်တော့ ကျွန်မရင်ထဲမှာလည်း လှိုင်းလေးတွေထသွားရတယ်။ ကျွန်မလည်း အဲဒီပွဲမှာ ဆုရခဲ့တယ်လေ။

“ နှစ်သိမ့်ဆု”...။

xxxxxxx

  အမှန်တော့ ဒီပွဲကို ဒီနှစ်မှ ပထမဦးဆုံးအကြိမ် ကျွန်မတက်ခွင့်ရခဲ့တာပါ။ မနှစ်ကတော့ ဆရာမအဖြူရောင်က လာခဲ့ဖို့ ဖုန်းဆက်ခေါ်ပါသေးတယ်။ ကျွန်မက “ ဆရာက ကျွန်မကိုမဖိတ်ဘူး..” လို့ အားငယ်စကား ဆိုမိတော့

“ ဆရာက ဘယ်သူဘယ်ဝါရယ်လို့ သပ်သပ်မဖိတ်ပေမယ့် အမလည်း ရွှေအသစ်ပဲ၊ လာလို့ရပါတယ်။ ကျွန်မတို့က ဖိတ်ပါတယ်။ လာပါလား...” လို့ ခေါ်ပေမယ့် ကျွန်မ မသွားဖြစ်ပါဘူး။

   ဒီနှစ်တော့ ဆရာနဲ့ဖုန်းပြောဖြစ်ရင်း ဆရာက ကျွန်မကိုဖိတ်ပါတယ်။ ကျွန်မက ဆုရသလောက်ကို ၀မ်းသာသွားတာပါ။ အလင်းတန်းဂျာနယ်မှာ ဆရာမခင်ပန်နှင်းရေးသလို ဒီပွဲမှာ စာရေးဆရာတွေနဲ့ ပျော်ပျော် ရွှင်ရွှင် ဆုံစည်းရမှာကိုက ဆုရသလိုပါ။

    ဒါပေမယ့် ကျွန်မကနယ်ကဆိုတော့ တစ်ယောက်တည်းမသွားရဲလို့ အမျိုးသားကို အဖော်ခေါ်ပါတယ်။ သူက ကဗျာဆရာဆိုပေမယ့် “ မင်းကိုဖိတ်တာ ကိုယ်ကကပ်လိုက်လို့ ကောင်းပါ့မလား...” လို့ အင်တင်တင်နဲ့ပါ။

      ကံကောင်းချင်တော့ ဆရာဦးဝင်းငြိမ်းက သူ့ဆီကိုလည်းဖုန်းဆက်ပြီး သပ်သပ်ဖိတ်ပါတယ်။

“ ဆရာလာနိုင်မလား...” လို့မေးတာကို သူကလည်း ကျွန်မကိုလိုက်ပို့ရမှာမို့ မဆိုင်းမတွ “ ဟုတ်ကဲ့ လာနိုင်ပါတယ်..” လို့ ဖြေလိုက်တာပေါ့။ နောက်မှသိရတာက သူ့ကို ကဗျာဆုရမယ့်သူမို့ ဆရာကဖိတ်တာကို သူကမတုန်မလှုပ် အံ့သြဟန်လည်းမပြလို့ ဆရာက ပြန်အံ့သြနေတာတဲ့။

    သူကတော့ ကျွန်မနဲ့ကပ်မလိုက်ရဘဲ သူလည်းဖိတ်စာတစ်စောင်နဲ့ အဖိတ်ခံရပြီဆိုပြီး ရိုးရိုးသားသား ၀မ်းသာနေတာပါ။ ကျွန်မကတော့ နည်းနည်းအံ့သြသွားတယ်။ သူနဲ့ကျွန်မကို စုံတွဲမှန်းလည်း ဆရာဦးဝင်းငြိမ်းနဲ့ ရွှေအမြုတေတစ်ရုံးလုံးက မသိကြပါဘူး။ သူ့ကဗျာပါဖူးတဲ့ မဂ္ဂဇင်းတစ်ချို့ကသာ ကျွန်မတို့နှစ်ယောက်ကို စုံတွဲမှန်းသိကြတာပါ။ သူက ကဗျာအပုဒ်ရေလည်း နည်းသေးတော့ ယုတ်စွအဆုံး ကျွန်မနဲ့အဆက်အသွယ်ရှိတဲ့ စာရေးဆရာ မင်းဝေဟင်တို့၊ အဖြူရောင်တို့၊ ချမ်းထက်ဟန်တို့တောင် သူ့ကို လူနဲ့ကလောင်နာမည်နဲ့ တွဲမသိကြပါဘူး။ ဒီတော့ ကျွန်မက ကဗျာဆရာသစ်ခက်အိမ်ကို ဆရာ ဘယ်လိုများ သိပါလိမ့်လို့ သိပ်မသင်္ကာချင်ဘူး။

    ဒါပေမယ့် ကြာကြာမတွေးအားပါဘူး။ ရွှေပွဲတက်ဖို့ ရင်တခုန်ခုန်နဲ့ ပြင်ဆင်ရတာပေါ့။ အဖြူရောင့်ကို ဖုန်းဆက်ချိန်း၊ ဘယ်နေ့ရောက်မယ်၊ ဘယ်အချိန်ဆုံမယ်နဲ့၊ တစ်ခါမှမတွေ့ဖူးသေးတဲ့ ကျွန်မလေးစား
အားကျတဲ့ စာရေးဆရာတွေအများကြီးကို တစ်စုတစ်ဝေးတည်း တွေ့ရတော့မှာမို့ ကျွန်မ ရင်ခုန်နေတာပါ။

xxxxxxx

  ရွှေအမြုတေတိုက်ကို ဖိတ်စာသွားယူခါမှ ဆရာဦးဝင်းငြိမ်းနဲ့ ဆရာဦးမျိုးမြင့်ညိမ်းတို့က ကျွန်မနဲ့ကဗျာဆရာကို စုံတွဲမှန်းသိသွားပြီး တအံ့တသြရယ်ပါတယ်။ ရယ်စရာကလည်း ဖြစ်သွားတာကိုး။ သူနဲ့ကျွန်မ တစ်ယောက်ချင်း ကိုယ့်ကိုယ်ကိုမိတ်ဆက်ပြီးတဲ့အထိ ဆရာတို့ရော၊ အဲဒီမှာရောက်နေတဲ့ ဆရာညီမင်းညိုနဲ့ ဆရာညီငယ်လေးကရော တစ်ယောက်စီ သပ်သပ်လာတယ်ပဲ ထင်နေကြတာလေ။

    ဆရာကလည်း တစ်ယောက်စီကို စကားတစ်လှည့်စီ ပြောနေတာပါ။ နောက်တော့မှ ဘယ်မှာတည်းတာလဲ လို့ တစ်လှည့်စီမေးလိုက်ကာမှ ကျွန်မလည်း ကဗျာဆရာကို ကျွန်မအမျိုးသားပါလို့ မိတ်ဆက်ပေးလိုက် ရတော့တယ်။

     အပျိုကြီးဟန် ဆောင်လို့မှ မရတော့တာကိုး။

xxxxxxx

    ဘာပွဲမှတက်လေ့မရှိဘဲ ပွဲကြောက်တဲ့ ကျွန်မက ဆုပေးပွဲကျင်းပတဲ့ ခမ်းမရှေ့ကို ရင်တဖိုဖိုနဲ့ ရောက် လာတော့ ရောက်ရောက်ချင်း ဆရာမင်းဝေဟင်၊ ဆရာမချောအိမာန်(မန္တလေး)၊ ဆရာထွန်းတောက်ထွဋ် တို့ကို အမှတ်တရဓါတ်ပုံရိုက်နေတာ တွေ့တာမို့ ၀မ်းသာအားရ နှုတ်ဆက်ကြပါတယ်။ ဆရာဆရာမ သုံးယောက်ရဲ့ ဖော်ရွေတဲ့အပြုံးတွေက ခန်းမထဲဝင်ဖို့ အားငယ်သလိုလိုဖြစ်နေတဲ့ ကျွန်မကို သက်သာရာ ရစေတယ်လေ။ ဧည့်ကြိုတဲ့နေရာက ညီမလေးတွေကလည်း ပြုံးရွှင်ချိုမြနေတာမို့ ရင်အေးစရာပါ။

  ဆရာလင်းနိုင်ဦးက ခန်းမထဲကို ဦးဆောင်ခေါ်သွားရင်း “ ကြိုက်တဲ့နေရာသာ ၀င်ထိုင်ပါ...” လို့ ပြောသွားချိန်မှာ ခန်းမထဲကိုကြည့်လိုက်တော့ နေရာလွတ်တော်တော်များများ ရှိပါသေးတယ်။

  မဟေသီမဂ္ဂဇင်းတိုက်မှာ ဆုံဖူးထားတဲ့ ဆရာလင်းထင်နဲ့အရင်ဆုံးတွေ့တော့ ဆရာက ကျွန်မ စာပေလောကနဲ့စိမ်းတာကို သိနေတာမို့ မိတ်ဆက်ပေးဦးမယ်ဆိုပြီး ဆရာတင့်ခိုင်၊ ဆရာမင်းချမ်းမွန်၊ ဆရာနတ်မှုး စတဲ့ ဆရာကြီးတော်တော်များများနဲ့ မိတ်ဆက်ပေးပါတယ်။

   တဖြေးဖြေးနဲ့ ခန်းမထဲလူပြည့်လာတော့ ကျွန်မလည်း တောင်ကြည့်မြောက်ကြည့်နဲ့ အနားမှာတွေ့ရတဲ့ ဆရာမတွေကို နှုတ်ဆက်ချင်လိုက်တာလေ။ ဒါပေမယ့် ကျွန်မကို သိပါ့မလားလို့ အားငယ်ပြန်ရော။

     ခပ်စောစောလာမယ်လို့ ချိန်းထားတဲ့ ဆရာမအဖြူရောင်ကလည်း လူတော်တော်စုံမှ ရောက်လာပါတယ်။
အကြောင်းမသိတဲ့ ကျွန်မက ရှေ့တော်တော်ကျတဲ့ခုံမှာ ထိုင်နေမိတာမို့ အဖြူရောင်တို့ စာရေးဆရာအဖွဲ့တွေ ထိုင်တဲ့ဝိုင်းနဲ့ကလည်း အဝေးကြီးပါ။

  ဒီတော့ အနီးအနားက၀ိုင်းတွေကို ဝေ့၀ဲကြည့်ပြီး ကိုယ့်အားကိုယ်ကိုးပြီး နှုတ်ဆက်မယ်လို့ အားတင်းရပါတယ်။ ဖြစ်ချင်တော့ ကျွန်မကလည်း မျက်စေ့ခပ်မွဲမွဲ၊ ခမ်းမထဲမှာလည်း မီးကမှိန်ဖျော့ဖျော့လေး ထွန်းထားတော့ မသဲကွဲပါဘူး။ အမျိုးသားကို “ ကြည့်ပေးပါဟယ်။ ဆရာ၊ ဆရာမတွေ တွေ့ရင်ပြောပြစမ်းပါ..” လို့ အားကိုးပေမယ့် သူက စာရေးဆရာ၊ ဆရာမတွေကို နာမည်နဲ့လူနဲ့ ကျွန်မလောက် တွဲမသိပါဘူး။

     ကျွန်မကတော့ မဂ္ဂဇင်းတွေထဲမှာ စာရေးဆရာ၊ ဆရာမဓါတ်ပုံပါလာရင် အငမ်းမရကြည့်ထားတာကိုး။

  ပထမဦးဆုံး ကျွန်မတို့ဝိုင်းနဲ့ကပ်ရက် ဘေးနားက၀ိုင်းမှာ ၀င်ထိုင်တဲ့ ဆရာမခင်ခင်ထူး၊ ဆရာမ၀င်းဝင်းမြင့်(နန်းတော်ရှေ့) တို့ကို သွားနှုတ်ဆက်ပါတယ်။ နောက်ပြီး စာပေဟောပြောပွဲသွားရင်း
ပြည်ကိုဝင်လာဖူးတဲ့ ဆရာမမိချမ်းဝေကို တစ်ခုံကျော်မှာတွေ့လို့ သွားနှုတ်ဆက်တော့ ဆရာမနဲ့ တစ်ဝိုင်းတည်းထိုင်နေတဲ့ ဆရာမတွေတော်တော်များများကို တွေ့ရပေမယ့် အချင်းချင်းနှုတ်ဆက် စကားပြောနေကြတာမို့ မနှောင့်ယှက်ချင်တာက တစ်ကြောင်း၊ ခမ်းမထဲမှာလူပြည့်လာပြီး အခမ်းအနားစချိန်နီးလာတာက တစ်ကြောင်းမို့ ကိုယ့်နေရာမှာကိုယ် ခပ်ကုပ်ကုပ်ထိုင်လိုက်ချိန်မှာပဲ အခမ်းအနားစပါတော့တယ်။

xxxxxxxx

   မီးတွေဝင်းကနဲ လက်ပြီး ကင်မရာတွေတဖျပ်ဖျပ် ကျွန်မရှေ့မှာဝိုင်းလာကြတော့ ရင်တွေတော်တော် ခုန်သွားပါတယ်။

  ကျွန်မဆုရတာ မဟုတ်ပါဘူး။ ကျွန်မခင်ပွန်းကို ကဗျာဆုရကြောင်း ကြေညာခံလိုက်ရတာပါ။ သူ့ကို နှုတ်ဆက်ကြတဲ့ ဆရာ၊ဆရာမတွေကို ကျွန်မကလည်း ရောယောင်ပြီး နှုတ်ဆက်မိပါတယ်။ ဆရာမ မသီတာ(စမ်းချောင်း)က ကဗျာဆရာကိုနှုတ်ဆက်ရင်း “ ဝေနဲ့တစ်ခါမှ လူချင်းမဆုံဖူးသေးဘူး...” လို့ ပြောတော့ ကျွန်မလည်း တွေ့ရတာဝမ်းသာလွန်းလို့ ထပြီးလက်ဆွဲနှုတ်ဆက်မိပါတယ်။ ကျွန်မပဲ ဆုရသလိုလိုနဲ့။

  ကဗျာဆရာကို ခုမှတွေ့ဖူးကြပေမယ့် မုဒိတာပွားပြီး လာနှုတ်ဆက်ကြတာ တကယ့်ကို လေးစားကြည်နူးစရာပါ။ ဆရာဦးတင့်ခိုင်က ဆုကြေညာခါနီးအချိန်မှာ ကဗျာဆရာ့ခုံနောက်ကို အရင်ဆုံးရောက်လာတာပါ။ ကျွန်မက အံ့သြပြီးမော့အကြည့်နဲ့ ဆုကြေညာတာနဲ့ တစ်ထပ်တည်းပါ။

   ဆရာဦးဝင်းးငြိမ်းနဲ့ ဆရာဦးထက်မြက်တို့ လာနှုတ်ဆက်တော့ ဆရာထက်မြက်က “ သူ့ဖုန်းနံပါတ်ကို ဆရာမောင်စိမ်းနီဆီက တစ်ဖက်လှည့်နဲ့ တောင်းထားရတာ..” လို့ ရယ်ရယ်မောမော ပြောသွားပါတယ်။

    ရွှေအမြုတေဆုရွေးချယ်ရေး အဖွဲ့ဟာ အင်မတန်တိကျပြီး သိုဝှက်လှတဲ့ဆရာတွေပါပဲ။

   ဆရာမင်းဝေဟင်နဲ့ ဆရာချမ်းထက်ဟန်ကလည်း “ အစ်ကိုမှန်း ကျွန်တော်တို့မသိဘူး..” ဆိုပြီး အံ့သြ၀မ်းသာ လာနှုတ်ဆက်ကြပါတယ်။ ဆရာညီငယ်လေးကတော့ ကြိုရိပ်မိဟန်နဲ့ ပြုံးပြုံးကြီးပေါ့။ သူက ဆုစုံစမ်းထောက်လှမ်းရေးမှုးအဖြစ် သူ့ကိုယ်သူခန့်ထားတာကိုး။

   ဆရာမအဖြူရောင်ကလည်း “ ကျွန်မမပြောဘူးလား..” တဲ့။ သူက ပွဲစခါနီးတုန်းက “ဆုရရင် ဘယ်လိုလုပ်မလဲ..”ဆိုပြီး ကဗျာဆရာကို စသွားတာကိုး။ ဆရာကာတွန်းမြင့်သိန်းနဲ့ ဆရာမ တူးတူးမြင့်သိန်းကလည်း ကဗျာဆရာလို့စမိတ်ဆက်တုန်းက “ ဆုများရနေမလား မသိဘူးနော်..” လို့ ဟောကိန်းထုတ်ထားတာမို့ “ ကဲ အန်တီပြောတာ မမှန်ဘူးလား..” နဲ့ ၀မ်းသာနေရှာပါတယ်။

   နောက်ပိုင်း ဆုတွေတစ်ဆုပြီးတစ်ဆု ကြေညာပြီးချီးမြှင့်ပေးတိုင်း ကျွန်မလည်း ဆုရသူတွေနဲ့ထပ်တူ ရင်ခုန် ပျော်ရွှင်ခဲ့ရပါတယ်။ ဂုဏ်ယူစရာဆုကို ထိုက်ထိုက်တန်တန်ရသွားကြတာ မုဒိတာပွားစရာပါပဲ။

  ဆရာရဲသျှမ်းဆုရလို့ သွားနှုတ်ဆက်ပြီးပြန်လာတဲ့ ကျွန်မကို ကျွန်မထိုင်တဲ့ဝိုင်းနားမရောက်ခင်မှာ တစ်စုံတစ်ယောက်က လက်လှမ်းဆွဲတာမို့ မီးရောင်မှိန်မှိန်ထဲမှာ သေချာအားစိုက်ကြည့်လိုက်မှ ဆရာမ အမရာ(ဆေး-၁) ဖြစ်နေပါတယ်။ ကျွန်မလေ ၀မ်းသာလိုက်တာ မပြောပါနဲ့တော့။ ကျွန်မထိုင်ခုံနောက်က ၀ိုင်းမို့ ကျွန်မကမမြင်ဘဲ နှုတ်မဆက်ဖြစ်ပေမယ့် ကျွန်မကို နွေးနွေးထွေးထွေး နှုတ်ဆက်လာတဲ့ မာနကင်းတဲ့ ဆရာမကို လေးစားမိပါတယ်။ “ ဝေ့စာတွေဖတ်ရကြောင်း၊ အားပေးနေကြောင်း...” ပြောတော့ တစ်ဝိုင်းလုံးကလည်း နွေးထွေးတဲ့အပြုံးလေးတွေနဲ့ ကြည့်နေတာမို့ ကျွန်မကြည်နူးလိုက်တာလေ။

    ဆရာမကြီးဒေါ်ကလျာနဲ့ ဆရာမမစန္ဒာကိုလည်း ဆရာမအမရာဘေးမှာတွေ့လို့ နှုတ်ဆက်ခဲ့ပါသေးတယ်။

   ဒါပေမယ့် နောက်မှပြန်စဉ်းစားမိတော့ မီးခပ်မှိန်မှိန်မို့ ဟိုတစ်ဖက်ခြမ်းမှာ ထိုင်နေတဲ့သူတွေကို ကျွန်မ သဲသဲကွဲကွဲမမြင်တာ။ ကံစမ်းမဲပေါက်လို့ ထလာမှ ဆရာမနှင်းဝေငြိမ်းကိုလည်း အဲဒီဝိုင်းကမှန်း တွေ့ရတယ်။

    မမြင်လို့ နှုတ်မဆက်မိတဲ့ တခြားဆရာမတွေလည်း ရှိဦးမှာပဲလို့ စိတ်မကောင်းဖြစ်မိပေမယ့် နွေးထွေးပြီး သဘောထားပြည့်ဝတဲ့ စာရေးဆရာ၊ ဆရာမတွေရဲ့ နှလုံးသားကိုတော့ လေးစားပြီးသားမို့ ကျွန်မကို နားလည်ကြမှာပါလို့ ယုံကြည်မိတယ်လေ။

xxxxxxxx

   နောက်တစ်နေ့မနက် စီးတီးစတားက မနက်စာဝိုင်းလေးမှာ ဆရာဦးဝင်းငြိမ်းနဲ့ ဆရာ၊ဆရာမတစ်ချို့၊ ဆရာ့ရဲ့သားသမီးတပည့်တွေ ရင်းရင်းနှီးနှီးစကားဝိုင်းဖွဲ့ဖြစ်တော့ ဆရာက ကျွန်မကို နှစ်သိမ့်အားပေး စကား ပြောပါတယ်။

    တကယ်ပါ။ ကျွန်မလေ ဆုရသလောက်ကို ပျော်တာပါ။ ဆရာ့ရဲ့အားပေးနှစ်သိမ့်စကားက ကျွန်မအတွက် ဆုပါပဲ။

   ကျွန်မက ဘာဆုတစ်ခုမှ မရဖူးလို့ ဆရာ့ရဲ့ကျေးဇူးကို မဆပ်နိုင်တဲ့ အသုံးမကျတဲ့တပည့်ဆိုပြီး အမြဲ စိတ်အားငယ်ခဲ့မိတာပါ။ ဆရာ၊ ဆရာမတွေရဲ့ အသိအမှတ်ပြုမှုကို ရရင်ပဲ ကျွန်မအတွက်က ဆုပါ။

   အဲဒီကအပြန် ရွှေဆုရှင်ဆရာမင်းဝေဟင်ကျွေးတဲ့ ကြေးအိုးကိုစားဖို့ လှည်းတန်းကိုသွားကြတယ်။ ဆရာဦးဆွေ(ဒဿနိက)၊ ဆရာမအဖြူရောင်၊ ဆရာညီမင်းညို၊ ဆရာညီငယ်လေး၊ ဆရာချမ်းထက်ဟန်၊ ဆရာ ကျော်မောင်မောင်ဟန်၊ ဆရာထွန်းတောက်ထွဋ်၊ ဆရာသာကြည်ဆွေနဲ့ ကျွန်မတို့စုံတွဲ။

  စားရင်းသောက်ရင်း၊ စကားပြောရင်း၊ ခင်မင်ရင်းစွဲရှိပြီးသားလူတွေ ပိုရင်းနှီးလာပြီး တစ်ယောက်နဲ့တစ်ယောက် အားပေးကြ၊ စနောက်ကြ၊ ဝေဖန်ကြနဲ့ပေါ့။ ပြီးတော့ အဖြူရောင်တို့အိမ်မှာ တစ်ထောက်နား၊ အအေးသောက်၊ ကော်ဖီသောက်။ ကျွန်မတို့စုံတွဲကလည်း ကဗျာဆရာကဆုရထားသူမို့ တစ်ဝိုင်းလောက်ကျွေးချင်သေးကြောင်း အခွင့်တောင်းပေမယ့် အစီအစဉ်တွေပြည့်နေတာကြောင့် အချိန်မပေးနိုင်ကြတော့ပါဘူး။ အဲဒီကမှ လင်းလွန်းခင်စာပေက ဆရာဦးသိန်းလွင်ရဲ့ စာအုပ်မိတ်ဆက်ပွဲ နဲ့ ရေးသူဖတ်သူဆွေးနွေးပွဲကို အဖွဲ့လိုက်ချီတက်။

    ဆရာ၊ဆရာမတွေ ဆွေးနွေးကြတာကို နားထောင်ရင်း နွေးနွေးထွေးထွေး ပြောကြ၊ဆိုကြ၊ ငြင်းခုန်ကြရင်း အားလုံးဟာ တစ်သားတည်းဖြစ်သွားသလို ပေါင်းစည်းသွားတဲ့အားမာန်ကို ကျွန်မရင်ထဲမှာ ခံစားမိပြီး ပီတိတွေနဲ့ တသိမ့်သိမ့်ကြည်နူးရပါတယ်။

    တကယ်ပါ။ ဆုရတာမရတာက အဓိကမဟုတ်ပါဘူး။ ဒီလို စာပေပညာရှင် ဆရာ၊ဆရာမကြီးတွေရယ်၊ စာပေမောင်နှမတွေရယ်၊ အားလုံးနဲ့ နွေးနွေးထွေးထွေး တစ်စည်းတစ်လုံးတည်း တွေ့ဆုံရင်းနှီးခွင့်ရတာကိုက ကျွန်မအတွက် ဆုလာဘ်ကြီးတစ်ခုပါ။

    အိမ်အပြန်လမ်းမှာတော့ ကဗျာဆရာက ဆုတံဆိပ်ကြီးပိုက်ပြီး ပြုံးပြုံးပြုံးပြုံးနဲ့ပေါ့။

   ကျွန်မကလည်း ရင်ထဲမှာထွေးပိုက်လာတဲ့ နှစ်သိမ့်ဆုလေးကို တမြတ်တနိုးကျေနပ်ရင်း...၊ ကြည်နူးမဆုံးပါပဲ။

ဝေ(စီးပွားရေးတက္ကသိုလ်)

မှတ်ချက်။ ။ ဤစာစုလေးအား ရွှေအမြုတေဆုပေးပွဲအပြီး တစ်လလောက်တွင်ရေးခဲ့ပြီး အလင်းတန်းဂျာနယ်သို့ ပို့မည်ရည်ရွယ်ထားသော်လည်း မပို့ဖြစ်ခဲ့ပါ။ ခြောက်လကျော်ကြာကာမှ ဖိုင်ထဲတွင်ပြန်တွေ့သဖြင့် အမှတ်တရ အဖြစ် ဖော်ပြလိုက်ပါသည်။

ဖုန်းသံရှင်


         မြူးကြွလှုပ်ခတ်သော ဂီတ၏သာယာသံနှင့်အတူ ကြည်လင်ပြတ်သားသော သီချင်းသီဆိုသံ....၊    စည်းချက်ဟန်ညီ လှုပ်ရှားနေသော သဏ္ဍာန်နှင့် ချိုရွှင်ရယ်မြူးနေသော တီဗွီဖန်သားပေါ်မှ ချစ်စဖွယ်မျက်နှာလေးကို  မျက်တောင်မခတ် စူးစိုက်ငေးရီနေမိသော်လည်း အခါများစွာကလို စိတ်ဝင်စားမှု မပြင်းထန်တော့ပေ။ နှစ်လိုဖွယ် ညီညာ စည်းကျသော သံစဉ်များထက် စူးရှပြတ်တောင်းသော ဖုန်းခေါ်သံ တစ်ခုကိုသာ သူမ စိတ်စောတောင့်တ နေမိသည်။ 
ပြီးတော့.... ကြည်လင်ညံ့သက်သော အောင်မြင်သည့် အမျိုးသားသံ တသံ....။ ထိုအသံသည် ကာလ များစွာ အေးခဲငြိမ်သက်နေခဲ့သော  အိအိခင်၏ နှလုံးသားကို ညွတ်နူးနိုင်စွမ်း ရှိ၏။ နွေးထွေးနိုင်စွမ်းရှိ၏။
         အံ့သြစရာကောင်းလှစွာ...ထိုအသံကို စကြားကာစမှာပင် သူမ သဘောကျမိသွားခြင်း ဖြစ်လေသည်။  ထို့ကြောင့်လည်း သူမဆီဆက်သမျှ ဖုန်းသရဲများထဲမှ ထိုအသံပိုင်ရှင် တယောက်ကိုသာ လက်ခံစကားပြော မိခြင်း ဖြစ်သည်။
သူမက ဖုန်းဆက်၍ အီစီကလီဇာတ်ခင်းခြင်းမျိုးကို မုန်း၏။ ခပ်ရိရိလေသံများနှင့် မထိတထိ စကားလုံးများကို မနှစ်မြို့လွန်းသောကြောင့် သူမ ဖုန်းသရဲများကို ဝေးဝေးကရှောင်လေ့ ရှိခဲ့သည်။
         သို့သော်....လွန်ခဲ့သည့် တလခန့်က ညနေခုနစ်နာရီခွဲ တိတိတွင်ဆက်သော ဖုန်းထဲမှ စကားသံတစ်သံ သည် သူမ၏အာရုံများကို ဖမ်းစားသွားခဲ့သည်။ သူ့အသံသည် ယဉ်ကျေးသိမ်မွေ့၍ တည်ကြည်အေးမြ သလို ပြတ်သားလှိုက်လှဲလှသည်။
          “ အိအိခင်နဲ့ စကားပြောချင်လို့ပါ ခင်ဗျာ...”....ဟု သူက ဆိုလိုက်စဉ် အရင်ကလို အမျိုးသားအသံမို့ လိမ္မာယဉ်ကျေးစွာ ငြင်းပယ်လိုက်ဖို့ထက် သူ  ဘယ်သူဖြစ်မလဲ ဆိုတာကိုသာ စိတ်ဝင်စားသွားမိ၏။ သူ့အသံ က ကြားနေကျအသံများထက် များစွာ ရည်မွန်နွေးထွေးနေသည်။
          “ ဘယ်သူလို့ ပြောလိုက်ရမလဲဟင် ”
         သူက စဉ်းစားသလို ခေတ္တပြတ်တောက်သွားပြီးမှ....
           “ အိ မဟုတ်လား...ကို ပါ ”
                  သူမ အံ့သြငြိမ်သက် သွားမိ၏။ ခပ်ဖြေးဖြေးနှင့် ပိုင်နိုင်စွာပြောလိုက်သော သူ့အသံကြောင့် ဇဝေဇ၀ါဖြစ်သွားရသည်။ သူ့အသံသည် ကြားဖူးနေကျ ဖုန်းသရဲတစ်ယောက်၏ အသံမျိုးမဟုတ် ပါ။ ပေါ့ပျက်ပျက်နှင့် ခနိုးခနဲ့နိုင်သော       အသံမျိုးလည်း မဟုတ်။
           ‘ ဘယ်က ကို လဲ.. ´
           ‘  ကို...လေ ´
     စိတ်ညစ်ညူး ရှုပ်ထွေးသွားရ၏။ မျက်မှောင်ကို ခပ်ဖွဖွတွန့်ရင်း `ငါ့မှာ ကို လို့ခေါ်ရတဲ့ ချစ်သူတယောက် (ဒါမှမဟုတ်) သူငယ်ချင်းတစ်ယောက် မရှိတာ သေချာပါတယ်နော်....´ ဟု သူမဖာသာတွေးရင်း ရယ်ချင် စိတ် ဖြစ်သွားသည်။
သူမမှာ ဖုန်းဆက်ရလောက်အောင် ခင်မင်ရင်းနှီးသော ယောင်္ကျားလေးသူငယ်ချင်း တယောက်တလေမျှပင် မရှိပေ။
         `ဖုန်းမှားဆက်မိတာ ထင်တယ်... ´
           ` မဟုတ်ဘူး...ကို အိဆီကိုပဲ ဆက်တာပါ ´
           သူမစိတ်ကျဉ်းကြပ်လာ၏။ ဘာဆက်ပြောရမှန်း စဉ်းစား၍မရသလို ဖုန်းချပစ်လိုက်ဖို့ကိုလည်း သတိမေ့လျော့စွာ သူ့၏ ရည်မွန်သောအသံနှင့် သူမနှင့်မသိပဲ သူမဆီဖုန်းဆက်ခြင်းကိုသာ နားမလည်နိုင် ရှိနေသည်။ ထိုစဉ်မှာပင် သူက...
           ` အိ...ကိုယ် အိကိုချစ်တယ်´ ဟု လှိုက်လှဲသော အသံတမျိုးနှင့် ဆိုလိုက်၏။ သူမ လန့်ဖျပ်တုန်လှုပ်စွာ စကားပြောခွက်ကို အလျင်စလိုချလိုက်မိလေသည်။ ကြည့်စမ်း....။ ဘယ်လောက်များ ရဲတင်းလိုက်သလဲ ဆိုတာ...။
         သူမ ၀မ်းနည်းသလို ခံစားလာရပြန်သည်။ တစုံတရာကို နှမြောတသစိတ်ဖြင့် ပင့်သက်ကို အသာရှိုက်ရင်း ဒရင်းဘက်ပေါ်သို့ လျော့ရဲစွာ လှဲချလိုက်ရ၏။ ဒီလို တည်ငြိမ်အိနြေ္ဒရသော သူ့အသံမျိုးဟာ ဒီလိုစကားမျိုး ခပ်လွယ်လွယ်ပြောလိုက်သင့် သတဲ့လား။
         သူမ စိတ်ကုန်စွာ ခေါင်းခါယမ်းပစ်လိုက်မိသည်။ သူလည်း ဖုန်းသရဲတယောက်ပဲ ဖြစ်နေပြန်ပြီပေါ့။ ဒါဆို.... ယဉ်ယဉ်ကျေးကျေးရှိတဲ့ သူ့အသံကို အထင်ကြီးမလို ဖြစ်မိသွားတာ...သူမအမှားပေါ့။
         အရာရာကို ခပ်လွယ်လွယ် ခပ်ပေါ့ပေါ့ တွေးခေါ် ပြုကျင့်တတ်သော..၊ မိန်းကလေးများကို အထင်သေး ရိထေ့ချင်သော... လူငယ်လေး တယောက်အဖြစ် သူ့အသံကို ထင်ရက်စရာတော့ မရှိပါ။
         ထိုနေ့မှစ၍ နေ့စဉ်ရက်ဆက် အချိန်မှန်လာတတ်သော ဖုန်းထဲမှသူ့အသံသည် ဘယ်တော့မဆို သူ့၏သိက္ခာကို အရောင်တင်နိုင်စွမ်း ရှိနေ၏။ သူ၏ အသွင်သဏ္ဍာန်ကို ခန့်မှန်းရနိုင်ရန် စွမ်းအင်တမျိုး ပါရှိနေသည်ဟု သူမကထင်လေသည်။
         သူသည် အရပ်ရှည်ရှည်၊ တောင့်တင်းသောခန္ဓာကိုယ်နှင့် ယောင်္ကျားပီသသော သဏ္ဍာန်ရှိမည်ဟု သူမက   လိုရာဆွဲ တွေးနေမိသည်။ သူ့မျက်နှာသည် ချောမောမနေတောင်မှ မွန်ရည်ပြေပြစ်လိမ့်မည်။ သူတပါးကို မထီမဲ့မြင်ပြုတတ်သော ခပ်ထေ့ထေ့အပြုံးမျိုး သူ့နှုတ်ခမ်းမှာ မရှိနိုင်ဟုလည်း သူမက ယုံကြည်နေမိပြန်သည်။ သူ့မှာ နူးညံ့သော မျက်ဝန်းတစုံလည်း ရှိမည်မှာသေချာ၏။ သူ့စကားသံထဲတွင် နူးညံ့စိုလက်နေသော မျက်ဝန်းတစုံကို သူမမြင်နေရတတ်သည်။
         ဖုန်းထဲမှ သူ့အသံကို အခြေခံ၍ သူမသည် စိတ်ကူးဖြင့် ပုံဖော်ကြည့်မိသည်မှာ ညတိုင်းလိုလို ...၊ တွေးတောရန် အားလပ်ချိန်တိုင်းလိုလို ဖြစ်လာသည်။
         ထို့အပြင် သူမစိတ်ကူးထဲမှ ခန့်ထည်သိမ်မွေ့သော  နှစ်လိုဖွယ် ရုပ်ရည်ပိုင်ရှင်သည် သူမ သဘောကျ   နှစ်ခြိုက်သော စိတ်ကြိုက်ပုံစံ ဖြစ်နေပြီး သူမ၏ အိပ်မက်သခင်လည်း ဖြစ်နေလေသည်။
 xxxxxx
         ခပ်စူးစူးဖုန်းမြည်သံကြောင့် အတွေးလွန်နေသော သူမ ဆတ်ကနဲ တွန့်သွားကာ ရင်ထိတ်သွားရ၏။ ဖုန်းကိုချက်ချင်း ကောက်ကိုင်လိုက်မည်ဟု လက်ရောက်သွားပြီးမှ သတိရသွားသလို ခေတ္တစောင့် ဆိုင်း ငြိမ် သက်နေလိုက်သည်။  သူ့ဖုန်းကို စောင့်နေသည်ဟု သူထင်သွားမှာမျိုးလည်း သူမ မလိုလားပါ။
         ပြုံးစေ့စေ့ လှမ်းကြည့်လာသော မိခင်ဖြစ်သူအား ခပ်ရှက်ရှက်ရယ်ပြလိုက်ပြီး သူမမျက်နှာမှာ အနည်းငယ် ထူအမ်းလာသလို ခံစားနေရ၏။ သူမ၏ မိဘများက ခေတ်မှီပွင့်လင်းသော စိတ်ထားမျိုးရှိကာ သူမကိုလွတ်လပ်ခွင့် အပြည့်ပေးထားပြီး ကိုယ့်ကိုယ်ကို ထိန်းထိန်းသိမ်းသိမ်း နေတတ်ရန်သာ ဆုံးမတတ် သည်။ သူမထံလာသော ယောင်္ကျားသံဖြင့်  တယ်လီဖုန်းများအား ကိုယ်တိုင်ကိုင်မိလျက်နှင့် သူမက ဗြောင်ညာကာ လက်ခံစကားပြောလေ့ မရှိသည်ကိုပင် မိခင်က  ကြားထဲမှ အားနာနေ တတ်သူ ဖြစ် သည်။
         ခြောက်ကြိမ်မြောက် ဖုန်းခေါ်သံအပြီးတွင် စကားပြောခွက်ကို အသာမကာ `ဟလို´ ဟု ခပ်တိုးတိုး အသံ
ပြုလိုက်၏။
           `ဟလို...ဒေါ်မမခင် ရှိပါသလားရှင်...´
            သူမ စိတ်ပျက်ညစ်ညူးသွားရကာ နှာခေါင်းရှုံ့ပစ်လိုက်ရင်း...
           ` ဟုတ်ကဲ့...ခဏကိုင်ထားပါနော်....´
ဖုန်းကိုမကာ မိခင်ရှေ့တွင် ချထားပေးလိုက်ပြီး သူမနေရာ ဒရင်းဘက်ပေါ်သို့ လျော့ရဲစွာ မှီလှဲလိုက်ရသည်။ သူ့ထံမှ ဖုန်းကိုစောင့်ရခြင်းသည် သူမအတွက် အလွန်ရင်မောစရာကောင်းသလို...ရင်ခုန်ကြည်နူးခြင်း တမျိုးကိုလည်း ခံစားရစမြဲ ဖြစ်၏။
         ဖုန်းဆက်တိုင်းလည်း သူမက `ဟလို´...ဟု ထူးလိုက်သည်နှင့် သူက `အိမဟုတ်လား...´ ဟုသာ နေ့စဉ်
မပြောင်းမလဲ စကားစပြောတတ်သည်။ ထိုအခါ သူမကလည်း သူ့အသံကိုမှတ်မိနေလျက်နှင့် မသိဟန်ဆောင် ကာ `ဘယ်သူလဲ´ဟု ပြန်မေးမည်။ ထိုအခါ သူက `ကို...ပါ´ ဟု ပြောမည်။ ဒီလိုပြောရင်တော့ သူမငြိမ်သက် သွားကာ ဘာဆက်လုပ်ရမည်မသိဘဲ ကြောင်ယောင်နေဦးမည်။ သူက `အိကိုချစ်တယ်´ ပြောလိုက် မှ သတိဝင်ကာ အလန့်တဖျပ် ဖုန်းချပစ်လိုက်ရင်း  ရင်ခုန်နေမိဦးမည်။ ဤသည်မှာ မပြောင်းလဲနိုင် ခဲ့သော သူမနှင့်သူ့အကြားရှိ နေ့စဉ်ကျင့်ဝတ်တခုလို ရှိနေလေပြီ။
         ဒီတခါ ဖုန်းဆက်ရင် သူဘယ်သူလဲဆိုတာ မရရအောင် မေးမည်ဟု...သူမအားခဲထား တတ်သော် လည်း တကယ်တမ်းကျတော့ သူ့အသံကြားသည်နှင့် အရာရာမေ့လျော့ကာ ရင်ခုန်လှုပ်ရှားလွန်း ၍ ကြောင်နေမိတော့သည်။  တခါကတော့ `အိကိုချစ်တယ်´ ဟု သူပြောလိုက်သည်တွင် စိတ်လွတ်စွာ သူမနှုတ်ခမ်းမှ ခနိုးခနဲ့ရယ်သံ ထွက်သွားမိ၏။
သူ့အသံနှင့် စိတ်ကူးကြည့်မိသော သူ့သဏ္ဍာန်တို့ကို သူမ နှစ်သက်သဘောကျသော်လည်း ဖုန်းနှင့် ခပ်လွယ်လွယ် ချစ်စကားပြောခြင်းကိုမူ သူမ မနှစ်မြို့နိုင်ပါ။ သူ့အပေါ် ခင်တွယ်စိတ်ကတဖက် သူ့အပြုအမူကို မနှစ်မြို့စိတ်က တဖက်ဖြင့် သူဖုန်းဆက်တိုင်း အမြဲတမ်းလိုလိုပင် သူမ သတိလက်လွတ် ဖြစ်နေတတ်သည်။
         သူကတော့ တည်ငြိမ်စွာပင် `အိကသိတ်ချစ်ဖို့ကောင်းတာပဲ´ ဟုသာ ဘာမှမဖြစ်သလို ပြောခဲ့၏။ ထို့နောက်သူမသည် စိတ်မကောင်းစွာဖြင့် စကားပြောခွက်ကို အသာအယာ ချပစ်လိုက်တော့သည်။ ထို့နောက်တွင်မှ သူမသည် တစုံတရာကို မကျေမချမ်းစွာ ငိုချင်စိတ်ပြင်းပြနေရင်း.. နောက်တနေ့ သူဖုန်းဆက်မှ သူဘယ်သူလဲဆိုတာ မေးမယ်။ မေးလို့မရရင် `နာမည်လေးတောင်ပြောဖို့ သတ္တိမရှိတဲ့ လူတယောက်နဲ့ ကျွန်မစကားပြောဖို့ အကြောင်းမရှိပါဘူး..´လို့ ခပ်တည်တည်ပြောပြီး ဖုန်းချပစ်လိုက်မည် ဟု တွေးမိပြန်သည်။
  တကယ်တမ်းတွင်တော့ သူ့အသံကြားလိုက်သည်နှင့် ကြိုတင်စဉ်းစားထားသမျှ စကားအားလုံး မေ့လျော့ သွားကာ စိတ်ညှို့ခံရသူတစ်ယောက်လို ပြတ်တောင်းတောင်း စကားများကိုသာ ထုံးစံအတိုင်း ဆိုမိပြီး ယောင်ယမ်း၍ ဖုန်းချလိုက်မိစမြဲ ဖြစ်လေသည်။
'''''''''''''''
         မိခင်၏စကားသံကြောင့် ပံျ့လွင့်နေသော အာရုံများကို အလျင်စလို ဖြတ်တောက်စုစည်း၍ နားစွင့်ထားလိုက်ရ၏။
          `ဒေါ်စိုးနွယ်ဆီက ဖုန်းပါ အဖေကြီးရယ်...။ သားတော်မောင် အလုပ်ကနေ ခွင့်နဲ့ပြန်ရောက်နေပြီတဲ့။
အဲဒါ မနက်ဖြန်ကျရင် သားကိုခေါ်ခဲ့ပြီး အိမ်လည်လာခဲ့မယ်တဲ့လေ....။ ´  
         ကြီးစွာသော စိတ်ခြောက်ခြား တုန်လှုပ်မှုကြောင့် အာမေဋိတ်သံ ခပ်တိုးတိုးပင် လွှတ်ကနဲ ထွက်သွားရသည်။ ကြည်လင်နေသော စိတ်သည် ရုတ်တရက် ညစ်ညူးနောက်ကျိသွားရ၏။ မျှော်လင့်ချက် စိတ်တခုဖြင့် တက်ကြွနေသော သူမ၏ စိတ်ကူးယဉ်လေးသည် မရေမရာအတွေးများကြောင့်ေ၀၀ါးသေးနုတ် သွားရလေသည်။
         ဖုန်းသံတခုကို စောင့်မျှော်ရင်ခုန်ခွင့် သူမမှာ ပျောက်ဆုံးသွားတော့မည်လား။ အနှောင်အဖွဲ့တခုဖြင့် သူမ နှလုံးသားကို အကျဉ်းချထား ခံရတော့မည်လား။
         သက်မဲ့ ဓါတ်ပုံတခုမှလွဲ၍ တကြိမ်တခါမျှ တွေ့ဆုံနားလည်မှု လုံးဝမရှိသော.....၊ မည်သို့မျှ အဆက်အသွယ်ပြုလုပ် ရင်းနှီးမှုမရှိသော... သူစိမ်းယောင်္ကျားလေးတယောက်ကို မိဘချင်း ခင်မင်ရင်းစွဲ ရှိရုံမျှနှင့်၊ ဆရာဝန်တယောက်ဖြစ်ရုံနှင့် သူမ မျက်စိမှိတ် ခေါင်းညိတ်လိုက်သင့်မည်လား။
         သူမက တကြိမ်တခါမျှ နှလုံးသား မလှုပ်ရှားဖူးသော်လည်း နှလုံးသားခံစားမှု ကင်းမဲ့သော အိမ်ထောင်ရေးမျိုးကိုမူ မည်သို့မျှ မနှစ်မြို့နိုင်ပေ။
  `သမီးဖုန်းက မလာတော့ဘူး ထင်ပါတယ်။ မေမေတို့ စကားကောင်းနေတာနဲ့ အချိန်တောင် လွန်သွားပြီနော်.. ´    
   သူမလှဲလျောင်းနေသော ဒရင်းဘက်နံဘေးမှ ဖုန်းတင်သည့် စားပွဲလေးပေါ်သို့ ဖုန်းကိုပြန်ထားရင်း ပြောလိုက်သော မိခင်၏စကားကြောင့် နာရီကို အလျင်စလို ကြည့်လိုက်မိ၏။ ရှစ်နာရီနှစ်ဆယ်...။ သူဖုန်းဆက်နေကျ အချိန်ကို မိခင်ကတောင် မှတ်မိနေပြီဖြစ်သည်။
         ဖုန်းမလာတော့ဘူး ထင်ပါရဲ့......။ ရင်ထဲမှာ မောသွားရသည်။
                
    ဒီလိုသာဆိုရင်ဖြင့် အားမလိုအားမရစိတ်နဲ့ပဲ သူ့အတွက် သူမစိတ်ထိခိုက်ရင်း ဒီညမှာ အချိန်ဘယ်လောက်ကြာကြာ အိပ်ပျက်နေရအုံးမှာပါလိမ့်။ သူနဲ့သူမက ဒီ့ထက်ပို နီးစပ်လာဖို့တော့ဖြင့် မလွယ်။ သူမဘ၀မှာ အချစ်ဆိုတာကို ခံစားနားလည်ရဖို့ ကုသိုလ်ကံ ပါးလျားမွဲနုံလွန်းတယ် ထင်ပါရဲ့။

  '''''''''''''''''
         တကယ်တမ်း ဒေါ်စိုးနွယ်တို့ မိသားစု ရောက်လာသောအခါ စိတ်ညစ်ညူးမှုမှာ ညကလောက် မပြင်းထန်တော့ပေ။ ပေါ့ပါးကြည်လင်စွာ နှုတ်ဆက်ပြုံးရယ်နေနိုင်၏။ သူ့ကိုလည်း တည်ငြိမ်စွာ ကြည့်ပြီး ပြုံးပြနိုင်ခဲ့သည်။
         သူက ဓါတ်ပုံထဲမှာထက်ပင် ပို၍ ကြည့်ကောင်းနေလေသည်။ အေးအေးဆေးဆေး နေတတ်မည့်ပုံရကာ စကားမဆိုပဲ ပြုံး၍သာ ငြိမ်နေ၏။ မိဘတွေတွန်းပို့မှုဖြင့် ခြံထဲသို့ ပန်းပင်တွေပြဖို့ဆိုကာ ဆင်းလာချိန်အထိ သူနှင့်သူမတို့ တယောက်နှင့်တယောက် စကားမပြောဖြစ်ကြသေးပေ။
         ပိတောက်ပင်အောက်ရှိ ထိုင်ခုံတန်းလေးသို့ အရောက်တွင်မှ သူမက “ ထိုင်ပါအုံးလား ” ဟု ဧည့်ဝတ်စကားတိုပြတ်ပြတ်ကို ဆိုမိလေသည်။ သူက မငြင်းဆိုပေမယ့် ၀င်မထိုင်ဘဲ သူမနှင့် မျက်နှာချင်းဆိုင်မှာ ရပ်တန့်ပစ်လိုက်ကာ သူမကို စိုက်ကြည့်နေ၏။
         ပထမတော့.... သူမက သူ့ကို ရိုးရိုးသားသားပင် ပြန်ကြည့်နေမိသေးသည်။ သို့ပေမယ့်...သူ့အကြည့်က  ကြာရှည်ကာ ဝေေ၀ရီရီ ရှိလွန်းတာမို့ သူမ နည်းနည်း ရင်ဖိုရှက်ရွံ့လာကာ ခေါင်းငုံ့ချလိုက်ရတော့သည်။
      ` ကို...အိကို တကယ်ချစ်တာပါ.´
                      `   အို... ´
                 သူမ ရုတ်တရက် လန့်ဖျပ်ကာ နောက်သို့ ခြေနှစ်လှမ်းစာမျှ ဆုတ်မိသွားပြီး မော့ကြည့်လိုက်မိ၏။
         ဘယ်လောက်များ အံ့သြစရာကောင်းလိုက်သလဲ.....။
ခပ်ပြေပြေ ပြုံးနေသော နှုတ်ခမ်းတစ်စုံမှ သိမ်မွေ့နူးညံ့သော စကားသံသည် အမှန်တကယ်ပင် ထွက်လာခဲ့ခြင်း ဖြစ်သည်။
            `သူ...သူ....ဒါဖြင့်.....သူပေါ့နော်...´
                 အံ့သြ၀မ်းသာစိတ်ဖြင့် ထစ်ငေါ့တုန်ရီစွာ အလျင်စလို ရောရောထွေးထွေး မေးလိုက်မိပြီးမှ သူမ ရှက်လန့်ကာခေါင်းငုံ့ချမိပြန်၏။ ထို့နောက် ချက်ချင်းပင် ခေါင်းပြန်မော့ကာ အဖြေကို သူ့မျက်နှာမှာ ဖွေရှာနေမိပြန်သည်။ သူက ဘာမှမပြောသေးဘဲ ပြုံး၍သာ ကြည့်နေလေသည်။
         အနီးကပ် ကြားလိုက်ရသော သူ့အသံသည် ညတိုင်းကြားနေကျ အသံပါးပါးထက် အနည်းငယ် ထူထဲပြည့်ဝ  သည်မှလွဲ၍ အခါများစွာကလို ကြည်လင်ညံ့သက် လှိုက်လှဲနေဆဲဖြစ်၏။ သူနှင့်သူမ၏ မိဘများ စကားပြောနေကြစဉ်က သူမကော်ဖီဝင်ဖျော်နေ၍ သူ့အသံကို မကြားလိုက်ရ။ ခုမှ သေချာကြားလိုက်ရပြီး အံ့သြတကြီး ဖြစ်နေရသည်။
           ` ကိုယ့်ကို အိ မှတ်မိတယ်လား.....ဒါဟာ ကိုယ့်အတွက် ၀မ်းသာစရာလားဟင်..´
                  ခေါင်းညိတ်လိုက်မိပြီးမှ အလျင်အမြန် ခေါင်းပြန်ခါလိုက်ရသည်။ ရင်ခုန်နှုန်းမြန်ဆန်ကာ လူကပါ ကတုန်   ကယင်ဖြစ်လာ၍ ခြေမခိုင်နိုင်တော့။ ခုံတန်းလေးပေါ် ထိုင်ချလိုက်ရ၏။
         သူက သူမ၏ ခေါင်းညိတ်ခေါင်းခါ အမူအယာကို ကြည့်ကာ ခပ်တိုးတိုးရယ်နေသည်။
             ` မန္တလးကနေ ဆက်ခဲ့ရတာပေါ့နော်...´
    `အင်း...မနေ့ညက မေမေတို့ရှိနေတာနဲ့ မဆက်လိုက်ရဘူး ´                                                                 
                 `  ဟင်...အန်တီနွယ်က..... ´
                       ` ဟုတ်တယ်...ဒါတွေ မေမေတို့ မသိသေးဘူး။ ပြောရမှာ နည်းနည်း ရှက်နေလို့...  ´
                  သူမ ပြုံးစေ့စေ့ဖြစ်သွားရပြီး သူ့ကို တချက်မော့ကြည့်လိုက်သည်။ သူကလည်း ရှက်ဟန်စွက်၍ ရယ်ကျဲကျဲ လုပ်နေလေသည်။ စိတ်ထဲမှာ သူနဲ့ရင်းနှီးလာကာ စကားပြောနေရခြင်းအတွက် လွတ်လပ်စွာ ပျော်ရွှင်လာရ၏။
  ` ကျွန်တော် အိကို မေမေစာရေးမှ သိရတာပေမယ့် မြင်ဖူးခဲ့တာ ကြာပါပြီ။          ဟိုး.....ကျောင်းနေတုန်း ကတည်းက...´
     `  ဟင်....အိတော့ သူ့ကို မသိပါဘူး။ ´
  ` ဟုတ်ပါတယ်။ ကျွန်တော်လည်း မသိခဲ့ပါဘူး။ မြင်ဖူးရုံတင်....အဲ...အမှန်ဝန်ခံရရင်....     အဲဒီမြင် ကတည်း က အိကို သဘောကျ စွဲလန်းနေခဲ့ရတာ....။ ဒါပေမယ့် ခုလို ပြန်ဆုံရမယ် လို့       မျှော်လင့်ချက် ကိုလည်း စွန့်လွှတ်ခဲ့တာ ကြာပါပြီ...။   ´
  `  အိ..နားမလည်ဘူး...´
   `ဒီလိုပါ...။ အိကို လွန်ခဲ့တဲ့ နှစ်နှစ်လောက်က မိန်းထဲက အီကိုကင်တင်းမှာ တစ်ခါ၊ သိပ္ပံကင်းတင်းမှာ          တစ်ခါ၊ တွေ့ခဲ့ဖူးတယ်။ ကျွန်တော့် သူငယ်ချင်းတွေနဲ့ ကင်တင်းမှာထိုင်ရင်းပေါ့...။ ပထမတစ်ခါက           အမှတ်တမဲ့ပါ။ ဒါပေမယ့်...နောက်တခါတွေ့တော့ အိကို ကျွန်တော် ကောင်းကောင်းမှတ်မိနေတယ်။
အိသူငယ်ချင်းတွေနဲ့ စကားပြောရယ်မောနေတာကို ကျွန်တော် ငေးကြည့်နေမိလို့ သူငယ်ချင်းတွေကတောင်
    နောက်ခဲ့ကြသေးတယ်။ ဒါပေမယ့် အိ ဘယ်သူဘယ်ဝါဆိုတာ မစုံစမ်း မမေးမြန်းခဲ့မိဘူး။ ကိုယ်ကလည်း           ကိုယ့်စာတွေနဲ့ပဲ နပန်းလုံးနေရတာနဲ့ မိန်းထဲနဲ့ တခြားကျောင်းတွေကို ရောက်ခဲတယ်။
 နောက်....တော်တော်ကြာတဲ့အထိ အိကို ခဏခဏ သတိရနေတာနဲ့ ကိုယ်တို့ စာမေးပွဲပြီးလို့ အားနေတဲ့
  နေ့တွေမှာ လာရှာပေမယ့် မတွေ့တော့ဘူး။ ဘယ်သူဘယ်ဝါ ဘယ်အတန်းကမှန်း မသိဘဲရှာရတာ
ဘယ်လွယ်ပါ့မလဲဗျာ..။ ဒါနဲ့ပဲ ကျောင်းပြီးသွားခဲ့ပြီး ဇာတ်လမ်းကလည်း အစပျောက်သွားပြီ  အောက်မေ့နေ တာ.....   ´
  `မေမေဓါတ်ပုံလာပြတော့ အိမှန်းသိလိုက်ရပြီး ကိုယ်အရမ်းဝမ်းသာသွားခဲ့ရတယ်။  အိ ဖုန်းနံပါတ်ကိုရှာပြီး ကိုယ် ညတိုင်း ဖုန်းဆက်ခဲ့မိတယ်လေ....။ ကိုယ်ဘယ်သူဆိုတာ ပြောပြဖို့  အမြဲကြံစည်ထားခဲ့ပေမယ့် မပြောခဲ့မိဘူး။ ပြောရလည်း ခက်နေတယ်လေ။ ဒါကြောင့်....  ဒါနဲ့...အိ ကိုယ့်ကို လက်ခံနိုင်မယ် မဟုတ်လားဟင်....။ အိမှာ ချစ်သူ ရှိမနေပါဘူးနော်....  ´
  စကားပြောရိုးသား၍ တုံးတိတိနိုင်လှသော သူ့ကို စနောက်ချင်စိတ်များ ရုတ်တရက် ဖြစ်ပေါ်လာသောကြောင့်...
       `ဟင့်အင်း....အိမှာ ချစ်တဲ့သူ ရှိတယ်။ ´
        ` ဗျာ...တကယ် ´
  ရုတ်တရက် နောက်သို့ ခြေလှမ်းဆုတ်ကာ သူတွေဝေသွား၏။ သူမကတော့ စိတ်ထဲမှာကြိတ်၍ ကျေနပ်
သွားသည်။ ဒီတခါ သူ့အလှည့်ပဲနော်...။ တို့ကို စိတ်ဆင်းရဲအောင် ညတိုင်းလုပ်ထားခဲ့တာတွေ သူပြန်လျော်ရမယ်။ သူ့ကိုလည်းနည်းနည်းတော့ စိတ်ဆင်းရဲအောင် ကြည်စားရမှာပဲ။
          မယုံကြည်ချင်သလို သူငေးနေရာမှ နာကျဉ်စွာ တချက်ရယ်၏။
       `အသဲကွဲတယ်ဆိုတာ ကျွန်တော် မယုံခဲ့တဲ့ဥစ္စာပဲ...။ ခုတော့...ကျွန်တော် ယုံပြီ။ ကျွန်တော်   နောက်ကျသွားပြီပေါ့နော်...´
                          `  အင်း...ဟုတ်တယ်။ တစ်လလောက်ပါ။ သူနောက်ကျခဲ့တာ......။ ´
                    `သြော်...သူ့ကို အိ ချစ်လိုက်တာ တစ်လလောက်ပဲ ရှိသေးတယ်လား ´
        ` သိပ်မဟုတ်သေးဘူး။ သူ့အသံ စကြားစကတော့ ဘယ်ဟုတ်ဦးမလဲ။ နဲနဲကြာလာတော့မှ သံယောဇဉ်
  ရှိလာတာ..... ´
  ` သူက ဘယ်သူတဲ့လဲ... ´
   စိတ်အားထက်သန်လွန်းလို့ မဟုတ်ပါဘဲ ၀တ်ကျေတမ်းကျေ လေသံ...၊ ဒါမှမဟုတ် စိတ်ပျက်အားလျော့သောလေသံဖြင့် သူက မေးလိုက်၏။ စိတ်မကောင်းဖြစ်နေသော သူ့ဟန်ပန်ကြောင့် သူမစိတ်ထဲမှာ သနားသွားရရင်း အချိန်သိပ်ကြာအောင်တော့ မညှင်းဆဲရန် ဆုံးဖြတ်လိုက်ရသည်။
          `သူက ဖုန်းသရဲလေး တစ်ယောက်ပေါ့...´
                             `ဗျာ...ဖုန်းသရဲ... ´
  ဇဝေဇ၀ါ အတွေးကြောင့် အူလည်လည် ဖြစ်သွားသော သူ့မျက်နှာသည် လွန်စွာမှ ကြင်နာဖွယ် ဖြစ်နေ သည်။
            ` သူက ဘယ်သူလဲဟင်...´
                         `  သူက ကို တဲ့...´

                `  ဟာ...အိ....ကို....ကို....´
  နံဘေးသို့ ဖြတ်ကနဲ ၀င်ထိုင်လိုက်သော သူ့ကြောင့် သူမလန့်ဖျတ်ကာ မတ်တတ်ရပ် လိုက်၏။ ပျော်ရွှင် သွားသော သူ့မျက်နှာကို ကြည့်ကာ ရင်ခုန်နွေးထွေးလာရပြန်သည်။ ဒီလိုကျတော့လည်း ဖူးစာကံဟာ သူမအတွက်တော့ သိတ်ကောင်း နေပါလားဟင်...။ စိတ်ညစ်ညူး ရှုပ်ထွေးနေခဲ့ရတာတွေဟာ ခုတော့လည်း ကြည်နူးချမ်းမြေ့စရာတွေ ဖြစ်ကုန်ကြပြန်ပြီပေါ့။
         တွေ့တယ်မဟုတ်လား...။ သူ့အသံဟာ တည်ငြိမ်ယဉ်ကျေးတဲ့ လူကြီးလူကောင်းတယောက်ရဲ့ အသံမျိုးပါဆိုတာ...။
         ဘယ်သူဆိုတာ မပြောဘဲ ဖုန်းထဲမှ နောက်ပြောင်ကာ ချစ်စကားပြောခြင်းမျိုးကို မုန်းသောသူမအဖို့ ခုလို ဖုန်းသံရှင်တစ်ယောက်နှင့် ဖူးစာဖက်မိခြင်းမှာ လောကကြီးရဲ့ ကျီစားပြက်ရယ်ပြုမှု သက်သက်ပဲ ဖြစ်လိမ့်မည် ထင်၏။
ဘာပဲဖြစ်ဖြစ်....သူ့တယောက်ကိုတော့ မျက်နှာလိုက်စွာ ခွင့်လွှတ်ကျေနပ်လိုက်လေသည်။ အချစ်ဟာ မျက်နှာလိုက်တတ်သည်မဟုတ်ပါလား။
         သူမအတွေးနှင့် သူမ ပြုံးရွှင်လာကာ...
          ` အထဲဝင်ကြစို့ ´  ဟု သူ့ကို ပြောပြီး ရှေ့မှလျှောက်လာခဲ့၏။ သူကလည်း ဘာမှ စောဒကမတက်ဘဲ
သူမဘေးမှ ယှဉ်လျှောက်လာကာ ရှက်သွေးဖြန်းနေသော သူမမျက်နှာကို ငုံ့ကြည့်ပြီး ခပ်ရွှင်ရွှင် မျက်နှာထားနှင့် ရင်ခုန်ကြည်နူးစရာ စကားတစ်ခွန်းကိုသာ ဆိုလိုက်လေသည်။
           " ညကျရင်...ကို..ဖုန်းဆက်လိုက်မယ်နော်...။ "                                                  
''''''''''''''''''''
ဝေ(စီးပွားရေးတက္ကသိုလ်)
August, ၁၉၉၁...မြှားနတ်မောင်မဂ္ဂဇင်း

နှောင်ကြိုးငင် ပိုးဖလံ




 တောင်တစ်တောင်ကိုတော့ ကျော်ပြီးခဲ့ပြီ။ ဝေဟင်က ပျံသန်းပြီး ကျော်ခဲ့တာတော့ မဟုတ်ဘူးပေါ့။        တောင်ခါးပန်းက ပတ်ဖောက်ထားတဲ့ကားလမ်းလေးကနေ ကွေ့ပတ်ပြီး စီးတော်ဆိုင်ကယ်လေးနဲ့
ဖြတ်ကျော် လာခဲ့တာ။ ချိုင့်ကလေးတွေ၊ အနိမ့်အမြင့်လေးတွေ၊ ကျောက်စရစ်ခဲတွေနဲ့...။
ဘုရားစူး...ကတ္တရာလမ်း။
      ပတ်ဝန်းကျင်အသွားအလာကလည်း ကျဲပါးလွန်းတာမို့ လကမ္ဘာပေါ် ကိုယ်တစ်ယောက်တည်း အိပ်မက်ခရီးနှင်နေသလိုတောင် ထင်ချင်လာမိတယ်။
       အိပ်မက်ဆိုတာကတော့ အပြင်မှာ ကိုယ်စွဲလန်းလွန်းတဲ့အရာတွေကို တစ်ခါတလေ စိတ်အလိုလိုက်ပြီး ဖြစ်ချင်သလို ဖြစ်ကြည့်တာမျိုး မဟုတ်လား။ ဒါပေမယ့် ဆောင်းတွင်းအိပ်မက် ကျတော့လည်း ကိုယ် မလိုလားတာတွေ၊ ကိုယ်မထင်မှတ်တာတွေ၊ ကြောက်လန့်စရာတွေကို ကယောက်ကယက်နဲ့ အဆီအငေါ်မတည့် တွေ့ရတာမျိုးလေ။
     အခု ကျွန်တော့်အဖြစ်ကတော့ နွေလယ်ခေါင် ခြောက်အိပ်မက် မက်နေရသလိုပါပဲဗျာ။ လူတစ်ကို်ယ်နဲ့ ဘ၀နှစ်ခု တစ်ပြိုင်တည်း ရှင်သန်လှုပ်ရှားနေရတယ်။ တစ်ခုက နတ်ပြည်ဆို...၊ တစ်ခုက ငရဲပဲ။
တစ်ခုက မီးဆို...တစ်ခုကရေပဲ။ တစ်ခုက အပူဆို... တစ်ခုက အအေးပဲ။
      ဒါဆို အခုသွားရာလမ်းဟာ အအေးကနေ အပူဆီကိုကူးရာ နယ်ခြား။ နတ်ပြည်ကနေ ငရဲကို သွားရာလမ်းကြောင်း။ ငြိမ်းချမ်းအေးမြမှုကနေ ပူပြင်းလောင်မြိုက်မှုတွေဆီ ကျွန်တော်ပြန်လာခဲ့မိတာ။
  ပိုးဖလံကောင်ေးလတွေလိုပေါ့။ မီးမှန်းသိပေမယ့် တိုးဝင်ချင်တယ်။ ပူမယ်မှန်း သိပေမယ့် လောင်ကျွမ်းချင်တယ်။ ကျွန်တော်ဆိုတဲ့လူသားကတော့ ငွေရမယ်မှန်းသိနေတာမို့ ဒီလမ်းကို တောင်တွေကျော်ပြီး ဖြတ်ရဦးမယ်လေ။
                                                                   xxxxxxx

    “ မီး ကားမလိုချင်တော့ပါဘူး ဖေကြီးရယ်။ ပြန်မသွားပါနဲ့တော့နော်။ မီးတို့မှာ ဆိုင်ကယ်လေး ရှိသားပဲလေ နော”
     ငိုမဲ့မဲ့သမီးအသံလေးက ကျွန်တော့်ရင်ထဲမှာ တငွေ့ငွေ့လောင်ကျွမ်းနေတဲ့ ဝေဒနာမီးကိုလေပင့်ပေးလိုက် သလိုပဲ။ ချုံးပွဲချပြီးသာ ငိုလိုက်ချင်တော့တယ်။ ယောက်ျားတစ်ယောက်၊ အိမ်ထောင်တစ်ခုရဲ့ ဦးစီးဦးဆောင်တစ်ယောက် ဆိုတဲ့  တာဝန်အသိကသာ ထိန်းချုပ်မထားခဲ့ရင်... ကျွန်တော် ဒီနေရာကနေ လှည့်ပြန်ချင်နေပြီ။ ကျွန်တော် ဒီအခြေအနေကနေ ရုန်းထွက်ချင်နေပြီ။. ကျွန်တော် ရှေ့တန်းကနေ တပ်ဆုတ်ချင်နေပြီ။
     တစ်ခါမှ ခရီးဝေးမခွဲဖူးသေးတဲ့ ငါးနှစ်အရွယ် သမီးလေးက ဖအေကို လွမ်းလှပြီတဲ့လေ။
   ထူးထူးဆန်းဆန်း “ ကားစီးချင်တယ်။ ၀ယ်ပေးပါ..” လို့ မပူဆာစဖူး ပူဆာလိုက်တဲ့ သမီးလေးရဲ့စကားကြားရပြီး မကြာခင်မှာပဲ တိုက်တိုက်ဆိုင်ဆိုင် ငွေတော်တော် ရနိုင်မယ့် အလုပ်တစ်ခုက ပေါ်လာတယ်။
     ဘ၀မှာ အခွင့်အရေးတစ်ခုဟာ နှစ်ခါမလာဘူးတဲ့။ အခွင့်အရေးရတုန်း အမိအရဆုပ်ကိုင်နိုင်မှသာ
အောင်မြင်မှုကို လက်လှမ်းနိုင်မယ်။ အခွင့်အရေးကို လက်လွှတ်ဆုံးရှုံးခံလိုက်ရင် အောင်မြင်မှုဆီ ဘယ်လှေကားနဲ့တက်မလဲ။
      ခက်တာက ကျွန်တော်နင်းတက်ရမယ့် လှေကားထစ်တွေက ကျွန်တော့်ရဲ့ယုံကြည်မှု၊ ခံယူချက်၊ ကိုယ်ကျင့်တရားတွေဆိုတာ ခပ်စောစောက ကျွန်တော်မသိခဲ့တာဘဲ။
    အတွေ့အကြုံမရှိခဲ့တာလေ။ ကျွန်တော့်ဝါသနာ၊ ဗီဇ၊ ကျွန်တော့်ရဲ့အသွေးအသားထဲ ကိန်းအောင်းနေတာက အနုပညာချင်ခြင်းတွေပဲ။ ကျွန်တော် စီးပွားကောင်းကောင်း မရှာတတ်ဘူး။ သံစဉ်စားသားတွေပဲ ရှာဖွေနေချင်တယ်။ ကျွန်တော် ငွေကြေးဂုဏ်ဓနတွေ မမက်မောဘူး။ ဂီတ၊ ကဗျာကိုပဲ ဖက်တွယ်ထားချင်တယ်။ ကျွန်တော် ရာထူးစည်းစိမ်တွေ မမြင်တတ်ဘူး။ ချစ်ခြင်းမေတ္တာကိုပဲ တန်ဖိုးထားချင်တယ်။
    ကျွန်တော် ကံကောင်းပါတယ်။ ဂုဏ် ပကာသန၊ စည်းစိမ်တွေ ဝေဆာအုံ့ဆိုင်းနေတဲ့ ပင်ယံထက်က ပန်းကလေးတစ်ပွင့် ကျွန်တော့်ရင်ခွင်ထဲ ကြွေကျသက်ဆင်းလာခဲ့တယ်။ အဲဒီပန်းကလေးက အနုပညာရနံ့တွေလည်း သင်းမွှေး၊ နားလည်မှုတွေလည်း ကြိုင်လှိုင်နေခဲ့သေးတယ်လေ။
    နှစ်ကိုယ်တူဘ၀ခရီးအစက ကျွန်တော့်တစ်သက်မှာ အပျော်ရွှင်ခဲ့ဆုံးအချိန်တွေပါ။ မောင်နှံတူစုံတွဲပြီး သံစဉ်တွေကြားမှာ ၀ဲပျံနေလိုက်ကြတာ။ ပန်းပေါင်းစုံကလည်း ထုံသင်း။ သက်တံ့ရောင်စုံကလည်း ဖန့်ဝင်းလို့ပေါ့။
     ကျွန်တော် ဦးဆောင်ကြိုးစားထားတဲ့ တီးဝိုင်းလေးပေါ်ကို စိတ်တူဝါသနာတူ ချစ်သူကို လက်တွဲ
ခေါ်တင်နိုင်ခဲ့တယ်။ ထမင်းမေ့ ဟင်းမေ့ သီချင်းတွေ ရေးကြဆိုကြရင်း၊ နယ်မြို့လေးက စတိတ်ရှိုးတိုင်းမှာ ပွဲတိုင်းကျော်ကြရင်း..၊ တီးဝိုင်းကရသမျှ အနုပညာကြေးတွေကို တစ်ဖွဲ့လုံး စိတ်တူသဘောတူ ဘယ်သူမှ ခွဲဝေမယူကြဘဲ စေတီငယ်လေးတွေမှာ ထုံးသင်္ကန်းကပ်လှူကြတယ်။ တောရကျောင်းလေးတွေမှာ အလှူသွားလုပ်ကြတယ်။
  ပိုက်ဆံတစ်ပြားမှ မရတဲ့ အနုပညာအလုပ်တွေကို ပျော်ရွှင်တက်ကြွစွာလုပ်ရင်း စားဝတ်နေရေးအတွက် ငွေအနည်းအကျဉ်းရတဲ့ အလုပ်တစ်ခုကိုလည်း ၀တ်ကျေတမ်းကျေ လုပ်နေဖြစ်ခဲ့တယ်။ ယောက္ခမတွေ ပြန်မခေါ်မချင်းဘဲ ဆိုပါတော့။
    ငွေကြေး ပညာ ဂုဏ်ပကာသန ဘာတစ်ခုမှ မရှိဘဲ အနုပညာပိုးတွေသာ တရွရွထိုးနေတဲ့ ကျွန်တော်နဲ့ သဘောမတူတဲ့ အသိုင်းအ၀ိုင်းကလည်း ကြာကြာတော့ စိတ်မဆိုးနိုင်အားပါဘူး။ သမီးလေးးတစ်ယောက်တည်း ရှိတာ ဆိုတော့လေ။ ဒါပေမယ့် ကျွန်တော်ကတော့ သူတို့ပြန်မခေါ်ခင်က နှစ်ယောက်တည်း ပျော်ရွှင်စွာ ရုန်းကန်ခဲ့ရတဲ့ ဘ၀ကို ပိုမက်မောတယ်ဗျာ။
     ဂုဏ်ဓနအသိုင်းအ၀ိုင်းထဲကို ၀င်ရပြီဆိုကတည်းက ကျွန်တော့်ခန္ဓာကိုယ်ထဲက အနုပညာပိုးတွေဟာ ပိုးသတ်ဆေးအမျိုးမျိုးနဲ့ တိုးတော့တာပေါ့။ ဘယ်ရှောင်နိုင်လိမ့်မလဲ။
  အသိအမှတ်ပြုလိုက်တဲ့ အသိုင်းအ၀ိုင်းထဲ ၀င်ခွင့်နဲ့ ထူထောင်ပေးတဲ့ စီးပွားတစ်ခု အတွက် ကျေးဇူးတရားတွေ က နာမည်ရစပြုနေတဲ့ ကျွန်တော့်တီးဝိုင်းလေးကို တဖြည်းဖြည်း သွေးအေးစေ ခဲ့ပြီလေ။ လူမှုဘ၀ ရပ်တည်ရေးအတွက် လောဘအပူမီးတွေဟာ တစ်ဖက်က အနုပညာစီးဆင်းမှု ကို အေးခဲစေခဲ့ပြီ။
    ကြင်သူကို တင်ဆောင်ရင်း တအိအိနင်းခဲ့ရတဲ့ စက်ဘီးလေးကနေ လိုရာခရီးချုံ့ အမြန်ဆောင်ကျဉ်းပေးနိုင်မယ့် ဆိုင်ကယ်လေးအဖြစ် ပြောင်းလဲနိုင်ဖို့အခါမှာ...၊ ယောက္ခမတွေ ၀ယ်ပေးထားတဲ့ ပျဉ်ထောင်အိမ်လေးကနေ သင့်တင့်လျောက်ပတ်တဲ့ တိုက်အိမ်လေးအဖြစ်ကို တိုးတက်စေတဲ့အခါမှာ..၊ နှစ်ကိုယ်တူဘ၀လေးကနေ ဆည်းလည်းလေးတွေ အိမ်မှာ ချိတ်ဆွဲလာချင်တော့ တဲ့အခါမှာ...၊ ပိုးသတ်ဆေးတွေဟာ တဖြည်းဖြည်း အဆင်မြင့်် ပြင်းထန်လွန်းလာတာမို့ ကျွန်တော်ပျိုးထောင်ခဲ့တဲ့ တီးဝိုင်းလေးကို ကျွန်တော်ကိုယ်တိုင်ပဲ ကျောခိုင်း လိုက်ရတော့တယ်။ ကျွန်တော်မရှိရင် ဦးဆောင်နိုင်တဲ့ အရည်အချင်းလည်း တစ်ယောက်မှ မရှိကြတာမို့ တစ်စစီ ပြိုကွဲသွားတဲ့ အနုပညာဖွဲ့စည်းမှုတစ်ခုဟာ သင်္ခါရရဲ့ ပြယုဂ်တစ်ခုပါပဲလေ။
     အဲဒီအချိန်မှာ ၀မ်းနည်းကြေကွဲမှုကို အာရုံစူးစိုက်မခံစားအားသေးတဲ့ ကျွန်တော်ဟာ ဖခင်ကောင်းတစ်ယောက်ဖြစ်အောင် ရုန်းကန်နေရပြန်သေးတော့ တရွရွထိုးခဲ့တဲ့ပိုးတွေ တစ်ကောင်မကျန်
သေကုန်ပြီလားတောင် ထင်မိတော့တယ်။
    ဂစ်တာအိုလေးလည်း ကြိုးပြတ်ဖုန်တက်ပြီး စတိုခန်းထဲက ချောင်တစ်ချောင်မှာ...။ ကျွန်တော်လည်း တစ်နေကုန် အလျဉ်မပြတ် အော်ဟစ်ဆူညံနေတဲ့ လက်ဖက်ရည်ဆိုင်ကြီးတစ်ဆိုင်ရဲ့
ငွေသိမ်းကောင်တာခုံပေါ်မှာ...။ လက်တွဲဖော်ကလည်း သားသမီးနှစ်ယောက်နဲ့ ကျောင်းပို့ကျောင်းကြို ကျူရှင်စုံတွေကြားမှာ...။
     မိသာစု လိုအပ်ချက် ငွေကြေးကို အလျင်စလိုရှာဖွေနေမိတဲ့ ကျွန်တော်ဟာ ကိုယ့်ကိုယ်ကိုယ်ကျတော့ ရှာဖွေမတွေ့တော့ဘဲ ပျောက်ဆုံးနေခဲ့ရတယ်။ ဖြစ်ချင်တဲ့ဘ၀နဲ့ ဖြစ်နေတဲ့ဘ၀ နှစ်ခုကြားက တကယ်တမ်း နယ်နိမိတ် အနားသတ်ဟာ အစိမ်းရောင်ငွေစက္ကူလေးတွေပါလားလို့ ရင်နင့်နာကြည်းမိတော့တယ်။
                                                                    xxxxxxx

    ဆောက်လက်စအိမ်လေး တစ်ဝက်တစ်ပျက်မှာ ကျွန်တော့်လက်ထဲ ပိုက်ဆံပြတ်သွားတယ်။ အမှန်က မှန်းထားတဲ့ ကုန်ကျစရိတ်ထက် နှစ်ဆရှိမှ အိမ်ဆောက်သင့်တယ်ဆိုတာကို အချိန်လွန်မှ သိရတာလေ။
နှစ်ဖက်မိဘကိုလည်း ဒုက္ခမပေးချင်တာကြောင့် တိုးလိုးတန်းလန်းဖြစ်နေတဲ့ ဆောက်လက်စအိမ်ကို အပြီးသတ်နိုင်ဖို့ မိတ်ဆွေတစ်ယောက်ဆီက ခဏလှည့်ရတယ်။
    အိမ်အပြီးသတ်ပြီးခါမှ ဘဏ်မှာ ပေါင်လို့ရတဲ့ ပိုက်ဆံနဲ့ပြန်ဆပ်ရတာပေါ့။ ဘဏ်တိုတင် တစ်လတစ်သိန်း
နီးပါး ပေးရတာမို့ ကိုယ့်အိမ်ကိုကိုယ် တစ်လတစ်သိန်းနဲ့ အိမ်လခပေးနေနေရသလိုတောင် လင်မယားနှစ်ယောက်ပြောပြီး ရယ်မောမိသေးတယ်။
     စားနိုင်သောက်နိုင် အတိုးပေးနိုင်လောက်တဲ့ ၀င်ငွေရှိပေမယ့် ပေးရတဲ့အတိုးကလည်း မနည်းလှတော့
စုငွေကျန်ဖို့ကြိုးစားရင်း လတိုင်း ကျွန်တော်တို့လင်မယား ရင်မောရတာပါပဲ။ သားနဲ့သမီး ကျောင်းစရိတ်
ကတင် လူတန်းစေ့ မျက်နှာမငယ်စေဖို့ လိုအပ်ချက်ဘယ်လောက်ကြီးတာ မိဘတိုင်းအသိလေ။ အရောင်းအ၀ယ်ကောင်းတဲ့လမှာ စုမိတဲ့ငွေလေး နည်းနည်းပါးပါးဟာ အရောင်းအ၀ယ်ပါးတဲ့လမှာ အသုံးစရိတ်ထဲ ပါသွားပြန်ရော။
    ဒီလိုနဲ့ လေးငါးနှစ်လောက်ကြာလာတော့ အတိုးပေးနေရတဲ့ အကြွေးလေးသာမရှိခဲ့ရင် ကားစီးနိုင်နေပြီလို့ တွက်တွက်ပြီး သက်ပြင်းတွေသာ ကျိတ်ကျိတ်ချရတဲ့ အကြိမ်တွေလည်း များခဲ့ပေါ့။
    အဖြစ်က လမ်းလျှောက်စက်ပေါ် လမ်းလျှောက်နေမိသူလိုပဲ။ ဘယ်လိုကြိုးစားရုန်းပေမယ့် နေရာမရွေ့ဘဲ
လူကသာ ခြေကုန်လက်ပန်းကျလာတယ်။ ခရီးက ရှေ့ကို မတိုးဘူးဖြစ်နေတယ်။
    ဒီအချိန်မှာပဲ ညီမလေးနဲ့ အိမ်ထောင်ကျတဲ့ ယောက်ဖတော်သူရဲ့ ကူညီစောင်မမှုတစ်ခုဟာ ကျွန်တော့်ဘ၀အတွက် လှေကားထစ်လေးတစ်ခု ဖြစ်လာခဲ့တယ်။
     လောကကြီးရဲ့ ကံကြမ္မာကျီစားမှုက ရယ်တော့ရယ်ချင်စရာပါ။ မြန်မာစာ အဓိကနဲ့ ဘွဲ့ယူပြီး သီချင်း ကဗျာရေး၊ ဂစ်တာတီးတဲ့ ကျွန်တော်က ကန်ထရိုက်လုပ်ရမတဲ့။ ဆောက်လုပ်ရေး  အတွေ့အကြုံဆိုလို့
ကိုယ်ပိုင်တိုက်အိမ်လေးတစ်လုံးပဲ ဦးဆောင်ဆောက်ဖူးတဲ့သူက ရထားလမ်းဖောက်ရာမှာ   ရေကျော်ခုံးကျော်တံတားလေးတွေ ကန်ထရိုက်ရခဲ့တယ်။
     ကျွန်တော်နေထိုင်ရာမြို့လေးရဲ့ တစ်ဖက်ကမ်း၊ ဧရာဝတီမြစ်ကြီးရဲ့ အနောက်ဘက်တောင်လေး တစ်လုံးနှစ်လုံးလောက် ကျော်ပြီးရင်ရောက်ပြီ။ ရထားလမ်းအသစ်ကြီးဖောက်ဖို့ မြေဖို့ထားတဲ့ တာပေါင်ကြီးဘေးက လယ်ကွင်းတွေထဲမှာ ကျွန်တော်နဲ့ပန်းရန်ဆရာရော၊ အကြမ်းသမားရော၊
ဆယ်ယောက်ကျော်တပ်စုကလေး စခန်းချဖို့ရောက်သွားတော့ နွေဦးရာသီ။ ဆောင်းပန်းချီတောင် မပြယ်ချင်တတ်သေးဘူး။ လယ်ကွင်းတွေကတော့ ပပ်ကြားအက်အက်စပြုနေပြီ။
      အတွေ့အကြုံမရှိတဲ့သူဆိုတော့ စရိတ်စကဖိစီးပြီး အမြတ်မကျန်မှာကိုဘဲ ကျွန်တော် အလွန်အမင်း
ပူပင်နေမိတယ်။ ကန်ထရိုက်စလုပ်ပြီဆိုတာနဲ့ နီးစပ်ရာမိတ်ဆွေတချို့ကလည်း ဘယ်သူကဖြင့် ဘာကန်ထရိုက်ယူလိုက်တာ၊ ဘယ်လောက်ရှုံးသွားတာ၊ ဘယ်လိုထိသွားတာ စသဖြင့် သတိပေး သတင်းလေးတွေကိုလည်း လူသတင်း လူချင်းဆောင်လာကြတာကိုး။
     ညီမလုပ်တဲ့သူကတော့ အားပေးရှာပါတယ်။
     “ ကိုကြီးရေ... စီးပွားရေးသမား လုပ်ငန်းရှင်တွေ မမြတ်ဘူး ညည်းတာ အလကား။ လိုချင်သလောက် အမြတ်မရလို့ပြောတာ။ ရှုံးတယ်ပြောရင် မှန်းသလောက်မကိုက်လို့။ မဆိုးပါဘူးဆိုရင် ထင်တာထက် ပိုပိုက်သွားလို့သာမှတ်။ တွေဝေမနေနဲ့။ ဆက်သာလုပ်..” တဲ့။
     နောက်တန်းက ညီမက တွန်းအားကောင်းပေမယ့် အလယ်တန်းက လက်တွဲဖော်က ဆီမထိုးသလို၊ ရှေ့တန်းတက်ရမယ့် ကျွန်တော်ကိုယ်တိုင်ကလည်း ဆီမလိုက်ဘဲ တွန့်ဆုတ်တွေဝေစွာနဲ့ပေါ့။
                                                                      xxxxxx
      ဘာပဲဖြစ်ဖြစ်...မရဲပေမယ့် ကျွဲပြဲတော့စီးမိခဲ့ပြီ။
      ကိုယ်ဆောက်ရမယ့်တံတား ဧရိယာကိုကြည့်လိုက်တော့ ကိုယ့်အိမ်ထက်တောင်ကြီးနေသေးတယ်။ အင်ဂျင်နီယာရုံးက ချပေးလိုက်တဲ့ စကေးကို တိုက်တစ်လုံးဆောက်ဖူးတဲ့ အတွေ့အကြုံရယ်၊ အများပြည်သူ
ခရီးလမ်း ဖြောင့်ဖြူးစေဖို့ဆိုတဲ့ စေတနာရယ်၊ နောက်တန်းက ညီမလေးပံ့ပိုးပေးလိုက်တဲ့ ရင်းနှီးငွေရယ်၊ အိမ်ဆောက်တုန်းက ပန်းရန်အဖွဲ့ရယ်...၊ လက်တွဲပြီး ရှေ့ဆက်ချီတက်ခဲ့ကြတယ်။
    ပန်းရန်အဖွဲ့နဲ့ပဲ အတူတူ မြေစိုက်တာပေါ်လင်တဲလေးထိုးပြီး အတူနေ၊ အတူစား၊ ၀ါးကပ်လေးခင်းပြီး အိပ်ခဲ့ရတာတောင် တစ်လကျော်ခဲ့ပြီ။ နေ့ပူညချမ်း တပေါင်းလထဲမှာ နေ့လယ်ခင်းဆိုရင် ရထားလမ်းနဲ့ နီးစပ်ရာကားလမ်းပေါ်မှာ၊ နေရှိန်ပြင်းပြင်းအောက်မှာ စီးတော်ဆိုင်ကယ်လေးနဲ့ ကျွန်တော်။
လိုအပ်တဲ့ စားနပ်ရိက္ခာနဲ့ အုတ်၊ သဲ၊ ကျောက်၊ ဘိလပ်မြေကအစ သောက်၊ သုံး၊ ချိုးဖို့ ရေအဆုံး... လိုအပ်ချက်အားလုံး ဆိုက်ထဲရောက်အောင် အချိန်နဲ့အပြိုင် ပြေးလွှားရတယ်။
     အချိန်ချုံ့နိုင်မှ စရိတ်သက်သာမှာဆိုတော့ အချိန်နဲ့အမျှ ကျွန်တော့်စွမ်းဆောင်အားကို ပိုမြှင့်ပြီး အသုံးပြုခဲ့ရတာပေါ့။ စိတ်ကူးထဲမှာ၊ ပါးစပ်ဖျားမှာ လွယ်ကူတဲ့ကိစ္စမှန်သမျှဟာ လမ်းပန်းဆက်သွယ်ရေး သိပ်မကောင်းလှတဲ့ ကျွန်တော့်စခန်းမှာ ထင်ထားတာထက် လေးငါးဆ ခက်ခဲပင်ပန်းလှပါတယ်။ အနုပညာသမားဖြစ်ချင်တဲ့ ကျွန်တော်ဟာ ဘ၀တိုက်ပွဲကို ခပ်ကြမ်းကြမ်းချီတက်နေရတဲ့အဖြစ်မှာ အံဝင်ခွင်ကျ ဘယ်လိုလုပ်ရှိမလဲဗျာ။
     နေ့လယ်ခင်းဆို ပူလွန်းလို့ နေစရာမရှိတဲ့ လယ်ကွင်းပြင်ကြီးထဲမှာ ချွေးတွေမတရားထွက်ပေမယ့်
ခန္ဓာကိုယ်ကို စမ်းကြည့်လိုက်ရင် ချွေးမထွက်ခဲ့ဖူးလို့တောင် ထင်ရလောက်အောင် တိုက်တဲ့လေက
ခြောက်သွေ့ကြမ်းတမ်းလွန်းတယ်။ ညကျတော့လည်း သစ်ပင် အကာအကွယ်မရှိပြန်တော့ အကာအရံ
မလုံတဲ့တဲထဲမှာ စောင်ခြုံအိပ်ပေမယ့် အရိုးစိမ့်နေအောင် အေးပြန်ရော။
     တစ်တောင်လောက် ဇိမ်ခံမွေ့ရာအထူကြီးနဲ့ အိပ်နေကျတော့မဟုတ်ပေမယ့် ၀ါးကပ်ပေါ်ခင်းထားတဲ့ ဂွမ်းကပ်ပါးပါးလေးက ခိုးလိုးခုလုနဲ့မို့ မိုးလင်းရင် ကိုင်အရိုက်ခံထားရသလို တစ်ကိုယ်လုံးနာကျင် ကိုက်ခဲ
နေတယ်။ ဒါပေမယ့် သူတို့တောင် နေနိုင်သေးတာ၊ ကျွန်တော်လည်း ယောက်ျားပဲ ဆိုပြီး အားတင်းရတာပေါ့။
     တစ်ယောက်နဲ့တစ်ယောက် စကားအကောင်းပြောရင်တောင် အဆဲလေး အတိုင်းလေးနဲ့မှ ပြောဆိုတတ်
တဲ့လူစုကြားမှာ ဘယ်လိုပဲ တည်တည်ခန့်ခန့်နေပေမယ့် ကာလရှည်လာတော့ ဇာတိကပြလာကြတယ်။
     ညရောက်ရင် နီးစပ်ရာရွာထဲ ခဏလည်ရင်း သောက်လာလား သောက်လာရဲ့၊ တစ်ယောက်နဲ့တစ်ယောက် အခန့်မသင့်ရင် ဓားတကိုင်ကိုင်နဲ့ ကြိမ်းမောင်းလား ကြိမ်းကြရဲ့၊ အလုပ်ထဲမှာလည်း ကျွန်တော်မှရပ်ကြည့်မနေရင် နည်းနည်းလေးကွယ်တာနဲ့ ထိုင်နေလားနေကြရဲ့။
      ဒီလိုလူစုနဲ့အတူ ငွေများများလည်း ဆောင်မထားရဲတော့ လေးငါးရက်တစ်ခါလောက် အိမ်ပြန်ပြီး
ငွေယူရတယ်လေ။ မိသားစုခင်တဲ့ ကျွန်တော့်အတွက်ကတော့ အကွက်ပေါ့။ ဒီလိုပြန်ရမှလည်း အလွမ်းပြေတယ်။ အကြောင်းမရှိ အကြောင်းရှာပြီးလည်း ပြန်မိတယ်။
     ကျွန်တော့်လိုပဲ ပန်းရန်အဖွဲ့ကလည်း အကွက်ချောင်းနေတာ။ ကျွန်တော်ပြန်မယ့် အချိန်ကိုပေါ့။ ဒါကို ကျွန်တော်ကလည်းသိတယ်။
     တံတားအောက်ခြေကို ကျောက်လောင်းတာ တစ်ရက်နဲ့ညတစ်ဝက် ကြာသွားတယ်။ ပင်ပန်းနေတဲ့ ပန်းရန်အဖွဲ့ကို တစ်ရက်အနားပေးပြီး ကိုယ်ထည်အုတ်စီတာက ပန်းရန်အဖွဲ့အတွက် ထမင်းစားရေသောက်
ဖြစ်သွားပြီဆိုတော့ ကျွန်တော်လည်း ပြန်ဖို့ပြင်တယ်။
     စခန်းနဲ့အိမ်က ဆိုင်ကယ်နဲ့ခပ်သွက်သွက်မောင်းသွားရင် သုံးနာရီလောက်ပဲကြာမယ်။ အိမ်မှာ တစ်ရက်နားပြီး ပြန်လာရင် စခန်းမှာ ကျွန်တော်မရှိမယ့်ရက်က နှစ်ရက်။ တစ်ရက် အုတ်စီတာ ဘယ်နှစ်လွှားပြီးတယ်၊ ဘိလပ်မြေအိတ် ဘယ်လောက်ကုန်တယ် ဆိုတာကို အဖွဲ့ခေါင်းဆောင် ပန်းရန်ဆရာနဲ့ စံချိန်ယူထားလိုက်တယ်။ ဘိလပ်မြေအိတ်တွေ ထိန်းသိမ်းဖို့လည်း ကျွန်တော့်တပည့် လူယုံကောင်လေးတစ်ယောက်ကို ချန်ထားခဲ့တယ်။ ဂရုစိုက်ကြည်ဖို့လည်း မှာထားရတယ်။ ဟုတ်တယ်လေ။ စခန်းမှာ တန်ဖိုးအရှိဆုံးက ဘိလပ်မြေပဲ။ ပန်းရန်အဖွဲ့တွေ မျက်စောင်းထိုးနေတာလည်း ဒီဘိလပ်မြေပဲ။
     ကျွန်တော်က အတွေ့အကြုံမရှိတဲ့ ကန်ထရိုက်တာဆိုပေမယ့် ဒီလောက်တော့လည်း မအသေးပါဘူး။ အိတ်အရေအတွက်ကို သေချာရေ။ တပည့်ကိုလည်း သူတို့ လာညှိရင်တောင် မပါဖို့သေချာစည်းရုံး။ ကိုယ့်ဘက်က လုံခြုံအောင်လုပ်ပြီးမှ မြှုံးလွတ်ငါးလို အငမ်းမရပြန်ခဲ့တော့တယ်။
     ဒါပေမယ့် တကယ်တမ်းကျတော့ ကျွန်တော်ဟာ နှောင်ကြိုးမိနေသူပါပဲ။ မိတာမှ ကျွန်တော့်
ခြေနှစ်ချောင်းမှာ တစ်ချောင်းကိုတစ်ကြိုးစီ ချည်မိနေတာ။ ရှေ့ကို ဇောနဲ့ လှမ်းလိုက်တဲ့ ခြေလှမ်းရဲ့
နောက်မှာ ကျန်ခဲ့တဲ့ခြေကို နှုတ်သိမ်းဖို့ကျတော့လည်း တုံ့နှေးနေပြန်တယ်။
      မိသားစုကို တွေ့ချင်စိတ်နဲ့ အလုပ်ကို စိတ်မချစိတ်ဟာ နှောင်ကြိုးနှစ်ခုလို အားပြိုင်ဆွဲခံနေရတော့ ကျွန်တော် တော်တော်တုန်လှုပ်သွားတယ်။
      သီချင်းလိပ်ပြာလေးတွေ လယ်ပပ်ကြားအက်ထဲမှာ ညှိုးရော်ခြောက်သွေ့နေတာတောင် ကျွန်တော် မမြင်တော့ဘူးလေ။
                                                               xxxxxxx
     “ မေ ငွေမမက်လို့မှ ကို့နောက်လိုက်ခဲ့တာပါ။ ငွေလိုချင်မှဖြင့် ငွေပေါတဲ့သူကို ရွေးမှာပေါ့။
မေက ငွေထက် အချစ်ကို တန်ဖိုးထားခဲ့ပေမယ့် မေ တန်ဖိုးထားခဲ့တဲ့ ချစ်သူက ခုတော့ ငွေကိုပိုမက်သွားပြီ။
ငွေနောက်ပဲ လိုက်ချင်နေပြီ။
     “ ရပ်လိုက်ပါတော့။ ဒီဇာတ်လမ်းကို ဒီမှာတင် ရပ်လိုက်ပါတော့။ ခုချိန်နောက်ဆုတ်ရင် မီသေးတယ်။ အလွန်ဆုံး ရှုံးရင် ဂဏန်းခြောက်လုံးပေါ့။ ဒီလောက်တော့ ကျွန်မတို့ခံနိုင်ပါသေးတယ်။
      “ ကိုက ဘယ်သူ့ကို ကြောက်နေတာလဲ။ ဘယ်သူ့ကိုမှ ထည့်စဉ်းစားမနေစမ်းပါနဲ့။ ပျော့ညံ့တယ်လို့ အပြစ်ပြောမယ့်သူတွေ၊ ဇွဲမရှိဘူးလို့ ကဲ့ရဲ့မယ့်သူတွေ၊ ဒါလေးများလို့ နှာခေါင်းရှုံ့မယ့်သူတွေ။ တကယ်က
ငါလုပ်နိုင်တယ်လို့ပြချင်လို့ ကိုတောင့်ခံနေတာ မေသိသားပဲ။ ကိုဟာ သက်သက်မဲ့ ဒုက္ခခံပြီး လောဘ
ကြီးနေတာ။ လူအထင်ကြီးစေချင်တဲ့ အတ္တတစ်မျိုးဝင်နေတာ။
    “ ဒီငွေတွေကို ကျွန်မအတွက် ရှာနေတယ်ဆိုရင်တော့ ခုချက်ချင်းရပ်လိုက်ပါ။ ကျွန်မ ဘာမှမလိုချင်ဘူး”
     ကျွန်တော့် ပါရမီဖြည့်ဖက်ဟာ တော်လေး၀၀င်မဟုတ်သလို ကျွန်တော်ကလည်း ဘုရားအလောင်း မဟုတ်လေတော့ နားလည်မှုတွေ အမြဲနေရာတကျ မရှိနိုင်ပါဘူး။ မေ့ရင်ထဲက ဝေဒနာနဲ့ ကျွန်တော့်
စိတ်ရင်းစေတနာကြားမှာ နားလည်မှုတစ်ခုခု အံချော်လမ်းလွဲနေခဲ့တာ ရင်အနာခဲ့ရဆုံးပါ။
    “ ကို့အတွက်ဆိုလည်း ဒီအလုပ်ကို မလုပ်ဘူး။ မေ့အတွက်လည်း လုပ်စရာမလိုမှန်းသိတယ်။ ခုလက်ရှိဘ၀က ကိုတို့နှစ်ယောက်တည်းမှ မဟုတ်တာဘဲမေရယ်။ ကို့သားနဲ့သမီးအတွက်  ငွေများများ
ရမယ့် ဒီအလုပ်ကို  ကိုလုပ်သင့်တယ်လို့ အားတင်းပြီး လုပ်ရတာပါ။ ကို့အတ္တအတွက်လည်း မဟုတ်ပါဘူး။
ကို့အောင်မြင်မှုအတွက်လည်း မဟုတ်ပါဘူး။
     ကိုတို့နှစ်ယောက်တည်းသာဆို ပိုက်ဆံမချမ်းသာရင်နေ ကို့ဝါသနာ ဂီတနဲ့ကဗျာကိုပဲ ကို ဖက်တွယ်ထား
မှာပါ၊ ဇွတ်တရွတ် မိုက်ရူးရဲမဆန်ချင်စမ်းပါနဲ့ကွယ်။ ဘဏ်မှာ တိုက်ပေါင်ထားတဲ့အကြွေးတွေ ကြေချင်လို့မှ
ဒီအလုပ်ကို စခဲ့မိပြီ။ လုပ်ငန်းအရင်းအနှီးအတွက် ချေးထားရတဲ့ငွေပါ ထပ်အကြွေးတင်ရင် အတိုးဆပ်ရင်းနဲ့ပဲ ကြွေးရင်းဆပ်နိုင်တဲ့ဘ၀ ပိုဝေးသွားမှာပေါ့။ ကလေးတွေကို အကြွေးအမွေပေးတဲ့ မိဘတော့ မဖြစ်ပါရစေနဲ့ မေရယ်....”
    တကယ်တော့ နားလည်မှုခေါင်းပါးလွန်းလို့ ပေါက်ကွဲနေရတာမှ မဟုတ်ဘဲ။
ကျွန်တော်ပင်ပန်းတာကို မကြည့်ရက်တာရော၊ တစ်ခါမှမခွဲခွာဖူးလို့ ဝေးကွာနေရတဲ့ခံစားချက်တွေ ပြင်းထန်တာရောကြာင့် မေ စိတ်လှုပ်ရှားနေတာမှန်း ကျွန်တော်ကတော့ နားလည်ပါတယ်။
      ကျွန်တော်ကရော ရင်မနာတတ်ဖူးတဲ့လား။ ဇနီးနဲ့သားသမီးကို ခင်တွယ်တတ်လွန်းလို့တောင် ဟိုး အရင်ကတည်းက ဘယ်လောက်ပဲ ငွေကြေးအခက်အခဲကြုံကြုံ၊ မိတ်ဆွေအသိထဲက နိုင်ငံခြား အလုပ်ထွက်လုပ်တဲ့ သတင်းတွေ ဘယ်လောက်ကြားကြား...
     “ မေ ကို့ကို နိုင်ငံခြားလွှတ်ပြီး အလုပ်လုပ်ခိုင်းဖို့တော့ ဘယ်တော့မှ မပြောပါနဲ့နော်။ ကို မေနဲ့ ကလေးတွေကို မခွဲနိုင်ဘူး။ မြန်မာပြည်ထဲမှာပဲ ဘယ်လောက်ပင်ပန်းပါစေ၊ လုပ်ပါ့မယ်...”
     “ အို အဲဒါတော့ စိတ်သာချ။ ကိုသွားမယ်ဆိုရင်တောင် မေက မလွှတ်သေးဘူး...”
     အဲဒီလို ကျွန်တော်တို့မောင်နှံက ရှေ့သွားနောက်လိုက် ညီခဲ့ကြတာပါ။
                                                                xxxxxxx
      အလုပ်စခန်းကိုပြန်တဲ့ တောင်ပတ်လမ်းလေးက ကျွန်တော့်ဘ၀ရဲ့ခရီးလမ်းလိုပဲ။ ခပ်ဆင်ဆင်တူတယ်။
ဝေဟင်က လေယာဉ်နဲ့သာကျော်ရမယ်ဆိုရင် ဒီခရီးက အနီးလေးပဲပေါ့။ ချိုင့်ဗလပွ တောင်ပတ်လမ်းကနေ
ဆိုင်ကယ်လေးနဲ့ဆိုတော့ ခရီးက မနီးချင်ဘူး။
     ဒီကြားထဲ အိမ်ပြန်ခရီးမဟုတ်ဘဲ အလုပ်ပြန်ခရီးဆိုတော့ ပိုဝေးတော့တယ်လေ။
     သားနဲ့သမီးရဲ့ မျက်ရည်လဲ့နေတဲ့ မျက်ဝန်းလေးတွေနဲ့ အဖေလုပ်သူကို တင်းတင်းကျပ်ကျပ်ဖက်ထားတဲ့ လက်လေးတွေက ခုထိ ကျွန်တော့်နှလုံးသားကို ဆုပ်ဆွဲထားသလိုပဲ။
      ဘယ်လောက်ပဲ နှောင်ကြိုးတွေက ခြေတုံ့ဆွဲထားပေမယ့် အိမ်ထောင်ဦးစီး ယောကျာ်းသား
တစ်ယောက်ရဲ့တာဝန်ဆိုတဲ့ အသိကလည်း အလုပ်စခန်းရှိရာကို တွန်းပို့နေတယ်။
     နောက်ထပ် တံတားတွေ ကန်ထရိုက်ထပ်ရဖို့ အခွင့်အရေးနဲ့ မိသားစု စီးပွားရေးပြေလည် တိုးတက်ဖို့လမ်းတွေ ရှေ့မှာ ပွင့်နေတာ အားရစရာ မြင်နေရပြီလေ။ အစားအသောက်အနေအထိုင် ပင်ပန်းဆင်းရဲတာကတော့ ကျွန်တော် ယောက်ျားပဲ ခံနိုင်ရမှာပေါ့။
    အလုပ်သမားထိန်းချုပ်ရေး၊ လိုအပ်တဲ့ပစ္စည်းမျိုးစုံ ရရှိရေး စတဲ့ အခက်အခဲမျိုးစုံကလည်း ကျွန်တော် ယောက်ျားပဲ၊ စွမ်းဆောင်နိုင်ရမှာပေါ့။
     ဒါပေမယ့် မိသားစုကို လွမ်းတဲ့စိတ်ကတော့ ဘယ်တော့မှ နေသားကျသွားမှာ မဟုတ်ဘူး။ ဒါကလည်း တောင်လေးတစ်လုံး နှစ်လုံးလောက်ကျော်ပြီး ဧရာဝတီမြစ်ကူးတံတားပေါ်ကို ဖြတ်လိုက်ရင်
ရောက်နိုင်တာပဲ။ ဒီလိုပဲ ဖြေတွေးရမှာပေါ့။
    အင်း...တံတားလေး နှစ်စင်း သုံးစင်းလောက်တော့ အားတင်းပြီး ကြိုးစားလုပ်လိုက်ပါ့မယ်လေ။
ပြီးခဲ့ရင်တော့ ပိုးသတ်ဆေးအပြင်းစားတွေ မိထားတဲ့ ကျွန်တော်ဝါသနာလေးတွေကို ဆေးပြန်ကုရဦးမယ်။
မိသားစုအတွက် တင်နေတဲ့ အကြွေးလေးကြေပြီးရင် ကျန်တဲ့ငွေလေးနဲ့ ကျွန်တော့်သီချင်းတွေ ဒီမိုခွေလေး
သွင်းထားရမယ်။
     ကျွန်တော် ကွန်ပျူတာနဲ့ ဖန်တီးထားတဲ့ တီးလုံးခွေလေးက ဘယ်မှာ သိမ်းထားမိတာပါလိမ့်။
     ကျွန်တော့်ရေးလက်စ ကဗျာလေးရော။ ဘယ်စာအုပ်ကြားမှာ ညှပ်ထားတာပါလိမ့်။
     အမှန်တော့.... ကျွန်တော့်ဝိညာဉ်က သီချင်းတွေ ကဗျာတွေမှာပဲ ပူးကပ်နေတာပါဗျာ။ ကျွန်တော့်လက်တွေက ဂစ်တာနဲ့ ကလောင်ကိုင်ပြီး သီချင်းကဗျာတွေပဲ ဖန်တီးသင့်တာပါ။ ဘာဆိုင်လဲ။
ကန်ထရိုက်တာဘ၀နဲ့ ကျွန်တော်နဲ့။
     ကဗျာဆရာ၊ သီချင်းရေးဆရာ မင်းဇံကျော်ပဲ ဖြစ်ချင်တာ။ ကန်ထရိုက်တာ မင်းဇံကျော်ဆိုတာ ကျွန်တော်မှမဟုတ်တာ။
     ဒါပေမယ့်လေ... ကျွန်တော့်ဘ၀ဖြစ်စဉ်က ရထားကြီးစီးလာတာဆိုရင် ဒါဟာ လမ်းဘူတာလေးတစ်ခု
ပေမို့  ခေတ္တခဏတော့ ဖြတ်သန်းခိုဝင်ရမယ်ပေါ့။ ကျွန်တော် ရည်ရွယ်ခုတ်မောင်းလာခဲ့တဲ့ လမ်းဆုံးဘူတာကတော့....။
    ဟော...တွေးရင်း မောင်းရင်း ကျွန်တော့်အလုပ်စခန်းလေးကိုတောင် လယ်ကွင်းတွေကြားထဲမှာ လှမ်းမြင်နေရပြီ။ ဟိုကောင်တွေ အလုပ်မှ လုပ်နေကြရဲ့လားမသိဘူး။ ပန်းရန်အဖွဲ့ရဲ့ တစ်နေ့စားစရိတ်နဲ့
လုပ်အားခက နည်းတာမဟုတ်ဘူး။ မခိုမကတ်လုပ်ကြမှ စရိတ်မထောင်းမှာ။
    ဘိလပ်မြေအိတ်တွေရော။ ကုန်ရမယ့်အရေအတွက်ထက် ပိုလျော့နေပြီလား။ အခိုးများခံနေရပြီလား မသိဘူး။ ဒီနားတစ်ဝိုက်မှာက လျှိုလေးတွေ ချိုင့်လေးတွေအပေါသား။ တစ်ယောက်တစ်အိတ် ထမ်းသွားပြီး
တစ်နေရာရာမှာ ၀ှက်ထားလိုက်ရင် တော်ရုံရှာမတွေ့နိုင်ဘူး။ နီးစပ်ရာရွာလေးတွေကို တဖြည်းဖြည်းချင်း
ရောင်းစားလို့ရတယ်။
     ပန်းရန်ဆိုတာက အလုပ်ရှင်ကန်ထရိုက်တာကို ဘယ်လိုဖဲ့ရမလဲလို့ ချောင်းနေကြတဲ့ကောင်တွေ။ တိုက်ဆောက်တုန်းကတောင် အလုပ်သိမ်းအပြန် ထမင်းဘူးထဲ ဘိလပ်မြေတို့ သံချောင်းတို့ ထည့်ခိုးတာ
မိဖူးသေးတယ်။ ဘယ်ကောင်မှ ယုံရတာမဟုတ်ဘူး။ သူခိုးချည်းပဲ။ ဘယ်သူမှမကောင်းဘူး။ အလကားကောင်တွေ။
    သူများသာပြောနေတာ။မထူးပါဘူးလေ။ ကျွန်တော်ကရော...။ ကန်ထရိုက်တာဆိုတာကရော...။
     တော်ပြီ။ အတွေးလွန်ရင် အကုသိုလ်များတယ်။ ဒီတံတားတစ်စင်းပြီးရင် ရတဲ့အမြတ်နဲ့ ကျွန်တော်ရေးထားတဲ့ သီချင်းလေးတွေ ခွေလုပ်ဖို့စီစဉ်ရမယ်။ နိုင်ငံကျော် သီချင်းရေးဆရာကြီးဖြစ်ရင် ကန်ထရိုက်တာအလုပ် လုပ်စရာမလိုတော့ဘူးပေါ့။ သီချင်းတွေကြားထဲမှာပဲ ပျော်ချင်တယ်။ အုတ်တွေ၊ သဲတွေ၊ ဘိလပ်မြေတွေနဲ့ လောဘဇောတွေ ထွေးလုံးနေရတဲ့ဘ၀ကို မုန်းတယ်။
      ဟာ....အတွေးလွန်နေလိုက်တာ...။ နီးလာမှ သေချာကြည့်မိတယ်။ ဘိလပ်မြေအိတ်အထပ်ကြီးက
တော်တော်လျော့နေပါလား။ ဒီနှစ်ရက်နဲ့ ဒီလောက်ကုန်စရာမှ အကြောင်းမရှိတာ။
ဒီကောင်တွေ.... တောက်...။
     ကျွန်တော့် စိတ်ကူးယဉ်သီချင်းလေး ကြိုးပြတ်ဂစ်တာနဲ့အတူ မဆလာမွှေအိုးထဲ ထိုးကျသွားတော့တယ်။
                                                                 xxxxxxxx

ဝေ(စီးပွားရေးတက္ကသိုလ်)
မဟေသီမဂ္ဂဇင်း....( စက်တင်ဘာလ၊ ၂၀၀၈)